Filipi 3:5 - Porjanjian Boharu Torjomahan Baso Dilakng Soari-ari

⁵ Aku disunant watu ku lahir boumur kodolapatn ari. Aku urakng Israel doi' suku Benyamin. Aku bondar-bondar urakng Ibrani asli. Aman urakng bukai honda' momuji diri obai sia' mongotohu'i Hukupm Torat, aku doi' kolompok Farisi inyo mongotohu'i somuonyo.

Filipi 3:5 ပူးပေါင်းရင်းမြစ်များ

Lukas 1:59

Bobia' nantai boumur dolapatn ari, datakam siaꞌ somuo pakai' tuyut acara bosunant. Boko dongan somadikan honda' mondamo'inyo Zakharia, samo agatn damo bopainyo,

Lukas 2:21

Timpu boumur dolapatn ari, bobia' nantai pan disunant ongko didamo'i Yesus. Damo inyo udah dipadahan molekat sobolupm indai-Nyo buntikan.

Lukas 5:38

Anggur inyo boharu gola' disimpatn ko dalapm kantong inyo boharu jam.

Kisah Boko Rasul 22:3

“Aku urakng Yahudi samo sama'an kaitn jam. Aku dilahiran di kota Tarsus di propinsi Kilikia. Apo aku dibosaran di kota Yerusalem ni'in. Tangga'i kocit, aku bolajar boko porintah huatan poraturan Allah inyo ditulis Musa dalapm Hukupm Torat. Guru Bosar Gamaliel inyo mongajar huatan mondidik aku agatn toliti. Ongko, aku sobobondarnyo taat molayati Allah, samo sama'an somuo kaitn ari ni'in jam.

Kisah Boko Rasul 23:6

Paulus udah mongotohu'i di antaro boko pomimpitn inyo hadir, ado inyo doi' kolompok Saduki huatan ado jam inyo doi' kolompok Farisi. Io udah mongotohu'i urakng Saduki kinyo pocayo aman urakng mati paca'an hidup agi'. Sia' jam kinyo pocayo ado boko molekat damo boko roh. Apo urakng Farisi pocayo somuo hal nantai. Obai nantaiam, io mondorah, “Boko somadikan, aku ni'in urakng Farisi. Bopaiku pan urakng Farisi. Aku pocayo obai urakng mati paca'an hidup agi'. Nanam alasan aku diadili ari ni'in!” Pomandiran Paulus bunyi nantai pakai' bulah boko urakng Farisi huatan boko urakng Saduki di santai botikakng. Potomuan sia' nantai monjadi tobagi-bagi.

Kisah Boko Rasul 6:1

Mongkitn manah, mongkitn banya' urakng Yahudi inyo pocayo agatn Yesus. Ado urakng Yahudi inyo pocayo agatn Yesus inyo bobaso Ibrani. Ado jam inyo bobaso Yunani. Inyo bobaso Yunani tungi obai inyo bobaso Ibrani mombagi'i pomakatn sotiap ari ko boko urakng botina' balu kinyo adil. Boko urakng balu inyo bobaso Yunani hala kinyo dionji'i.

Roma 11:1

Aku botakutn: Kata'an Allah udah monula' umant-Nyo urakng Israel bai? Samo sokali cado! Obai aku urakng Israel huatan Allah kinyo monula' ku. Aku doi' koturutan Abrahapm, doi' suku Benyamin.

2 Korintus 11:22

Kata'an sia' momuji diri mongatoan obai sia' nam urakng asli Ibrani? Aku pan urakng asli Ibrani jam! Kata'an sia' doi' banso Israel ai? Aku pan doi' banso Israel jam! Kata'an sia' koturutan Abrahapm ai? Aku pan koturutan Abrahapm jam!