Ibrani 12:14 - Porjanjian Boharu Torjomahan Baso Dilakng Soari-ari

¹⁴ Bousahacam hidup damai agatn somuo urakng. Bousaha jam hidup borosih doi' dosa. Obai, urakng inyo kinyo borosih doi' dosa, kinyo tajahan ulih moniant Tuhatn.

Ibrani 12:14 ပူးပေါင်းရင်းမြစ်များ

Markus 9:50

Garapm nantai boi'. Jadi, kaitn gola' monjadi samo sama'an garapm. Kaitn gola' hidup damai agatn urakng inyo bukai. Apo aman garapm monjadi taba'i, co mungkitn dipulah mancitn agi'.”

Lukas 1:75

monyombah Sio huatan hala monjouhan diri doi' dosa, ongko molabuhan hal inyo boi' di hadapan Tuhatn, soumur hidup kito.”

Roma 12:18

Sodapat-dapatnyo aman nantai bogantukng doi' diri kolai siku' bousahacam pakai' hidup damai agatn somuo urakng.

Roma 14:19

Obai nantai, kito gola' bousaha oca' porbuatan kito mombulah somuo kito hidup agatn damai. Kito gola' bousaha monulukng urakng bukai pakai' lobih kuat pocayo ko Yesus.

Roma 6:22

Apo watu ni'in, kaitn udah bebas doi' kuaso dosa. Kaitn monjadi hulutn Allah. Kaitn ulih hidup borosih doi' dosa. Caro hidup nantai ado hasil, ia'an kaitn mondapat'an hidup inyo kokal.

1 Korintus 1:10

Boko somadikan, agatn kuaso Tuhatn kito, Yesus Kristus, aku monosihat'i oca' kaitn bosatu hati. Jangan kaitn bosongkayo monjadi bomacapm kolompok. Apo kohonda'nyo kaitn somombondarannyo bosatu dalapm porasa'an huatan pikiran kaitn.

1 Korintus 13:12

Agatn poumpamoan bukai, kito watu ni'in samo sama'an kito moniant dalapm coromin suatu kombayakan inyo kinyo jolas. Apo nono watu kito ado di sorugo kito paca'an moniant socaro lansukng. Ni'inan kito bayo mongonal Allah socaro kurakng sompurna. Apo nono kito paca'an mongonal Sio agatn sompurna. Samo sama'an Allah udah mongonal kito agatn sompurna.

2 Korintus 6:17

Obai nantai am, Tuhatn Allah bopandir, “Koluar cam doi' boko urakng inyo kinyo pocayo agatn Aku. Songkayoan diri kaitn doi' sia'. Jangan moncama' boko hal inyo campah. Aman kaitn molabuhan boko porintah-Ku nantai, jadi Aku tajahan monorima' kaitn.

2 Korintus 7:1

Boko somadikan inyo ku kasihi! Somuo janji Allah nantai pakai' kito. Obai nantai, marabo kito monjago bukakng-tubuh ongko roh kito oca' borosih doi' somuo hal inyo jahat. Agatn sama'an nantai, kito mongkitn hidup husus pakai' Allah kapikng kito gola' agatn Sio.

Galatia 3:21

Apobai nantai boroti obai Hukupm Torat bolawatan agatn boko janji Allah? Tontunyo cado! Obai, umpamonyo Allah moonji'i Hukupm Torat pakai' moonji'i kohidupan ko monsio, ongko rotinyo monsio ulih dianggap bondar di hadapan Allah agatn monaati Hukupm Torat.

Efesus 5:5

Kotohu'i cam ni'in: urakng inyo bulah dosa bomporajoan, urakng inyo bulah boko hal inyo kinyo sonunuh, urakng inyo kaha'-kolobu' (kaha'-kolobu' nantai rotinyo monjadian boko kohonda'-Nyo samo sama'an tuhatn sia'), somuo sia' kinyo ulih monjadi anggota Koraja'an Kristus huatan Allah.

