Ibrani 1:2 - Porjanjian Boharu Torjomahan Baso Dilakng Soari-ari

² Apo, watu ari-ari toahir ni'in Allah bopandir ko kito molalu'i Ana'-Nyo. Allah udah monotap'an Ana'-Nyo inyo bohak momuku'i somuo hal. Molalu'i Sio, Allah mombulah sogolintaran alapm.

Ibrani 1:2 ပူးပေါင်းရင်းမြစ်များ

Matius 13:39

Musuh inyo moabur bonih solalakng nantai monggambaran Rajo Sitatn. Watu bohanyi nantai monggambaran ahir joman. Ongko boko urakng bohanyi nantai monggambaran boko molekat.

Matius 17:5

Pontongahan io bopandir nantai, sopongirap ado awatn inyo torakng turutn monungkau'i sia' somuo. Allah bopandir doi' awatn nantai, “Ni'innam Ana'-Ku inyo Ku kasihi. Io monyonangan hati-Ku. Pondinga'ancam pomandiran-Nyo!”

Matius 21:38

Apo, pas boko potani ponyewa nantai moniant ana' urakng umputn kobutn tongahan datakng, sia' bohoupm agatn siku'-monyiku', ‘Io nian ia'an ahli waris puku' kobutn ni'in nononyo io monjadi urakng umputn kobutn ni'in aman bopainyo udah mati. Mara, kito mombunuh io oca' warisan kobutn ni'in paca'an monjadi umputn kito!’

Matius 26:63

Apo Yesus bodiapm mo. Lalu Imam Agukng nantai botakutn agi', “Demi Allah inyo hidup, aku monyiuh Duatn pakai' monimbas koi. Kata'an Duatn Rajo inyo Dijanjian Allah inyo kito sobut ‘Mesias’? Kata'an Duatn Ana' Allah ai?”

Matius 28:18

Yesus mohampiki sia' huatan bopandir, “Allah udah moonji'i kuaso ko Aku di sorugo ongko di bumi.

Matius 3:17

Lalu todinga' saro Allah doi' sorugo mongatoan, “Ninam Ana'-Ku inyo Ku kasihi. Io monyonangan hati-Ku.”

Markus 1:1

Ninam Kabar Boi' mongona'i Yesus Kristus, Ana' Allah.

Markus 12:6

Apo, puku' kobutn nantai ija' ado siku' urakng agi', ia'an ana'nyo siku' inyo kotakan kokidahnyo. Io bopandir dalapm hatinyo, ‘Pasti am boko potani nantai tajahan morogo'i ana'ku.’ Jadi, koponsuahannyo, io monyiuh ana'nyo ko sia'.

Markus 12:7

Apo, boko potani ponyewa nantai bopandir di antaro sosamo sia', ‘Io nantai nononyo inyo monjadi puku' kobutn ni'in aman bopainyo udah mati. Mara am, kito mombunuh io oca' kobutn ni'in monjadi umputn kito!’

Yohanes 1:10

Sio ado di dunia. Dunia dipulah molalu'i Sio. Apo, boko urakng di dunia kinyo mongonal Sio.

Yohanes 1:14

Pandir Allah nantai udah monjadi siku' monsio. Sio diapm di antaro kito. Huatan kito udah moniant komulia'an-Nyo. Ia'an, komulia'an-Nyo sobagai Ana' tunggal doi' Allah Bopai. Sio monunju'an ko kito somuo koboi'an Allah huatan somuo inyo bondar mongona'i Allah.

Yohanes 1:3

Allah mombulah somuo la'apo pan molalu'i Sio. Conyiant Sio, conyiant ado la'apo pan inyo ulih dipulah.

Yohanes 13:3

Apo, Yesus tohu obai Allah Bopai udah monyorahan somuo kuaso ko Io. Sio tohu jam obai Sio datakng doi' Allah huatan paca'an bobali' ko Sio jam.

Yohanes 13:32

Aman Allah dimuliaan molalu'i Io, jadi Allah siku' paca'an momuliaan-Nyo molalu'i diri-Nyo siku'. Huatan Allah paca'an hagar molabuhan nantai.

Yohanes 15:15

Aku co ija' monyobut kaitn ‘hulutn’. Obai, hulutn co tohu la'apo inyo dikorojoan habakngnyo. Apo, Aku monyobut kaitn ‘kawal’. Obai, Aku udah momadahannyo ko kaitn boko la'apo pan inyo Kudinga' doi' Bopai-Ku.

