Filipi 3:10 - Porjanjian Boharu Torjomahan Baso Dilakng Soari-ari

¹⁰ Aku bondar-bondar honda' mongonal Kristus. Aku honda' moalapi kuaso inyo mombulah Sio bobali' hidup agi' doi' komatian. Aku honda' tuyut mondorita' samo sama'an Sio ongko rela mati samo sama'an Sio.

Filipi 3:10 ပူးပေါင်းရင်းမြစ်များ

Matius 20:23

Kato Yesus ko sia', “Memang bondar. Kaitn duo paca'an ajab sonsaro samo sama'an Aku. Apo Aku co bohak monontuan sopo inyo paca'an dudu' momorintah di sopia' kanan-Ku damo di sopia' kiba'-Ku. Kodudu'an nantai disodiaan pakai' boko urakng inyo udah ditontuan ulih Allah Bopai-Ku.”

Yohanes 10:18

Conyiant siku' urakng pan inyo ulih mombunuhKu. Apo Aku monyorahan hidup-Ku monurut kohonda'-Ku siku'. Aku ado kuaso pakai' moijitan urakng mombunuh-Ku. Aku pan ado kuaso pakai' hidup agi'. Nianam porintah inyo Aku torima' doi' Bopai-Ku.”

Yohanes 17:3

Ninam hidup inyo kokal, ia'an obai sia' mongonal ongkah Duatam Allah inyo bondar, huatan pan obai sia' mongonal Yesus Kristus inyo udah Duatn utus.

Roma 8:17

Nah, aman kito ni'in poana'an-Nyo, jadi kito pan tajahan monorima' somuo borokat inyo Sio sodia'an pakai' poana'an-Nyo. Samo sama'an Kristus mondapat'an borokat doi' Allah, kito pan tajahan mondapat'an borokat. Masudnyo, aman kito mondorita' samo sama'an Kristus, kito tajahan monorima' kohidupan inyo mulia samo sama'an Sio jam.

Roma 8:29

Doi' komai, Allah udah tohu sopo inyo tajahan dipilih Sio. Doi' komai, Sio pan udah momutusan oca' sia' monjadi sorupo agatn Ana'-Nyo, Yesus. Agatn ubo nantai, Yesus monjadi Ana'-Nyo inyo potamo di antaro banya' somadikan.

Roma 8:36

Ado inyo totulis dalapm Buku Suci: “Obai koi pocayo ko Duatn, jadi sotiap ari boko urakng honda' mombunuh koi. Koi samo sama'an boko domba inyo tajahan disombolih.”

2 Korintus 1:10

Sio udah monyolamant'an koi doi' bohayo komatian nantai. Sio pan paca'an torus monyolamant'an koi. Koi yakitn ongko boharap ko Sio obai Sio paca'an monyolamant'an koi agi'.

2 Korintus 1:5

Obai, koi opat mohadapi pondorita'an samo sama'an Kristus. Apo ubo nian jam, Allah opat monguat'an hati koi molalu'i Kristus.

2 Korintus 13:4

Memang Kristus ulih dihukupm mati di kayu salib obai Sio ado bukakng-tubuh inyo lomah samo sama'an monsio. Apo Sio hidup obai kuaso Allah. Ubo nian jam agatn koi. Koi lomah obai koi mondorita' samo sama'an Kristus. Apo, dalapm caro koi mohadapi kaitn, koi paca'an hidup bosamo Kristus dalapm kuaso Allah.

Galatia 2:20

Obai aku kinyo hidup agi' agatn caro sama'an komai. Ni'in, Kristus monontuan caro hidupku. Aku hidup di dunia ni'in agatn caro boharu obai aku pocayo ko Sio. Sio nantai Ana' Allah inyo kotakan mongasihi aku. Sio monyorahan diri-Nyo sampai mati sobagai kurbatn inyo monggonti'i aku.

Galatia 6:17

Aku didorako'i obai aku rasul Yesus. Di bukakngku ija' ado bokas boko luko didorako'i. Obai nantai, mula'i doi' ni'in, jangannam ado urakng inyo monyusahan aku.

Efesus 4:13

Kito somuo gola' molayati inyo bukai agatn ubo nian kito monjadi kuat bosatu obai kito somongkitn pocayo huatan somongkitn mongonal Ana' Allah. Kito pan botumbuh sampai monjadi sompurna sama'an Kristus. Kito monjadi kuat pocayo sama'an urakng dewasa

Filipi 3:8

Malahan aku moanggap la'apo pan conyiant ado rotinyo dibandikan agatn mongonal Kristus Yesus, Tuhatnku. Nantai jouh lobih pontikng daripado somuo hal inyo bukai. Nantaiam sobabnyo aku co boharap agi' ko boko hal nantai. Aku moanggap somuo hal nantai samo sama'an sampah oca' aku ulih mongonal Kristus,

Kolose 1:24

Ni'in, aku rindakng-rigah obai aku ulih ajab sonsaro pakai' monulukng kaitn. Aku mooso'i ajab sonsaro Kristus inyo ija' gola' dioso'i. Aku ajab sonsaro dibukakng-tubuhku pakai' monulukng bukakng-tubuh Kristus, ia'an somuo urakng inyo pocayo ko Sio.

Kolose 2:13

Komai kaitn udah mati socaro rohani obai kaitn bodosa huatan kinyo di sunant socaro jasmani. Apo Allah udah moonji'i kaitn kohidupan boharu bosamo-samo agatn Kristus. Allah udah moamputi somuo dosa kito.

Kolose 3:1

Kaitn dionji'i kohidupan boharu samo sama'an kaitn hidup agi' bosamo-samo agatn Kristus. Obai nantai, kaitn gola' moutamoan boko hal inyo di sorugo, di mono Kristus dudu' di tompat inyo palikng tohormat di sopia' kanan Allah.

1 Petrus 1:3

Topujicam Allah, ia'an Bopai doi' Yesus Kristus, Tuhatn kito. Allah udah monunju'an koboi'an-Nyo inyo luar biaso ko kito agatn caro ni'in: Sio bulah Yesus Kristus hidup agi' doi' antaro urakng mati. Molalu'i nantai, Sio moonju' kohidupan boharu ko kito samo sama'an kito hoyu' lahir. Obai nantai, hal ni'in moonji'i kito pongharapan inyo kuat.

2 Petrus 1:13

Aku mooso nantai tugasku pakai' moingant'an kaitn mongona'i boko hal nantai somanahan ku ija' hidup di dunia ni'in.

1 Yohanes 2:3

Aman kito monaati boko porintah Allah, hal nantai monunju'an obai kito bondar-bondar mongonal Sio.

1 Yohanes 2:5

Apo urakng inyo monuruti Pomandiran Allah, urakng nantai bondar-bondar ado kasih Allah di dalapm hatinyo. Hal nantai monunju'an obai kito hidup bosatu agatn Allah

Wahyu 1:18

Aku ninam inyo Hidup. Aku udah mati, apo porotiancam, Aku hidup pakai' somanah-manahnyo. Aku monjujut kunci huatan bokuaso tohadap komatian ongko dunia urakng mati