Filipi 3:12

Aku co bomasud aku udah moncapai tujuan nantai! Memang aku bolupm sompurna. Apo aku hala bousaha pakai' moncapai tujuan nantai. Obai, nantaiam hajat Kristus Yesus bagiku timpu Sio moningkau ku monjadi umputn-Nyo.

1 Tesalonika 3:13

Koi bodoa oca' ni'inan Tuhatn monguat'an hati kaitn. Jadi, pas Yesus, Tuhatn kito agatn boko urakng suci umputn Sio, nononyo datakng, Allah Bopai kito moanggap kaitn kinyo bosalah huatan suci.

1 Tesalonika 4:7

Allah kinyo moningkau kito pakai' hidup dalapm dosa molaki-mbini bolupm dipojadi. Sio moningkau kito oca' kito hidup mongkitn suci.

1 Tesalonika 5:15

Poniant'an oca' co nyiant di antaro kaitn inyo mombalas kojahatan agatn kojahatan. Sobali'nyo bousaha pakai' hala bulah koboi'an ko boko somadikan kaitn huatan ko somuo urakng.

1 Timotius 6:11

Apo kolai, Timotius, jangan molabuhan boko porbuatan inyo jahat sama'an nantai. Kolai polayatn Allah. Kolai gola' bousaha hidup bondar di hadapan Allah, hidup sosuai agatn kohonda' Allah, pagutn sotia ko Allah, huatan mongasihi urakng bukai, botahatn mohadapi ajab sonsaro, bosikap lomah-lombut.

2 Timotius 2:22

Timotius, padohan sonjumpat'an kolaku'an urakng muda' inyo jahat. Apo bousahacam oca' kolai bulah inyo bondar di hadapan Allah. Totap sotia ko Allah huatan kasihicam urakng bukai. Bousahacam oca' hidup damai agatn urakng bukai. Labuhancam somuo nantai bosamo agatn boko urakng inyo monyombah Tuhatn agatn hati inyo somombondarannyo.

Ibrani 12:10

Bopai kito di dunia ni'in momantu kito bayo sobontar watunyo. Sia' momantu sosuai agatn la'apo inyo sia' anggap boi'. Apo Allah momantu kito pakai' koboi'an kito oca' kito monjadi somongkitn borosih doi' dosa sama'an Sio.

Ibrani 9:28

Sama'an nian jam, Kristus momposombahan diri-Nyo sokali mo pakai' monanggukng hukupan dosa urakng banya'. Sio paca'an datakng agi' inyo koduo kalinyo, bukainyo pakai' monanggukng dosa agi', apo pakai' monyolamant'an boko urakng inyo monantian kodatakan Sio.

1 Petrus 3:11

Sia' gola' botongga' bulah kojahatan, lalu bulah koboi'an. Sia' gola' bousaha bobondar pakai' hidup damai agatn urakng bukai.

1 Petrus 3:13

Aman kaitn rajitn bulah koboi'an, co nyiant ado urakng inyo tajahan monyakiti kaitn!

2 Petrus 3:11

Jadi, obai somuo hal tajahan hancur sama'an nantai, soharusnyo kaitn hidup agatn caro inyo mono? Kaitn gola' kinyo bodosa ongko hidup sama'an Allah kohonda'i.

2 Petrus 3:18

Apo, kaitn gola' botumbuh somongkitn mongonal Yesus Kristus, Ponyolamant huatan Tuhatn inyo bokuaso dipucu' kito. Kironyo kaitn somongkitn sadar mongona'i koboi'an-Nyo. Topujicam Sio, watu ni'in sampai somanah-manahnyo. Amin!

3 Yohanes 1:11

Somadikanku inyo tokasih, jangannam monumpakng boko hal inyo jahat. Tumpakngcam inyo boi'. Urakng inyo bulah koboi'an, io boasal doi' Allah. Apo urakng inyo bulah kojahatan, io co kalo mongonal Allah.