Ibrani 4:2 - Porjanjian Boharu Torjomahan Baso Dilakng Soari-ari

² Obai, Kabar Boi' nantai udah dipadahan ko kito samo sama'an ko angki-bayatn kito komai. Apo, borito nantai kinyo boguno pakai' sia' obai sia' kinyo pocayo watu mondinga'nyo.

Ibrani 4:2 ပူးပေါင်းရင်းမြစ်များ

1 Tesalonika 2:13

Koi hala bosukur ko Allah obai timpu koi momboritoan Kabar Boi' ko kaitn, kaitn pocayo nantai bondar-bondar doi' Allah huatan bukainyo doi' pikiran monsio. Kopocaya'an kaitn nantai pan udah morubah caro hidup kaitn.

Ibrani 11:6

Aman urakng kinyo pocayo, co mungkitn io ulih monyonangan hati Allah. Obai, urakng inyo datakng ko Allah gola' pocayo obai Allah ado. Io pan gola' pocayo obai Allah moonji'i upah ko sotiap urakng inyo bondar-bondar moncari'i Sio.

Ibrani 3:12

Jadi, boko somadikan, boboi'cam oca' kinyo ado di antaro kaitn inyo bohati jahat inyo kinyo honda' pocayo ko Allah. Jangan sampai kaitn botongga' taat ko Allah inyo hidup.

1 Timotius 4:8

Ado porbaso: ‘Aman kito bolatih oca'’ bulah bukakng-tubuh kito lobih kuat, ongko gunonyo oca' kito hidup lobih boi' di dunia ni'in. Apo, aman kito bolatih oca' hidup sosuai agatn kohonda' Allah, ongko gunonyo kito kinyo bayo hidup lobih boi' di dunia ni'in, malah kito pan ulih hidup somanah-manahnyo di sorugo.

Roma 2:25

Aman kaitn monaati Hukupm Torat, jadi sunant kaitn ado gunonyo. Apo aman kaitn molanggar Hukupm Torat, jadi sunant kaitn pocumo aja'am.

Kisah Boko Rasul 13:46

Apo Paulus ongko Barnabas kinyo gola'. Sia' bopandir, “Yesus moutus koi pakai' monyampaian Kabar Boi' mongona'i Sio. Koi gola' monyampaian lobih doholu ko kaitn, boko urakng Yahudi. Apo kaitn co honda' monorima' nantai. Rotinyo, kaitn kinyo moanggap diri cucu' monorima' hidup somanah-manahnyo. Obai nantai, ni'inan koi moninggalan kaitn ongko botula' molayati boko banso inyo bukainyo urakng Yahudi.

Yakobus 1:21

Jadi, kaitn gola' botongga' molabuhan boko hal inyo kotor huatan jahat. Lopas nian, jangan buhau. Apo torima'cam Pomandiran Allah agatn rondah hati. Allah udah monyimpatn Pomandiran-Nyo dalapm hati kaitn. Pomandiran-Nyo nantai ado kuaso pakai' monyolamant'an hidup kaitn.

Ibrani 4:6

Jadi, boko urakng inyo lobih doholu mondinga' Kabar Boi' nantai, sia' culih mansu' obai sia' kinyo taat ko Allah. Aman sama'an nian, udah jolas ado jumlah urakng bukai, inyo ulih mansu' tompat torahat nantai.

1 Korintus 13:3

Soandainyo aku mombagi-bagian somuo kodampuan umputnku, apotolagi' aku rela monyorahan bukakng-tubuhku pakai' ditunu'i dalapm api, apo aku kinyo mongasihi urakng bukai, aku samo sokali co boguno.

1 Petrus 1:12

Allah momadahannyo ko sia' obai polayatan sia' nantai bukainyo pakai' sia' siku', apo pakai' kaitn. Ia'an, watu ni'in Kabar Boi' mongona'i kosolamant'an nantai udah diboritoan ko kaitn. Nantai tojadi obai Roh Allah inyo diutus doi' sorugo monyoroto'i boko urakng nantai pakai' momboritoan Kabar Boi' nantai. Boko molekat pan honda' mongotohu'i mongona'i Kabar Kosolamant'an nantai.

1 Tesalonika 1:5

Obai watu koi momboritoan Kabar Boi' ko kaitn, koi kinyo bayo momakai boko pomandiran koi modas. Apo kuaso Roh Allah monulukng koi monyampaiannyo huatan koi kotakng yakitn aman Kabar Boi' nantai bondar. Kaitn mongotohu'i somuo nantai obai kaitn udah moniant caro hidup koi. Watu koi ado di antaro kaitn, koi molayati kaitn.

Galatia 3:8

Doi' komai, Allah ado hajat pakai' urakng bukainyo Yahudi. Aman sia' pocayo, jadi sia' dianggap bondar di hadapan Allah. Allah momboritoan Kabar Boi' nantai ko Abrahapm jouh-jouh ari sobolupmnyo. Kabar Boi' nantai totulis dalapm Buku Suci:, “Somuo banso paca'an diborokati molalu'i kolai.”

Galatia 4:13

Pasti kaitn ija' ingant potamo kali aku datakng ko kaitn. Aku sampat momboritoan Kabar Boi' ko kaitn obai bukakng-tubuhku boponyakit.

Kisah Boko Rasul 3:26

Apo Allah moutus Yesus pakai' monjadi Hulutn-Nyo ko kito banso Yahudi tolobih doholu. Allah udah bulah Sio hidup agi' doi' komatian oca' kito diborokati. Ninam caronyo Allah momborokati kito, ia'an agatn monulukng kito oca' kito masikng-masikng botongga' bulah dosa ongko monaati Sio.”

Roma 3:3

Apo sama'an apo aman ado urakng Yahudi inyo kinyo sotia ko Allah? Apobai nantai paca'an mombulah Allah kinyo sotia monopat'i boko janji-Nyo ko sia'?

Galatia 3:2

Timbasibo potakutanku ni'in: Ma'apo kaitn monorima' Roh Allah? Apobai kaitn monorima' Roh Allah obai kaitn monaati somuo porintah huatan poraturan Allah inyo ditulis Musa dalapm buku Hukupm Torat? Samo sokali cado! Kaitn monorima' Roh Allah obai kaitn pocayo Kabar Boi' mongona'i Yesus inyo aku boritoan ko kaitn!