Ibrani 8:13 - Porjanjian Boharu Torjomahan Baso Dilakng Soari-ari

¹³ Jadi, boko somadikan, obai Allah bopandir mongona'i pojanjian inyo boharu, jadi Sio mombulah pojanjian manah nantai kinyo topakaiam. Pojanjian manah nantai udah tuho huatan kinyo manah agi' paca'an hilakam.

Ibrani 8:13 ပူးပေါင်းရင်းမြစ်များ

Matius 24:35

Pocayocam agatn pomandiran-Ku, obai biar pan langit huatan bumi paca'an boahir, pomandiran-Ku totap kinyo tohu boahir.

Lukas 22:20

Lopas sia' jadi makatn, lalu, agatn caro inyo samo agatn roti nantai, Yesus moonju' socangkir anggur agi' ko sia' kapikng bopandir, “Socangkir anggur ni'in mowakili darah-Ku inyo tajahan ditumpahan pakai' kaitn watu Aku mati. Darah ni'in moresmian Porjanjian Boharu inyo Allah pulah agatn monsio.

1 Korintus 13:8

Kasih kinyo paca'an kalo botongga'. Apo nononyo, komampuan husus pakai' monyampaian posatn doi' Allah paca'an botongga'. Komampuan husus pakai' bopandir dalapm baso roh paca'an botongga'. Komampuan husus pakai' mongotohu'i boko hal doi' Roh Allah paca'an botongga'.

2 Korintus 3:6

Sio inyo bulah koi sanggup dalapm molayati pomboritoan mongona'i Pojanjian Boharu inyo Sio pulah pakai' monsio. Pojanjian Boharu nantai kinyo mongona'i monuruti boko porintah inyo ditulis, apo mongona'i monuruti Roh Allah. Obai, boko porintah inyo ditulis di Hukupm Torat nantai mombaba' komatian. Apo, Roh Allah mombaba' kohidupan.

2 Korintus 5:17

Boko urakng inyo ado di dalapm Kristus, sia' monjadi monsio boharu. Sia' udah botongga' hidup agatn caro inyo manah. Sobondarnyo, sia' hidup agatn caro inyo boharu.

Ibrani 1:11

Somuonyo nantai paca'an lonyap, apo Duatn totap ada'an somanah-manahnyo. Langit ongko bumi ni'in paca'an monjadi samo sama'an pakai'an inyo buru'.

Ibrani 12:24

Kaitn datakng mohadap Yesus inyo monjadi Porontaro inyo moadoan pojanjian boharu inyo Allah pulah agatn monsio, ongko ko darah-Nyo inyo momborosihi kaitn doi' dosa. Darah nantai bopandir mongona'i lou' inyo lobih boi' daripado darah Habel.

Ibrani 7:22

Jadi, doi' sumpah nantai, kito tohu Yesus monjadi jaminan obai Allah udah mombulah Pojanjian Boharu agatn monsio. Pojanjian nantai lobih boi' daripado pojanjian manah.

Ibrani 8:6

Apo watu ni'in, Yesus ado polayatan inyo jouh lobih boi' doi' polayatan boko imam di dunia. Obai, Sio monjadi Porontaro inyo moadoan Pojanjian Boharu inyo Allah pulah agatn monsio. Pojanjian nantai lobih boi' obai boko hal inyo dijanjian Allah lobih boi' jam.

Ibrani 8:8

Apo, Tuhatn Allah moniant ado kosalahan umat-Nyo. Jadi Sio bopandir, “Dinga'an cam! Nononyo, Aku paca'an mombulah pojanjian boharu agatn banso Israel ongko banso Yehuda.

Ibrani 9:15

Obai nantai, Kristus nam Porontaro inyo moadoan pojanjian boharu, ia'an oca' urakng inyo ditingkau Allah ulih monorima' somuo borokat pakai' somanah-manahnyo inyo udah dijanjian-Nyo. Somuonyo nantai ulih tojadi obai udah ado inyo mati, ia'an Kristus. Komatian-Nyo mombebasan urakng doi' boko kosalahan inyo dilabuhan sia' timpu pojanjian inyo potamo ija' bolaku.