Ibrani 7:28 - Porjanjian Boharu Torjomahan Baso Dilakng Soari-ari

²⁸ Poraturan dalapm Hukupm Torat mombulah boko urakng inyo kinyo sompurna diangkat monjadi imam agukng. Apo lopas Hukupm Torat, ado sumpah inyo dipandiran Allah. Agatn sumpah nantai, Allah moangkat Ana'-Nyo monjadi Imam Agukng inyo sompurna pakai' somanah-manahnyo.

Ibrani 7:28 ပူးပေါင်းရင်းမြစ်များ

Lukas 13:32

Apo Yesus bopandir ko sia', “Pandirancam ko Herodes inyo ulahnyo ubo payau nantai, ‘Sari ni'in ongko hobu' Aku paca'an totap monundukng boko roh jahat huatan monyamani boko urakng. Lalu, Aku paca'an monjadi'i pogota'an-Ku watu ari inyo kotigo.

Yohanes 19:30

Lopas Yesus mominum ara'i anggur nantai, Sio bopandir, “Tuntukam!” Lalu, Sio monundu'an kopala'-Nyo, monyorahan kosih-Nyo.

Ibrani 1:2

Apo, watu ari-ari toahir ni'in Allah bopandir ko kito molalu'i Ana'-Nyo. Allah udah monotap'an Ana'-Nyo inyo bohak momuku'i somuo hal. Molalu'i Sio, Allah mombulah sogolintaran alapm.

Ibrani 2:10

Allah mombulah somuo hal, huatan somuo hal di pulah pakai' Sio. Sio honda' mombulah banya' urakng monjadi boko poana'an-Nyo ongko moonji'i sia' kohidupan inyo mulia. Jadi, Allah pantas mombulah Yesus monjadi Ponyolamant inyo sompurna molalu'i pondorita'an. Agatn ubo nantai, Yesus ulih mombuka' jalatn ongko momimpitn sia' sampai sia' disolamant'an.

Ibrani 2:17

Nantaiam alasannyo, Yesus gola' monjadi monsio dalapm somuo hal, samo sama'an kito boko somadikan-Nyo. Agatn sama'an nantai, Sio monjadi Imam Agukng inyo monunju'an bolas kasihan ongko hala sotia ko Allah oca' dosa monsio ulih diamputi.

Ibrani 3:1

Obai nantai boko somadikan, inyo ditingkau jam monjadi boko urakng inyo husus umputn Allah, kaitn gola' bondar-bondar momporhatian Yesus inyo kito tuyut'i. Sio diutus Allah. Sio monjadi Imam Agukng kito.

Ibrani 3:6

Apo Kristus sotia sobagai Ana' inyo bokuaso agatn rumah Allah, ia'an kito. Kito ia'an rumah-Nyo aman kito totap kuat pocayo ko Yesus huatan yakitn moharap'an agatn somuo hal inyo paca'an dionju' Sio ko kito nononyo. Somuo hal nantai mombulah hati kito rindakng.

Ibrani 4:14

Obai nantai, kito gola' kuat agatn kopocaya'an kito. Obai, kito ado Imam Agukng inyo kotakng bokuaso, ia'an Yesus, Ana' Allah. Sio udah mansu' sorugo, monjadi porontaro pakai' kito di hadapan Allah.

Ibrani 5:5

Sama'an nian jam, Kristus kinyo moangkat diri-Nyo siku' monjadi Imam Agukng. Apo Allah inyo moangkat Sio. Kato Allah ko Sio, “Kolainam Ana'-Ku. Sari ni'in Aku udah monunju'an obai Akunam Bopai Kolai.”

Ibrani 7:21

Apo, watu Allah moangkat Yesus monjadi Imam Agukng, ado sumpah doi' Allah. Sama'an ni'in pomandirannyo: “Tuhatn udah bosumpah. Sio kinyo paca'an morubah koputusan-Nyo. ‘Kolai nam Imam pakai' somanah-manahnyo.’ ”

Ibrani 7:24

Apo obai Yesus hidup pakai' somanah-manahnyo, jadi conyiant ado urakng bukai inyo monggonti Sio sobagai Imam.

Ibrani 7:3

Solaitn nantai, conyiant kisah dalapm Buku Suci mongona'i indai, bopai, angki-bayatnnyo. Kolahirannyo huatan komatiannyo kinyo disobutan. Jadi, imam Melkisedek ado kosama'annyo agatn Ana' Allah. Io monjadi imam pakai' somanahnyo.