Ibrani 2:3 - Porjanjian Boharu Torjomahan Baso Dilakng Soari-ari

³ pasti kito tajahan dihukupm aman kito kinyo monaati pomandiran Allah mongona'i kosolamant'an. Tuhatn Yesus siku' inyo potamo monyampaian Pomandiran Allah nantai. Lalu, boko urakng inyo mondinga'an lansukng doi' Sio, sia' monyampaiannyo sampai kito monjadi yakitn mongona'i nantai.

Ibrani 2:3 ပူးပေါင်းရင်းမြစ်များ

Matius 23:33

Uai kaitn inyo jahat, kaitn koturutan urakng jahat samo sama'an todukng! Jangan bopikir kaitn ulih morarian diri doi' hukupan di noraka!

Matius 4:17

Doi' watu nantai, Yesus mula'i momboritoan. Kato Sio, “Koraja'an Sorugo udah dampikam! Jadi, botongga'cam kaitn bulah dosa ongko monyonangan Allah.”

Markus 1:14

Lopas Yohanes ditangkap ongko dimansu'an ko ponjara, Yesus botula' ko propinsi Galilea, momadahan Kabar Boi' doi' Allah.

Lukas 1:69

Allah moonju' ko banso Israel sikuꞌ Ponyolamant inyo bokuaso doi' koturutan Rajo Daud, hulutn-Nyo.

Lukas 24:19

Yesus botakutn, “Poristiwa la'apo inyo tojadi?” “Poristiwa inyo tojadi mongonaꞌi Yesus, urakng doi' laman Nazaret nantai,” kato sia'. “Sio nantai nabi inyo bokuaso doi' Allah. Sio bulah mujisat inyo luar biaso. Sio mongajar boko urakng agatn kotakng pintar-corodi'. Somuo urakng sonang agatn Sio. Apotolagi' Allah!

Yohanes 15:27

Kaitn pan gola' bosasi mongona'i Aku obai kaitn udah bosamo agatn Aku doi' mulo polayatan-Ku.

Kisah Boko Rasul 2:22

Petrus molajuan pandirnyo, Watu ni'in boko somadikanku urakng Israel, dinga'an pomandiranku ni'in. Yesus doi' laman Nazaret diutus ulih Allah. Allah udah mombutian nantai obai Allah molabuhan somuo macapm mujisat di tongah-tongah kaitn somuo molalu'i Sio. Kaitn udah mongotohu'i nantai.

Kisah Boko Rasul 4:12

Jadi ongkah Yesus nam inyo dapat monyolamant'an monsio doi' hukupan dosa. Obai di soluruh dunia bayo Sioam dionji'i kuaso ulih Allah pakai' monyolamant'an monsio. Co nyiant inyo bukai.”

Roma 11:14

Agatn ubo nian, aku mungkitn ulih bulah banso ku siku' monjadi tungi. Aku boharap agatn boboropo urakng doi' sia' honda' pocayo ko Yesus jam sampai sia' monjadi solamant.

Roma 2:3

Jadi, aman kaitn mohakipi urakng bukai nantai apo kaitn jam molabuhan boko hal inyo samo, jangan bopikir Allah kinyo paca'an mohukupm kaitn!

1 Korintus 1:21

Allah bulah koputusan ni'in sosuai agatn kopintar-corodi'an-Nyo. Ia'an, Sio mombulah oca' monsio kinyo ulih mongonal Sio molalu'i kopintar-corodi'an monsio. Jadi, agatn sonang hati Allah monyolamant'an urakng inyo pocayo agatn momakai caro inyo dianggap budu, ia'an pomboritoan kabar boi'.

1 Tesalonika 5:3

Paca'an ado boko urakng inyo mongatoan, “Somuonyo boi'-boi' mo.” Apo malahan watu nantai socaro sopongirap sia' paca'an dibonasoan samo sama'an siku' urakng botina' buntikan inyo socaro sopongirap moalapi mohidap-porut honda' boana'an. Botina' nantai co dapat moloukan doi' oso podih porut nantai. Ubo nian jam, sia' inyo co pocayo kinyo paca'an ulih moloukandoi' hukupan nantai.

