Filipi 3:6 - Porjanjian Boharu Torjomahan Baso Dilakng Soari-ari

⁶ Aman urakng bukai honda' momuji diri obai sia' boagama agatn giat, aku bondar-bondar giat ia'an pan komai aku mondorako'i boko urakng inyo pocayo ko Yesus. Aman urakng bukai honda' momuji diri obai sia' hidup agatn caro inyo bondar-bondar monaati Hukupm Torat, aku cuku cacat dalapm monaati Hukupm Torat.

Filipi 3:6 ပူးပေါင်းရင်းမြစ်များ

Matius 23:25

Allah paca'an mohukupm kaitn boko guru agama Yahudi huatan boko urakng Farisi. Kaitn pompadah boi' samo sama'an cangkir ongko pirikng inyo kaitn borosihi bayo dibuai luarnyo mo. Apo di dalapm hati kaitn tama' huatan jahat.

Matius 5:20

Dinga'anbo ni'in: Kaitn gola' hidup bujur bondar di hadapan Allah, lobih daripado boko guru agama Yahudi, huatan lobih daripado pomimpitn agama Yahudi doi' kolompok Farisi. Aman cado, kaitn kinyo paca'an mansu' ko dalapm Koraja'an Sorugo.”

Lukas 1:6

Siaꞌ duo laki-bini hidup monyonangan hati Allah. Sia' monuruti somuo porintah ongko poraturan Allah, agatn soponuh hati.

Kisah Boko Rasul 21:20

Mondinga' hal nantai, somuo ponotua' momuji Allah. Ongko sia' bopandir ko Paulus, “Somadikan, kolai siku' ulih moniant udah ado ribuan urakng Yahudi inyo pocayo agatn Yesus. Sia' somuo rajitn monaati boko porintah Allah inyo ditulis Musa dalapm Buku Hukupm Torat.

Kisah Boko Rasul 22:5

Imam Agukng huatan somuo kolompok pomimpitn agama inyo kotakan bokuaso ulih momadahan obai hal nantai bondar. Obai aku mondapat'an boko surat doi' sia' inyo ditujuan ko boko pomimpitn boko rumah sombayakng agama Yahudi di kota Damsyik. Di kota nantai ado jam boko urakng inyo jumpat boko ajaran Tuhatn Yesus. Boko surat nantai moonji'i hak oca' aku ulih monangkap sia'. Hajatku honda' mombaba' sia' bobali' ko kota Yerusalem ni'in, oca' sia' dihukupm.

Kisah Boko Rasul 26:5

Sia' udah manah konal agatn aku. Jadi, aman sia' honda', sia' ulih mongisahan mongona'i caro hidupku komai. Aku tomansu' kolompok urakng Farisi, ia'an kolompok urakng inyo palikng taat molabuhan somuo poraturan agama kito.

Roma 7:9

Komainyo aku hidup kinyo bohukupm Torat. Apo, pas-udah aku tohu porintah nantai, kuaso dosa ulih bokorojo mombulah aku somongkitn molawatn Allah samo halnyo kuaso dosa nantai mula'i hidup

1 Korintus 10:32

Jangan molabuhan sosuatu inyo monyinggukng hati urakng bukai, boi' nantai urakng Yahudi, sama'an nian jam urakng Yunani huatan boko urakng dalapm kolompok urakng inyo pocayo ko Yesus.

1 Korintus 15:9

Obai, di antaro somuo rasul, aku inyo palikng nyiant pasalnyo. Aku kinyo cucu' disobut rasul, obai komainyo aku mondorako'i boko urakng inyo pocayo ko Yesus.

Filipi 2:15

Agatn ubo nantai, kaitn hidup agatn caro inyo bondar ongko borosih. Kaitn hidup ubo poana'an Allah inyo culih disalahan biar pan kaitn ado di tongah-tongah boko urakng inyo jahat ongko co mongonal caro hidup inyo bondar. Jadi, kaitn monjadi torakng bagi sia', samo sama'an boko bintakng inyo bocohayo di dunia ni'in.

Filipi 3:9

ongko oca' aku ulih bosatu agatn Sio. Aku monjadi bondar di hadapan Allah bukainyo obai usaha ku siku' monaati Hukupm Torat. Aku monjadi bondar obai aku pocayo agatn Kristus. Allah inyo molabuhan nantai. Sio mombulah monsio monjadi bondar di hadapan-Nyo aman sia' pocayo.

1 Timotius 1:13

Padohal, komai aku ninam urakng inyo mohayam Sio. Aku mondorako'i somuo urakng inyo pocayo ko Sio. Boko porbuatanku nantai kotakan jahat. Apo Yesus monunju'an kasih-Nyo ko aku. Sio molabuhan nantai obai aku bolupm pocayo ko Sio. Aku bolupm mongotohu'i boko porbuatanku nantai kotakan jahat.