Ibrani 11:32 - Porjanjian Boharu Torjomahan Baso Dilakng Soari-ari

³² Ija' banya' agi' urakng inyo ulih aku sobut'an. Apo watunyo kinyo cukup pakai' bopandir mongona'i Gideon, Barak, Simson, Yefta, Daud, Samuel, ongko boko nabi.

Ibrani 11:32 ပူးပေါင်းရင်းမြစ်များ

Matius 5:12

Joman komai, boko nabi Allah pan dipoulahan sama'an nantai jam. Jadi, rindakng-rigahcam obai kaitn paca'an bodapat upah bosar di sorugo!”

Lukas 13:28

Watu nian, kaitn tajahan moniant angki-bayatn kaitn Abrahapm, Ishak, ongko Yakub huatan somuo nabi di dalapm Koraja'an Allah di sorugo, apo kaitn paca'an ditikapan ko noraka. Di santai kaitn tajahan monangis huatan monggorit'an gigi obai kotakng ajab sonsaro.

Lukas 16:31

Apo Abrahapm bopandir, ‘Aman boko buku Musa huatan boko nabi kinyo cukup pakai' bulah sia' tongga' bulah dosa huatan hidup monyonangan hati Allah, pasti sia' pan paca'an kinyo pocayo biar pan siku' urakng hidup agi' doi' komatian.’ ”

Yohanes 21:25

Ija' ado banya' hal inyo bukai dilabuhan Yesus. Soandainyo somuo hal nantai ditulis sobuti' nyombuti', aku bopikir co paca'an cukup tompat di soluruh bumi pakai' tulisan somuo buku nantai.

Kisah Boko Rasul 10:43

Pado joman komai, boko nabi jam momadahan mongona'i Sio obai sia' monulis mongona'i Sio, ia'an Rajo Inyo Dijanjian Allah. Sia' monulis obai Sio ado kuaso pakai' moamputi boko dosa somuo urakng inyo pocayo agatn Sio.”

Kisah Boko Rasul 13:20

Somuo nantai bolansukng somanah ompat ratus lima' puluh tohutn. Lopas nantai, Allah moangkat boko hakipm pakai' momimpitn sia'. Ubo niannam caronyo sampai hakipm toahir, ia'an Nabi Samuel.

Kisah Boko Rasul 3:24

Somuo nabi bukai pan udah momboritoan mongona'i boko kojadian inyo tojadi joman ni'in, tomansu' Nabi Samuel huatan somuo nabi bukai lopas jadi Samuel.

Roma 3:5

Apo sama'an apo aman ado urakng inyo monggunoan pomikiran monsio, ongko bopandir sama'an ni'in, “Timpu kito jahat, hal nantai monunju'an obai Allah bondar. Jadi, aman Allah mohukupm kito, rotinyo Allah kinyo adil, pan?”

Roma 4:1

Jadi, apo inyo ulih kito pandiran mongona'i Abrahapm, angki-bayatn kito? Sama'an apo caronyo io monjadi bondar di hadapan Allah?

Roma 6:1

Aman sama'an nian, apo inyo ulih kito pandiran? Apobai kito ulih hala mombulah dosa oca' Allah mongkitn monunju'an koboi'an-Nyo ko kito?

Roma 7:7

Aman sama'an nian, apo inyo ulih kito pandiran? Apobai Hukupm Torat nantai jahat? Samo sokali cado! Sobali'nyo, justru Hukupm Torat mongajar aku mongona'i dosa. Contohnyo: Ado porintah ni'in dalapm Hukupm Torat: “Jangan mohonda'i umputn urakng bukai!” Doi' nantai, aku tohu kohonda' sama'an nantai ia'an dosa.

Yakobus 5:10

Boko somadikan, turuticam toladatn boko nabi. Tuhatn moutus sia' pakai' momadahan boko posatn-Nyo. Sia' sonsaro obai molabuhan tugas nantai. Apo, sia' totap sabar botahatn.

2 Petrus 1:21

Obai, boko nabi co kalo monyampaian pomandiran obai kohonda' sia'. Sia' monyampaian Pomandiran Allah obai Roh Allah ado di dalapm diri sia'.

2 Petrus 3:2

Aku honda' oca' kaitn moingant pomandiran inyo komai udah dipandiran doi' boko nabi Allah, huatan jam oca' kaitn moingant apo inyo boko rasul udah sampaian ko kaitn, ia'an boko porintah doi' Yesus Kristus, Ponyolamant huatan Tuhatn pucu' kito.