Ibrani 12:1 - Porjanjian Boharu Torjomahan Baso Dilakng Soari-ari

¹ Urakng banya' nantai ia'an boko sasi pakai' kito, soumpamonyo awatn inyo mongoliliki kito. Obai nantai, mara kito hidup agatn caro inyo samo sama'an kito bonggidi'an dalapm polomba'an inyo ado dipohadapan kito. Mara cam kito mombuakan somuo bobatn ongko dosa inyo opat mohalaki kito. Mara cam kito hala bonggidi'an sama'an nantai

Ibrani 12:1 ပူးပေါင်းရင်းမြစ်များ

Matius 10:22

Somuo urakng paca'an mombonci' kaitn obai kaitn tuyut Aku. Apo sotiap urakng inyo totap pocayo ko Aku sampai koponsuahannyo, sia' paca'an disolamant'an.

Matius 24:13

Apo boko urakng inyo totap botahatn sotia ko Aku sampai ahir, sia' paca'an disolamant'an.

Markus 10:50

Urakng buto nantai hagar bodiritn, moninggalan jubahnyo, ongko botula' ko Yesus.

Lukas 12:15

Ongko Yesus bopandir ko somuo urakng di santai, “Boboi'cam! Jagocam diri kaitn doi' somuo macapm kotama'an. Obai hidup inyo sobondarnyo samo sokali kinyo bogantukng agatn banyaꞌnyo kodampuan.”

Lukas 16:28

Aku bisi lima' urakng somadikan inyo ija' hidup di dunia. Siuh Lazarus momporingant'i sia' pakai' botongga' bulah dosa huatan hidup monyonangan hati Allah oca' nononyo lopas jadi mati, sia' co mansu' ko tompat ajab sonsaro ni'in jam.’

Lukas 21:34

“Jagocam diri kaitn. Jangan sampai ado boko hal di dunia ni'in inyo moncaci' pikiran kaitn, ubo mabu', porbuatan jahat inyo dilabuhan aman udah komabu'an, boko mosalah kohidupan ni'in. Aman pikiran kaitn samaꞌan nian, nononyo kaitn co siap timpu ari nantai datakng. Obai ari nantai tajahan datakng pakai' somuo urakng, conyiant inyo tohu, samo samaꞌan joyat ntobukan mongujut bonatakng.

Yohanes 3:32

Sio momadahan mongona'i somuo inyo Sio tiat huatan Sio dinga'. Apo, conyiant ado urakng inyo pocayo agatn pomandiran-Nyo.

Yohanes 4:39

Botina' nantai tontai mongisahan mongona'i Yesus ko boko urakng Samaria di kota nantai. Katonyo, “Sio bokisah ko aku boko hal inyo kalo ku labuhan.” Obai pandir botina' nantaiam, banya' doi' sia' pocayo ko Yesus.

Yohanes 4:44

Obai, Yesus siku' udah bopandir, “Siku' nabi kinyo dirogo'i di laman-Nyo siku'.”

Roma 12:12

Sonang-nyamancam obai kaitn yakitn boharap ko Tuhatn. Kaitn gola' botahatn mohadapi ajab sonsaro ongko hala bodoa.

Roma 2:7

Allah paca'an moonju' kohidupan kokal ko urakng inyo kinyo monyorah pakai' bulah koboi'an, ia'an urakng inyo bulah koboi'an obai moncari' komulia'an huatan hormat doi' Allah, huatan honda' dionji'i hidup kokal doi' Sio.

2 Korintus 7:1

Boko somadikan inyo ku kasihi! Somuo janji Allah nantai pakai' kito. Obai nantai, marabo kito monjago bukakng-tubuh ongko roh kito oca' borosih doi' somuo hal inyo jahat. Agatn sama'an nantai, kito mongkitn hidup husus pakai' Allah kapikng kito gola' agatn Sio.

Galatia 5:7

Sokomai kaitn monunju'an komajuan cukup boi' watu tuyut Yesus. Jangan dilongahan urakng bukai honda' mohalak-halaki kaitn. Jangan sampai kaitn co monaati ajaran inyo bondar.

Efesus 4:25

Obai nantai, jangan tumbukan. Kaitn gola' momadahan inyo bondar ko boko somadikan inyo bukainyo. Obai, kito sosamo anggota umant Allah.

Filipi 1:30

Ia'an nantai sama'an inyo udah kaitn tiat tojadi ko aku ongko inyo kaitn dinga' tojadi ko aku watu ni'in.