Yohanes 16:15

Somuo umputn Bopai nian umputn-Ku jam. Nantai sobabnyo Aku bopandir: Sio paca'an momboritoannyo ko kaitn pomandiran inyo Sio torima' doi' Aku.”

Yohanes 17:2

Bopai udah moonji'i kuaso ko io di pucu' somuo urakng. Duatn molabuhan nantai oca' Io ulih moonji'i kohidupan kokal ko somuo urakng inyo pocayo ko io, ia'an somuo urakng inyo Duatn onju' ko io.

Yohanes 3:16

Obai, Allah kotakng mongasihi boko urakng di dunia ni'in. Sampai, Sio udah monyorahan Ana'-Nyo inyo tunggal. Allah molabuhan nantai, oca' somuo urakng inyo pocayo ko Ana'-Nyo, sia' co bonaso di noraka, apo sia' dapat hidup somanah-manahnyo di sorugo.

Yohanes 3:25

Boko murid Yohanes botikakng agatn siku' urakng Yahudi mongona'i poraturan agama mongona'i pomborosihan.

Yohanes 5:26

Obai, Bopai moonji'i kuaso ko Ana' pakai' moonji'i hidup, samo sama'an Sio ado kuaso pakai' moonji'i hidup.

Yohanes 5:27

Sio udah moonji'i kuaso ko Io pakai' mohakipi, obai Io nam inyo disobut Ana' Monsio.

Yohanes 9:29

Koi tohu obai Allah udah bopandir ko Musa. Apo koi co tohu doi' mono asal Urakng nantai.”

Kisah Boko Rasul 10:36

Kaitn tohu obai Allah udah monyampaian Kabar Boi' ko koi banso Yahudi. Joman komai, Allah bojanji Sio paca'an moutus siku' urakng Rajo. Rajo nantai paca'an mombuka' jalatn oca' urakng ulih bodamai agatn Allah. Yesus nantai Rajo Inyo Dijanjian Allah. Yesus nantai Tuhatn inyo puku' somuo urakng di dunia.

Kisah Boko Rasul 2:17

Allah bopandir, ‘Watu ahir joman, Aku paca'an moonji'i Roh-Ku ko somuo urakng. Ongko boko ana' kaitn, lolaki huatan botina' tajahan monyampaian posatn-Ku ko boko urakng. Boko bujakng muda' kaitn paca'an bodapat boko poniant'an, Boko urakng tuho kaitn paca'an bodapat boko mimpi husus.

Roma 8:17

Nah, aman kito ni'in poana'an-Nyo, jadi kito pan tajahan monorima' somuo borokat inyo Sio sodia'an pakai' poana'an-Nyo. Samo sama'an Kristus mondapat'an borokat doi' Allah, kito pan tajahan mondapat'an borokat. Masudnyo, aman kito mondorita' samo sama'an Kristus, kito tajahan monorima' kohidupan inyo mulia samo sama'an Sio jam.

1 Korintus 2:7

Inyo koi ajaran nantai kopintar-corodi'an Allah. Sokomai, boko urakng kinyo tohu bondar mongona'i kopintar-corodi'an Allah nantai. Kopintar-corodi'an Allah nantai botapu'. Apo sobolupm Allah bulah dunia ni'in, Sio monyiap'an kopintar-corodi'an nantai. Sio molabuhan nantai, oca' kito pan monorima' komulia'an doi' Sio.

1 Korintus 8:6

Apo pakai' kito, bayo ado siku' mo Allah, ia'an Allah Bopai kito. Sio inyo monjadian somuo hal. Kito hidup pakai' monyombah Sio. Pakai' kito, bayo ado siku' Tuhatn, ia'an Yesus Kristus. Somuo hal dipulah molalu'i Yesus Kristus. Kito bodapat hidup inyo sobondarannyo obai Yesus Kristus.

Galatia 4:4

Apo topat watu inyo ditontuan Allah, Sio moutus Ana'-Nyo, ko dunia ni'in inyo lahir doi' siku' urakng botina'. Yesus monaati somuo porintah ongko poraturan Allah inyo ditulis Musa dalapm buku Hukupm Torat.

Efesus 1:10

Ninam hajat Allah nantai: watu inyo udah ditontuan-Nyo, Sio paca'an mombulah somuo hal di sorugo ongko di bumi monjadi sodoirmo huatan Kristus bokuaso di pucu' somuonyo.

