Filipi 4:8 - Porjanjian Boharu Torjomahan Baso Dilakng Soari-ari

⁸ Ahirnyo, boko somadikan ku, kaitn gola' hala momikiran mongona'i boko hal inyo bondar, inyo patut dirogo'i, inyo adil, inyo borosih doi' kojahatan, inyo manis, inyo loma' didinga'. Pokoknyo, pikiran cam mongona'i la'apo pan inyo boi' ongko patut dipuji.

Filipi 4:8 ပူးပေါင်းရင်းမြစ်များ

Matius 22:16

Jadi, sia' monyiuh boko murid sia' huatan boko urakng inyo mondukukng Rajo Herodes botula' ko Yesus. Boko urakng nantai bopandir ko Yesus, “Guru, koi tohu Duatn urakng inyo jujur. Duatn mongajar agatn jujur mongona'i caro hidup sosuai agatn porintah Allah. Duatn co bopihak ko boko urakng totontu. Obai nantai, Duatn co gola' agatn sopo pan.

Markus 6:20

obai Herodes molinduki Yohanes. Obai Herodes gola' agatn Yohanes obai io tohu Yohanes nam urakng inyo husus dipakai Allah ongko hidup bondar di hadapan Allah. Sotiap kali Herodes mondinga' Yohanes, hatinyo hala golisah, apo io mooso sonang mondinga'an io.

Lukas 16:15

Apo Yesus bopandir ko sia', “Kaitn bousaha oca' di hadapan urakng bukai kaitn kotiat'annyo boi' huatan hala bondar. Apo Allah tohu isi hati kaitn inyo sobondarnyo jahat. Banyaꞌ hal inyo dirogo'i ulih monsio, kinyo dirogo'i ulih Allah.

Lukas 2:25

Timpu nantai di kota Yerusalem ado urakng damonyo Simeon. Sio ni'in urakng onsi', inyo hala mohormati huatan monaati Allah. Sio monanti Rajo Inyo Dijanjian Allah nononyo datakng moonji'i kodamaian ko banso Israel. Roh Allah monyoroto'i Simeon.

Lukas 23:50

Ado siku' urakng bodamo Yusuf, inyo boasal doi' kota Arimatea di doerah Yudea. Io urakng onsi' inyo dihormati urakng. Io tongahan monanti kodatakan Rajo Inyo Dijanjian Allah. Biar pan io anggota kolompok pomimpitn urakng Yahudi inyo kotakng pontikng, io co sotuju agatn koputusan huatan kolaku'an sia' nantai.

Yohanes 7:18

Urakng inyo mongajar agatn pomandiran doi' dirinyo siku', io bayo goyap kohormatan pakai' dirinyo siku'. Apo urakng inyo goyap kohormatan pakai' Sio inyo moutusnyo, urakng nantai bujur bondar. Io kinyo monipu urakng bukai.

Kisah Boko Rasul 10:22

Sia' bopandir, “Koi disiuh ko si'itn ulih siku' urakng powira tontara Romawi. Damonyo Kornelius. Io nantai urakng onsi'. Io udah monjadi urakng inyo monyombah Allah. Somuo urakng Yahudi mohormatinyo. Sokomai, ado molekat Allah datakng ko io. Molekat nantai monyiuh Kornelius pakai' mohundakng duatn datakng ko rumahnyo, oca' io ulih mondinga' ajaran doi' duatn.”

Kisah Boko Rasul 22:12

Di santai, ado siku' urakng inyo bodamo Ananias. Io siku' urakng inyo kotakan sotia monaati boko poraturan Allah inyo ditulis Musa dalapm Hukupm Torat. Somuo urakng Yahudi inyo tinggal di su'utn mohormati io.

Kisah Boko Rasul 6:3

Jadi boko somadikan, pilihcam tujuh urakng doi' antaro kaitn. Kotujuh urakng nantai gola' dikonal sobagai urakng inyo pintar-corodi' agatn boi' hati. Roh Allah gola' ado pado sia' nantai jam. Koi paca'an monyorahan polayatan ni'in ko sia'. Sia' nanam inyo mombagian pomakatn sotiap arinyo.

Roma 13:13

Kito gola' hidup agatn caro inyo sopatn sama'an urakng inyo hidup dalapm torakng. Jangannam kito ruah-runsakan ongko hala komabu'an. Jangannam kito bulah dosa kojahatan ongko tuyut kohonda' bukakng inyo jahat. Janganam kito tungi ongko hala bokolohi.

Roma 13:3

Apo, urakng inyo bulah koboi'an jangan gola'am dihukupm pomorintah. Bayo urakng inyo bulah kojahatan harus gola'. Kata'an kolai honda' hidup co gola' agatn pomorintah bai? Bulah koboi'an, lalu pomorintah tajahan momuji kolai.

Roma 14:18

Urakng inyo molayati Kristus agatn caro hidup ubo nantai, io monyonangan Allah ongko dihormati monsio.