Filipi 2:16

Ia'an nantai, kaitn monunju'an ko sia' Pomandiran Allah inyo moonji'i hidup inyo sobondarnyo. Aman kaitn hidup sama'an nian, aku tajahan bangga watu ari Kristus datakng agi' obai kaitn monjadi buti obai polayatan ku kinyo pocumo. Ado hasil doi' pogota'an humpas-pulasku.

2 Timotius 2:4

Siku' urakng projurit inyo tongahan botugas, io kinyo momikiran pokoroja'an bukai. Aman molabuhan nantai, io monyonangan hati kopala' pasukannyo.

2 Timotius 4:7

Aku udah bouyuh-jorih agatn boi', aku udah moahiri potandikan huatan aku totap sotia sampai ahir.

Yakobus 1:3

Kaitn ulih sonang-nyaman obai kaitn mongotohu'i ni'in: Kito moalapi poncoba'an inyo mouji kito apobai kito paca'an totap pocayo ko Yesus kata'an cado. Aman kito totap pocayo, jadi kito monjadi urakng inyo mongkitn ulih botahatn mohadapi poncoba'an.

1 Petrus 2:1

Obai nantai, kaitn gola' botongga'cam molabuhan boko kojahatan. Jangan bulah kotumbukan monipu urakng bukai. Jangan pompadah boi' hati. Jangan tungi. Jangan mongonjaha'i urakng bukai.

1 Petrus 4:2

Kaitn molabuhan nantai oca' somanah kaitn ija' hidup di dunia ni'in, kaitn co monuruti kohonda' dunia, apo kaitn monuruti kohonda' Allah.

1 Petrus 5:1

Ko somuo ponotua' jomaat di antaro kaitn aku moonju' nosihat ni'in: Aku ninam ponotua' inyo momimpitn kolompok urakng pocayo samo sama'an kaitn. Agatn matoku siku', aku udah moniant Kristus mondorita'. Huatan nononyo Kristus paca'an datakng lalu monunju'an obai Sionam inyo bokuaso. Timpu nantai, aku pan tuyut dapat komulia'an jam. Jadi, aku minto kotakng sangant:

1 Petrus 5:12

Aku monulis surat singkat ni'in di tulukng Silas. Io nam somadikan, somadikan soiman inyo sotia. Aku monulis surat ni'in pakai' momadahi huatan moonji'i somangant ko kaitn. Aku pan honda' oca' kaitn yakitn obai isi suratku ni'in bondar-bondar mongona'i koboi'an Allah. Kaitn gola' totap hidup dalapm koboi'an-Nyo nantai.

2 Petrus 1:6

Lopas nian, kaitn gola' bousaha kondalian diri. Lopas nantai, kaitn totap kuat dalapm mohadapi pondorita'an. Lopas nian, kaitn hidup monyonangan Allah.

Wahyu 1:9

Aku, Yohanes, somadikan kaitn inyo sonasib agatn kaitn, inyo bosamo ajab sonsaro agatn warga Koraja'an Allah, huatan bosamo botahatn mohadapi ajab sonsaro kapikng monantian Yesus. Aku udah momboritoan Pomandiran doi' Allah ongko boko hal inyo Yesus padahan ko aku. Obai nantaiam, aku dibuakan ko sobuah pulau inyo bodamoan Patmos.

Wahyu 13:10

Sotiap urakng inyo ditontuan Allah pakai' monjadi tawatan, pasti paca'an monjadi tawatan. Sotiap urakng inyo ditontuan pakai' dibunuh agatn podakng, pasti paca'an dibunuh agatn podakng. Jadi, boko urakng inyo pocayo gola' botahatn mohadapi nantai. Sia' gola' pocayo ko Yesus agatn sotia.

Wahyu 22:16

Yesus bopandir, “Aku udah moutus molekat-Ku pakai' momadahannyo ko kaitn mongona'i somuonyo ni'in. Nantai pakai' kopontikan boko jomaat. Aku ninam Koturutan doi' Rajo Daud. Aku ia'an Bintakng Timur inyo torakng nantai.”

Wahyu 3:10

Kaitn udah monaati porintah-Ku pakai' botahatn dalapm mohadapi ajab sonsaro. Obai niannam, Aku paca'an molinduki kaitn doi' masa kosusahan inyo paca'an monimpa soluruh dunia. Hal nantai tojadi pakai' mouji somuo monsio inyo bodiapm di bumi.