Efesus 3:9

Allah pan moutusku pakai' monyatoan ko somuo urakng mongona'i roncana-Nyo pakai' boko urakng bukainyo urakng Yahudi. Doi' awal-mulonyo, Allah inyo mombulah somuo hal bolupm momandirannyo ko monsio mongona'i roncana-Nyo nantai.

Ibrani 1:5

Kito tohu nantai obai Allah kinyo kalo bopandir sama'an ni'in ko siku' molekat pan, “Kolai ia'an Ana'-Ku. Sari ni'in Aku udah monunju'an obai Aku ninam Bopai Kolai.” Allah pan kinyo kalo bopandir sama'an ni'in mongona'i ko siku' molekat, “Aku tajahan monjadi Bopai-Nyo, ongko Io tajahan monjadi Ana'-Ku.”

Ibrani 1:8

Apo Allah bopandir dinga' ni'in mongona'i Ana'-Nyo, “Duatn, oi Allah, momorintah di pucu' tahta Duatn somanah-manahnyo. Duatn momorintah agatn adil di dalapm Koraja'an Duatn.

Ibrani 11:3

Obai kito pocayo, jadi kito mongoroti Allah mombulah sogolintaran alapm ni'in agatn momakai pomandiran-Nyo ja'am. Jadi, somuo inyo kito tiat, tojadi doi' somuo hal inyo kinyo ulih di tiat.

Ibrani 2:3

pasti kito tajahan dihukupm aman kito kinyo monaati pomandiran Allah mongona'i kosolamant'an. Tuhatn Yesus siku' inyo potamo monyampaian Pomandiran Allah nantai. Lalu, boko urakng inyo mondinga'an lansukng doi' Sio, sia' monyampaiannyo sampai kito monjadi yakitn mongona'i nantai.

Ibrani 3:6

Apo Kristus sotia sobagai Ana' inyo bokuaso agatn rumah Allah, ia'an kito. Kito ia'an rumah-Nyo aman kito totap kuat pocayo ko Yesus huatan yakitn moharap'an agatn somuo hal inyo paca'an dionju' Sio ko kito nononyo. Somuo hal nantai mombulah hati kito rindakng.

Ibrani 4:14

Obai nantai, kito gola' kuat agatn kopocaya'an kito. Obai, kito ado Imam Agukng inyo kotakng bokuaso, ia'an Yesus, Ana' Allah. Sio udah mansu' sorugo, monjadi porontaro pakai' kito di hadapan Allah.

Ibrani 5:8

Biar pan Yesus nantai Ana' Allah, Sio bolajar monaati Allah watu Sio mondorita'.

Ibrani 7:28

Poraturan dalapm Hukupm Torat mombulah boko urakng inyo kinyo sompurna diangkat monjadi imam agukng. Apo lopas Hukupm Torat, ado sumpah inyo dipandiran Allah. Agatn sumpah nantai, Allah moangkat Ana'-Nyo monjadi Imam Agukng inyo sompurna pakai' somanah-manahnyo.

Ibrani 7:3

Solaitn nantai, conyiant kisah dalapm Buku Suci mongona'i indai, bopai, angki-bayatnnyo. Kolahirannyo huatan komatiannyo kinyo disobutan. Jadi, imam Melkisedek ado kosama'annyo agatn Ana' Allah. Io monjadi imam pakai' somanahnyo.

Ibrani 9:26

Soandainyo sama'an nian, boroti Sio gola' opat ajab sonsaro doi' mulo dunia ni'in dipulah. Apo inyo nyata, watu ni'in diari-ari toahir ni'in, Sio datakng sokali mo pakai' mohapus dosa agatn caro momposombahan diri-Nyo.

1 Petrus 1:20

Allah udah momilih Sio sobolupm dunia dipulah. Apo, hoyu' ari toahir ni'in, Kristus udah datakng monyatoan diri-Nyo. Sio molabuhan nantai pakai' kaitn.

2 Petrus 3:3

Inyo palikng utamo gola' kaitn kotohu'i ia'an: Pado ahir joman, paca'an ado boko urakng inyo gala' mohayam kaitn. Sia' nantai dikuaso'i hawa napsu inyo jahat.

Yudas 1:18

Kato boko rasul nantai, “Timpu ahir joman, paca'an ado boko urakng inyo hala mohayam kaitn. Boko urakng nantai dikuaso'i kohonda' bukakng inyo jahat.”