Filipi 3:14 - Porjanjian Boharu Torjomahan Baso Dilakng Soari-ari

¹⁴ Aku samo sama'an urakng dalapm polomba'an inyo bonggidi'an oca' mondapat'an hadiahnyo. Hadiahku ia'an Allah moningkauku pakai' hidup bosamo agatn Sio di sorugo. Nantai ulih tojadi ongkah obai Kristus Yesus.

Filipi 3:14 ပူးပေါင်းရင်းမြစ်များ

Lukas 16:16

Komai urakng bolajar kohonda' Allah doi' boko buku porintah huatan poraturan Allah inyo ditulis Musa dalapm Hukupm Torat. Boko urakng pan bolajar doi' boko buku inyo ditulis boko nabi. Apo, doi' ija' Yohanes Pombaptis mo, borito boi' mongonaꞌi Koraja'an Allah diboritoan, Rajo Inyo Dijanjian Allah udah datakng. Sotiap urakng bousaha koras pakai' mansu' ko dalapm Korajaan-Nyo.

Roma 11:29

Obai, aman Allah bojanji pakai' momilih ongko momborokati monsio, Sio co mombalakan pojanjian nantai.

1 Korintus 9:24

Pasti kaitn tohu obai dalapm potandikan bolapat'an bonggidi'an, somuo sia' tuyut bonggidi'an. Apo bayo siku' inyo bodapat hadiah. Samo sama'an nantai, kaitn gola' bousaha hidup agatn caro inyo monyonangan Allah oca' bodapat hadiah inyo Allah onju'.

2 Korintus 4:17

Pondorita'an inyo koi hadapi watu ni'in bayo somontaromo. Apo hasilnyo koi mondapat'an borokat inyo somanah-manahnyo. Jadi, pondorita'an nantai lompukngmo dibandikan agatn borokat nantai inyo jouh lobih bosar doi' la'apo pan.

Filipi 3:3

Sobondarnyo, umant Allah ia'an kito inyo dibimbikng Roh-Nyo pakai' monyombah Sio. Ni'inan tando ‘sunant’ inyo bondar. Kito bosukur obai Kristus Yesus monyolamant'an kito. Kito co boharap ko boko porbuatan monsio.

Kolose 2:18

Ado urakng inyo pompadah rondah hati huatan monyombah boko molekat. Jangan biaran urakng sama'an nantai bulah kaitn pocayo ajaran inyo salah, sampai kaitn co dapat borokat doi' Allah. Urakng sama'an nantai buhau agatn mongatoan io ado boko poniant'an doi' Allah. Apo sobondarnyo pikirannyo duniawi inyo bulah io buhau.

1 Tesalonika 2:12

Koi hala momadahi ongko hala monguat'an hati kaitn huatan mominto oca' kaitn hidup monyonangan hati Allah. Obai Sio moningkau kaitn pakai' monjadi warga Korajaan-Nyo huatan bodapat komulia'an-Nyo.

2 Timotius 1:9

Allah udah monyolamant'an huatan momilih kito, oca' kito hidup husus pakai' Sio. Sio molabuhan nantai bukainyo obai kito udah bulah koboi'an. Apo obai nantai udah hajat huatan koboi'an-Nyo. Koboi'an nantai Sio onju' molalu'i Kristus Yesus sobolupm dunia ni'in dipulah.

Ibrani 3:1

Obai nantai boko somadikan, inyo ditingkau jam monjadi boko urakng inyo husus umputn Allah, kaitn gola' bondar-bondar momporhatian Yesus inyo kito tuyut'i. Sio diutus Allah. Sio monjadi Imam Agukng kito.

Ibrani 6:1

Obai nantai, mara am kito maju agatn boko ajaran mongona'i Sio inyo mombulah kito lobih botumbuh monjadi dewasa dalapm Kristus. Jangannam kito moulaki agi' boko ajaran dasar, ia'an ajaran obai urakng gola' botongga' molabuhan boko hal inyo pocumo huatan pocayo cam ko Allah,

1 Petrus 1:13

Obai somuo nantai, kaitn gola' bosiap-siap dalapm akal budi kaitn huatan hala mongondalian diri oca' monyonangan Tuhatn. Nononyo, Yesus Kristus tajahan datakng agi' monyatoan diri-Nyo. Timpu nantai, kaitn tajahan disolamant'an. Jadi, kaitn gola' bobondar boharap agatn koboi'an Allah nantai.

1 Petrus 5:10

Apo, pondorita'an nantai sotogalmo. Allah siku' paca'an bulah hidup kaitn monjadi sompurna. Sio pasti mohibur kaitn huatan bulah kaitn botahatn. Sio pasti monulukng kaitn oca' kaitn ulih pocayo agatn kuat. Sio inyo hala monunju'an koboi'an-Nyo. Sio bokuaso pakai' somanah-manahnyo, huatan Sio udah moningkau kaitn oca' mondapat bagian doi' kuaso-Nyo nantai obai kaitn pocayo ko Kristus.

2 Petrus 1:3

Ninam caronyo Sio moningkau kito: Sio monunju'annyo ko kito obai Sio bokuaso huatan luar biaso boi' oca' kito dapat mongonal Sio. Obai nantai, Sio udah momakai kuaso-Nyo sobagai Allah pakai' dionju' ko kito boko sosuatu inyo dipontikan pakai' hidup inyo monyonangan Sio.

Wahyu 3:21

Boko urakng inyo monang, Aku paca'an moijitan sia' dudu' di tahta-Ku bosamo agatn Aku. Samo sama'an Aku siku' udah monang lalu dudu' di tahta Bopai-Ku momorintah bosamo agatn Sio.