Filipi 2:19 - Porjanjian Boharu Torjomahan Baso Dilakng Soari-ari

¹⁹ Aku boharap Tuhatn Yesus tajahan mombulah oca' aku ulih hagar moutus Timotius ko kaitn. Agatn ubo nantai, hati ku tajahan tenang mondinga' borito mongona'i kaitn doi' io.

Filipi 2:19 ပူးပေါင်းရင်းမြစ်များ

Matius 12:21

Boko urakng doi' somuo banso paca'an pocayo obai Sio paca'an monulukng sia'.”

Kisah Boko Rasul 16:1

Paulus ongko Silas botula' ko kota Derbe ongko ko kota Listra. Di Listra ado Timotius. Io udah pocayo agatn Yesus. Indainyo urakng Yahudi inyo udah pocayo agatn Yesus, apo bopainyo urakng Yunani.

Roma 15:12

Solaitn nantai jam, joman komai nabi Yesaya bopandir: “Ado Urakng doi' koturutan Isai inyo tajahan datakng. Sio tajahan momorintah boko banso bukainyo banso Yahudi. Sia' tajahan boharap ko Sio.”

Roma 16:21

Salapm ko kaitn doi' Timotius inyo bokorojo molayati bosamoku. Salapm jam doi' Lukius, Yason, ongko Sosipater, boko somadikan doi' banso Yahudi samo sama'an aku.

1 Korintus 4:17

Aku moutus Timotius ko kaitn oca' monulukng kaitn monuruti toladatnku. Io sama'an ana' inyo kokidahku. Io jam sotia monulukngku molayati Tuhatn. Io paca'an moingant'an kaitn mongona'i caroku hidup dibabah kuaso Kristus Yesus. Caro hidup nantai samo sama'an la'apo inyo udah kuajaran disotiap jomaat di mono-mono.

Efesus 1:13

Sama'an nian jam agatn kaitn. Kaitn udah mondinga' Kabar Boi' inyo bondar sampai kaitn pocayo ko Kristus huatan disolamant'an. Molalu'i Sio, Allah moonji'i tando obai kaitn pan monjadi umat-Nyo jam, ia'an Sio moonju' Roh-Nyo ko kaitn jam sosuai agatn janji-Nyo sobolupmnyo.

Filipi 1:1

Surat ni'in doi' ku, Paulus bosamo agatn Timotius. Koi urakng inyo bokorojo molayati Kristus Yesus. Surat ni'in pakai' somuo urakng husus umputn Allah di kota Filipi inyo bosatu dalapm Kristus Yesus, tomansu' agatn somuo ponotua' ongko diakon jomaat.

Filipi 2:18

Ubo nian jam, kaitn gola' sonang-nyamanam ongko tuyut sonang-nyamanam agatn aku.

Filipi 2:28

Obai nantai, mongkitn bondar aku honda' monyiuh io agi' ko kaitn oca' kaitn ulih sonang-nyamanam agi' watu kaitn moniant io. Hatiku tajahan monjadi lobih tenang jam.

1 Tesalonika 3:2

koi momutusan pakai' moutus somadikan koi, Timotius, ko kaitn. Timotius bokorojo samo agatn koi pakai' molayati Allah jam dalapm momboritoan Kabar Boi' mongona'i Kristus. Koi moutus io pakai' monguat'an hati kaitn oca' kaitn lobih kuat pocayo ko Yesus, huatan oca' io momadahi kaitn pakai' totap kuat timpu kaitn mohadapi ajab sonsaro.

1 Tesalonika 3:5

Obai nantaiam aku gola' uti' Rajo Sitatn bohasil moncubo'i kaitn oca' co pocayo agi' ko Yesus. Soumpamonyo hal nantai tojadi, rotinyo somuo polayatan koi di antaro kaitn co nyiant pasalnyo. Aku co ulih monahan oso togonanganku agi', jadi aku moutus Timotius ko kaitn. Aku honda' mondinga' borito mongona'i kopocaya'an kaitn ko Yesus.

2 Tesalonika 1:3

Boko somadikan, koi bosukur ko Allah obai kaitn. Cucu' mo koi bosukur obai kaitn mongkitn kuat pocayo ko Yesus. Somuo kaitn pan mongkitn mongasihi siku'-monyiku'.

2 Timotius 1:12

Niannam obainyo aku moalapi somuo ajab sonsaro ni'in. Apo aku co malu obai aku udah tohu sopo Yesus sobondarnyo. Aku pocayo ko Sio. Aku udah monyorahan polayatan ni'in ko Sio. Aku yakitn Sio paca'an monjago oca' polayatanku kinyo balakng. Sio paca'an monjago polayatanku sampai ari Sio bobali' agi' ko dunia ni'in.

Yakobus 4:15

Jadi, soharusnyo kaitn bopandir sama'an ni'inan, “Aman Tuhatn moijitan, koi paca'an hidup huatan koi ulih molabuhan ni'in damo nianan.”

1 Petrus 1:21

Ia'an, kaitn dapat monjadi pocayo ko Allah obai porbuatan Kristus nantai. Allah udah bulah Sio hidup agi' doi' antaro urakng mati lalu mombulah Sio monjadi mulia. Agatn ubo nantai, kaitn pocayo huatan boharap ko Allah.