1 Timotius 1:15

Pomandiran ni'in memang bondar huatan gola' dipocayo bobondar: Kristus Yesus udah datakng ko dunia ni'in pakai' monyolamant'an boko urakng bodosa. Di antaro boko urakng bodosa, aku ninam inyo kotakng jahat.

Titus 2:11

Allah udah monunju'an koboi'an-Nyo inyo monyolamant'an somuo urakng. Biar pan kito kinyo cucu', Sio udah moonji'i jalatn oca' somuo urakng ulih disolamant'an.

Ibrani 1:1

Ija' joman komai mo, Allah bopandir ko angki-bayatn kito molalu'i boko nabi. Allah bopandir nanam-konanam ko sia' agatn bomacapm caro.

Ibrani 1:14

Apo boko molekat ia'an boko roh inyo molayati Allah. Sia' diutus pakai' monulukng boko urakng inyo tajahan monorima' kosolamant'an.

Ibrani 1:2

Apo, watu ari-ari toahir ni'in Allah bopandir ko kito molalu'i Ana'-Nyo. Allah udah monotap'an Ana'-Nyo inyo bohak momuku'i somuo hal. Molalu'i Sio, Allah mombulah sogolintaran alapm.

Ibrani 12:25

Porotian cam oca' kaitn jangan monula' Allah inyo bopandir. Timpu joman komai Sio momporingant'i sia' di bumi ni'in. Ongko sia' inyo monula' Sio nantai, sia' dihukupm. Tolobih agi' kito! Aman kito monula' Sio inyo bopandir doi' sorugo, pasti kito tajahan dihukupm!

Ibrani 4:1

Obai nantai, boko somadikan, kito gola' boboi'. Allah udah bojanji obai somuo urakng inyo pocayo ulih mansu' ko dalapmtompat torahat inyo Sio siap'an. Janji Allah nantai ija' bolaku pakai' kito watu joman ni'in. Apo, kaitn gola' boboi' oca' conyiant di antaro kaitn inyo culih mansu'.

Ibrani 4:11

Obai nantai, mara kito bousaha oca' kito ulih mansu' ko dalapm tompat torahat nantai. Jangan sampai ado urakng di antaro kito inyo culih mansu' obai io tuyut toladatn sia' doi' joman komai inyo kinyo taat ko Allah.

Ibrani 5:9

Agatn caro nantai, Sio monjadi Ponyolamant inyo sompurna. Jadi, Sio ulih moonji'i kohidupan kokal ko somuo urakng inyo taat ko Sio.

Ibrani 9:28

Sama'an nian jam, Kristus momposombahan diri-Nyo sokali mo pakai' monanggukng hukupan dosa urakng banya'. Sio paca'an datakng agi' inyo koduo kalinyo, bukainyo pakai' monanggukng dosa agi', apo pakai' monyolamant'an boko urakng inyo monantian kodatakan Sio.

1 Yohanes 1:1

Dalapm surat ni'in, koi monyampaian ko kaitn mongona'i Sio inyo disobut Pomandiran Allah inyo moonji'i hidup. Sio ado doi' mulonyo. Koi udah mondinga' Sio. Koi udah moniant Sio agatn mato koi siku'. Koi moniant Sio ongko koi udah moncanggapm Sio agatn jari koi siku'.

Yudas 1:17

Apo, kaitn, boko somadikanku inyo ku kasihi, ingant cam pomandiran inyo komai udah dipadahan ko kaitn doi' boko rasul Yesus Kristus, Tuhatn inyo bokuaso.

Wahyu 7:10

Sia' mondongkakng-mondorah, “Topujicam Allah koi. Koi disolamant'an ulih Sio inyo dudu' di tahta ongko ulih Ana' Domba!”