Filipi 2:14 - Porjanjian Boharu Torjomahan Baso Dilakng Soari-ari

¹⁴ Watu kaitn molabuhan lapo ja', jangan botuta'-bomamai ongko jangan botikakng.

Filipi 2:14 ပူးပေါင်းရင်းမြစ်များ

Matius 20:11

Jadi, lopas sia' monorima', sia' botuta' ko urakng umputn kobutn nantai. Kato sia', ‘Sia' inyo dudi datakng nantai sampat bokorojo so japm mo.

Markus 14:5

Minya' harupm nian ulih dijual ongko rogonyo kotakan mahal huatan duitnyo hoyu' dionju' ko boko urakng jaro!” Lalu sia' monggodi'i botina' nantai.

Markus 9:14

Lopas nantai, Yesus, Petrus, Yakobus, ongko Yohanes bobali' ko boko murid-Nyo inyo bukai. Sia' moniant banya' urakng tongahan mongoliliki boko murid nantai. Di santai ado jam boko guru agama Yahudi inyo tongahan bosoal jawab agatn boko murid nantai.

Lukas 5:30

Apo boko urakng Farisi ongko boko guru agama Yahudi botuta'-bomamai. Sia' bopandir ko murid Yesus, “Ma'apo kaitn makatn-minum bokawal agatn ponagih pajak ongko boko urakng bukai inyo bodosa? Nian salah!”

Kisah Boko Rasul 15:2

Apo Paulus ongko Barnabas kotakan kinyo sotuju agatn ajaran boko urakng nantai. Nontu sia' botikakng mongona'i mosalah nantai. Obai nantai, Paulus ongko Barnabas huatan boko urakng bukai diutus ko kota Yerusalem. Sia' diutus pakai' mombahas mosalah sunant nantai agatn boko rasul Yesus huatan boko ponotua' di Yerusalem.

Kisah Boko Rasul 15:39

Jadi, ado potikakan inyo bosar antaro Paulus ongko Barnabas. Obai nantai, sia' bosongkayo. Barnabas mombaba' Markus, jumpat kapal ko pulau Siprus.

Kisah Boko Rasul 15:7

Manah bondar sia' mombahas mosalah nantai. Lopas nantai, rasul Petrus bodiritn. Katonyo, “Boko somadikan! Kaitn tohu obai Allah udah momilih aku doi' antaro kaitn. Boboropo watu inyo komai, Allah momilih aku pakai' momboritoan Kabar Boi' ko boko urakng inyo bukainyo urakng Yahudi. Allah molabuhan nantai oca' sia' ulih mondinga' ongko monjadi pocayo agatn Yesus.

Kisah Boko Rasul 6:1

Mongkitn manah, mongkitn banya' urakng Yahudi inyo pocayo agatn Yesus. Ado urakng Yahudi inyo pocayo agatn Yesus inyo bobaso Ibrani. Ado jam inyo bobaso Yunani. Inyo bobaso Yunani tungi obai inyo bobaso Ibrani mombagi'i pomakatn sotiap ari ko boko urakng botina' balu kinyo adil. Boko urakng balu inyo bobaso Yunani hala kinyo dionji'i.

Roma 12:18

Sodapat-dapatnyo aman nantai bogantukng doi' diri kolai siku' bousahacam pakai' hidup damai agatn somuo urakng.

Roma 14:1

Ado boko somadikan inyo kurakng kuat pocayo ia'an sia' ija' gangga'-gua'an ulih molabuhan la'apo pan damo cado. Jangan botikakng mongona'i pondapat sia'. Apo, torima'cam sia' agatn sonang hati.

Roma 16:17

Boko somadikan. Aku kotakng muhun ko kaitn oca' kaitn boboi'cam agatn boko urakng inyo honda' bulah popocahan di antaro kaitn. Sia' honda' oca' kaitn monjadi sosat. Ajaran sia' bolawatan agatn ajaran inyo udah ditorima' kaitn. Jangan tuyut sia'!

1 Korintus 10:10

Jangan kaitn botuta'-bomamai, sama'an boboropo doi' sia'. Lopas sia' botuta'-bomamai, Allah moutus molekat komatian pakai' mombonasoan sia'.

2 Korintus 12:20

Obai aku bogonang watu ku datakng nononyo, kolaku'an kaitn kinyo boi' sama'an inyo ku kohonda'i. Ubo nian jam, aku gola' monogur kaitn, tindakanku kinyo samo agatn kohonda' kaitn. Aku kuatir kaitn hala botikakng-bokolohi, tungi, ponggodian, molajuan kohonda' diri siku', monjahai'an urakng bukai, mohahadu, buhau, bulah kokacauan.

Galatia 5:15

Jangan sama'an bonatakng ganas inyo hala monyorakng ongko mongotap. Boboi' cam aman kaitn molabuhan inyo sama'an nantai kaitn salikng mombonasoan.

Galatia 5:26

Janganam kito monjadi buhau. Janganam kito hala bulah urakng bukai godi. Janganam kito hala honda' barakng umputn urakng bukai.

Filipi 2:3

Jangan buhau ongko bogoyap pujian sia-sia. Apo, rondahancam hati kaitn. Anggap ja' urakng bukai lobih pontikng doi' kolai siku'.

1 Tesalonika 5:13

Hormati huatan kasihicam sia' agatn somombondarannyo, obai moingant somuo hal inyo sia' labuhan. Koi pan muhun oca' kaitn somuo samo-samo hidup agatn damai.

1 Tesalonika 5:15

Poniant'an oca' co nyiant di antaro kaitn inyo mombalas kojahatan agatn kojahatan. Sobali'nyo bousaha pakai' hala bulah koboi'an ko boko somadikan kaitn huatan ko somuo urakng.

Ibrani 12:14

Bousahacam hidup damai agatn somuo urakng. Bousaha jam hidup borosih doi' dosa. Obai, urakng inyo kinyo borosih doi' dosa, kinyo tajahan ulih moniant Tuhatn.

Yakobus 1:20

Obai siku' urakng ponggodian, culih hidup bondar di hadapan Allah.

Yakobus 3:14

Apo aman kaitn tungi hati huatan ado kohonda' dalapm hati pakai' monjadi lobih hebat daripado urakng bukai, jangan kaitn buhau huatan jangan momutarbali'an borito inyo bondar doi' Allah.

Yakobus 5:9

Boko somadikan, aman kaitn hala bosungunt huatan hala monyalahan, jadi kaitn paca'an dihukupm. Jadi, jangannam molabuhannyo nantai. Jangan sampai tongkolupatn, Sio inyo monjadi Hakipm somuo monsio paca'an oca' datakng.

1 Petrus 3:11

Sia' gola' botongga' bulah kojahatan, lalu bulah koboi'an. Sia' gola' bousaha bobondar pakai' hidup damai agatn urakng bukai.

1 Petrus 4:9

Kaitn gola' hala monorima' urakng pocayo inyo bukai dalapm rumah kaitn siku'-monyiku' agatn sonang hati. Jangan mongoluh.

Yudas 1:16

Boko urakng nantai ongkah botuta', gala' moncari-cari kosalahan urakng. Sia' dikuaso'i kohonda' bukakng inyo jahat. Sia' buhau momuji diri. Apo sia' pan momuji-muji urakng bukai oca' bodapat kountukan pakai' diri sia' siku'.