Roma 2:29

Sobali'nyo, urakng inyo bondar-bondar Yahudi ia'an urakng inyo hatinyo bojiwa Yahudi; huatan urakng inyo bondar-bondar disunant ia'an sunant di hati inyo dikorojoan ulih Roh Allah, bukainyo ditulis dalapm buku. Urakng sama'an nian monorima' pujian doi' Allah, bukainyo doi' monsio.

1 Korintus 4:5

Obai nianam, jangan kaitn monilai boko urakng bukai. Tantian sampai Yesus datakng. Sio paca'an monoraki la'apo inyo diombakan di dalapm potakng. Sio paca'an moniant'an somuo pikiran inyo ado dalapm hati sotiap urakng. Ongko, Allah inyo paca'an momuji sia' sosuai agatn polayatan sia' siku'-monyiku'.

2 Korintus 13:7

Koi bodoa ko Allah oca' kaitn jangan bulah kojahatan. Nantai bukainyo pakai' mombutian obai koi memang lulus ujian sobagai rasul Kristus. Nantai bukainyo tujuan koi. Tujuan koi ia'an oca' kaitn bulah koboi'an, monjumpati ajaran inyo bondar. Ongko biar pan kotiat'annyo koi co lulus ujian kinyo apo-apo.

2 Korintus 6:8

Kadakng urakng mohormati koi, kadakng sia' mohanyam koi. Kadakng urakng momuji koi, kadakng sia' mongonjaha'i koi. Koi hala bopandir bondar, apo ado inyo bopikir obai koi monipu urakng.

2 Korintus 8:18

Kinyo haja' Titus, koi pan moutus siku' somadikan koi ko kaitn. Somuo jomaat mohormati io obai io monulukng dalapm polayatan momboritoan Kabar Boi'.

2 Korintus 8:21

Koi honda' molabuhan boko la'apo pan agatn jujur, bukainyo bayo di hadapan Tuhatn, apo di hadapan monsio jam.

Galatia 5:22

Apo aman kaitn hidup sosuai agatn kohonda' Roh Allah, ia'an: hala mongasihi, rindakng-rigah, hidup sonang dalapm hati, sabar, gala' monulukng, gala' bulah koboi'an, sotia,

Efesus 4:25

Obai nantai, jangan tumbukan. Kaitn gola' momadahan inyo bondar ko boko somadikan inyo bukainyo. Obai, kito sosamo anggota umant Allah.

Efesus 5:9

Obai ni'inan, hasil doi' caro hidup dalapm torakng nantai: urakng nantai bulah koboi'an, bondar di hadapan Allah, huatan moikuti ajaran inyo bondar.

Efesus 6:14

Sama'an ni'in caronyo kaitn ulih totap kuat botahatn: Kaitn gola' mongobat punggukng kaitn agatn kosotiaan ko Allah ongko momakai kotulusan sobagai baju bosi kaitn.

Filipi 3:1

Ahirnyo, boko somadikanku, kaitn sonang-nyamancam di dalapm Tuhatn. Bilo apo mo aman aku monulis agi' mongona'i boko hal ni'in ko kaitn. Boko hal ni'in monjago oca' kaitn totap hidup sosuai agatn kohonda' Tuhatn.

Kolose 4:5

Kaitn gola' hidup agatn somuo kopintar-corodi'an tohadap boko urakng inyo bolupm pocayo ko Yesus. Pakaicam sotiap kosompatan inyo ado pakai' molabuhan nantai.

1 Tesalonika 4:12

Jadi, kaitn kinyo paca'an hidup bogantukng ko urakng bukai. Aman kaitn hidup agatn caro sama'an nantai, boko urakng inyo bolupm pocayo ko Yesus paca'an mohormati kaitn.

1 Timotius 2:2

tomansu' boko rajo huatan somuo pomimpitn. Bodoacam oca' timpu kito hidup taat ko Allah huatan bulah koboi'an ko somuo urakng, kito ulih hidup agatn tenang huatan sonang-asau.

1 Timotius 3:11

Ubo nian jam, bini boko diakon gola' hidup agatn caro inyo boi'. Sia' gola' tohormat. Sia' co ulih hala bojahat urakng. Sia' gola' mongondalian diri. Sia' pan gola' dapat dipocayo'i dalapm somuo hal.

1 Timotius 3:4

Io gola' moatur koluarganyo agatn boi'. Io gola' mondidik poana'annyo sampai sia' monaati huatan mohormati io.

1 Timotius 4:12

Jangan sampai ado urakng inyo mohayam kolai obai kolai ija' muda'. Kolai gola' monjadi contoh pakai' boko urakng pocayo, dalapm pomandiran huatan kolaku'an, dalapm mongasihi urakng bukai huatan sotia ko Tuhatn. Hidup co bulah dosa.

1 Timotius 5:10

Botina' balu nantai gola' dikonal sobagai urakng inyo hala bulah koboi'an. Contohnyo: io mombosaran poana'annyo agatn caro boi', io gola' agatn coraca'an bosodia moonji'i koluntukan, io gola' rondah hati molayati boko urakng pocayo huatan mombasu'i kaki sia', io gala' monulukng urakng inyo moalapi kosusahan. Io gola' moutamoan boko porbuatan boi' sama'an nantai dalapm kohidupannyo.

1 Timotius 5:2

Padahicam boko botina' inyo lobih tuho doi' kolai nantai samo sama'an indai kolai siku'. Ubo nian jam agatn botina' inyo lobih muda' doi' kolai, kolai gola' agatn hati inyo boi' moanggap sia' samo sama'an adikng kolai siku'.

Titus 1:8

Apo, io agatn coraca'an ulih moonji'i tumpakan ongko gala' bulah koboi'an. Io gola' pintar-corodi', hidup bondar di hadapan Allah, co bulah dosa, ongko ulih mongondalian dirinyo.

Titus 2:14

Yesus monyorahan diri sampai mati. Agatn caro nantai, Sio mombebasan kito doi' boko kojahatan. Sio jam bulah kito borosih doi' boko dosa kito oca' kito monjadi boko urakng umputn Sio siku', ia'an boko urakng inyo bondar-bondar totap hala bulah koboi'an.

Titus 2:2

Ajaricam boko lolaki inyo udah tuho oca'nyo ulih monahan diri sia'. Sia' gola' sopatn ongko pintar-corodi'. Sia' gola' totap pocayo ko Yesus, mongasihi Allah ongko urakng bukai, huatan botahatn dalapm mohadapi ajab sonsaro.

Titus 2:7

Titus, kolai gola' bulah koboi'an oca' kolai monjadi contoh pakai' somuo sia'. Sotiap kali kolai mongajar, ajaricam agatn hati inyo bujur bondar. Ajaricam agatn caro inyo cucu' pakai' dihormati.

Titus 3:14

Bukainyo bayo nantai, apo somuo urakng inyo pocayo di pulau Kreta nantai gola' bolajar bulah koboi'an. Sia' gola' bousaha pakai' molabuhan nantai oca' sia' ulih monulukng urakng bukai inyo ado kopontikannyo. Aman sia' molabuhan nantai, hidup sia' paca'an boguno.

Ibrani 11:2

Allah sonang agatn boko urakng doi' joman komai obai sia' pocayo ko Sio.

Ibrani 13:18

Hala bodoa cam pakai' koi. Koi hala honda' hidup bondar. Jadi, koi yakitn obai hati koi borosih dihadapan Allah.

Yakobus 1:27

Apo ninam sombayakng inyo monyonangan Allah Bopai kito. Ia'an io borotian pondorita'an boko bobia' kumang ongko boko urakng balu janda, lalu monulukng sia'. Io pan monjago diri oca' boko hal jahat di dunia ni'in kinyo mompongaruhi io.

Yakobus 3:17

Apo boko urakng inyo ado hikmat doi' Allah, caro hidup sia' sama'an ni'in: Inyo palikng pontikng sia' hidup agatn caro inyo borosih. Sia' gala' agatn podamaian. Sia' lomah-lombut huatan hatinyo tobuka' pakai' monuruti kohonda' urakng bukai. Sia' monunju'an kasih sayangnyo ko urakng bukai huatan hala bulah koboi'an. Sia' co momihak ko boko urakng totontu, apo hala botorus torakng.

1 Petrus 1:22

Obai kaitn monaati kobondaran, kaitn udah monjadi suci di hadapan Allah. Jadi, kaitn dapat mongasihi somadikan kaitn inyo sosamo pocayo, agatn hati tulus. Obai nantai, kaitn gola' bobondar hala mongasihi agatn soponuh hati.

1 Petrus 2:12

Kaitn gola' hidup agatn caro inyo boi' di antaro boko urakng inyo bolupm mongonal Allah. Agatn ubo nantai, biar pan sia' mongatoan kaitn jahat, sia' tajahan moniant porbuatan kaitn inyo boi'. Akibatnyo, sia' pan tajahan momuliaan Allah watu Sio datakng nononyo.

1 Petrus 4:8

Inyo kotakan pontikng, kaitn gola' bobondar hala mongasihi. Obai, urakng inyo mongasihi ulih moamputi boko kosalahan.

2 Petrus 3:1

Boko somadikan inyo ku kasihi, ni'in udah surat inyo koduo, inyo ku tulis ko kaitn. Di dalapm koduo surat nantai, aku bousaha monyadaran kaitn pakai' bopikir agatn caro inyo bondar.

1 Yohanes 3:18

Poana'anKu! Jangannam kito bayo bopandir obai kito mongasihi urakng bukai damo bopandir mongona'i kasih ja'am. Apo kohonda'nyo kito bondar-bondar mongasihi agatn porbuatan ongko dalapm kobondaran.

1 Yohanes 3:3

Somuo urakng inyo yakitn moharapan obai Sio paca'an mombulah nantai tojadi, sia' monjago diri oca' co bulah dosa samo sama'an Sio co bulah dosa.

1 Yohanes 4:1

Boko somadikanku inyo tokasih, udah ado banya' nabi palsu di dunia ni'in. Obai nantaiam, jangannam pocayo agatn somuo urakng inyo mongatoan obai Roh Allah ado di inyo. Apo poriso'icam lobih holu ajaran sia' nantai pakai' mongotohu'i aman roh inyo ado di inyo boasal doi' Allah kata'an cado.