Filipi 1:20 - Porjanjian Boharu Torjomahan Baso Dilakng Soari-ari

²⁰ Aku kotakng honda' ongko moharap'an obai aku co bulah boko-lapo inyo bulah ku monjadi malu di hadapan Tuhatn. Apo aku boharap aku tajahan monjadi borani watu ni'in samo sama'an aku hala borani sobolupmnyo. Agatn ubo nantai, aman aku mati damo hidup, Kristus tajahan dimuliaan agatn lapo ja' inyo tojadi ko bukakng-tubuhku.

Filipi 1:20 ပူးပေါင်းရင်းမြစ်များ

Yohanes 21:19

(Yesus momadahan nantai pakai' monunju'an caronyo Petrus paca'an mati. Agatn caro ubo nantai, Petrus nantai, paca'an momuliaan Allah.) Lopas Yesus jadi momadahan bunyi nantai, Sio bopandir ko Petrus, “Hincapm tuyut Aku!”

Kisah Boko Rasul 20:24

Apo aku co poduli. Biar pan aku dibunuh, aku totap co poduli. Tuhatn Yesus udah moonji'i tugas ko aku pakai' momboritoan Kabar Boi' obai Allah udah monyatoan koboi'an-Nyo ko monsio. Aku gola' monyolosaian tugasku nantai. Nianam inyo pontikng, bukainyo hidup aku.

Kisah Boko Rasul 21:13

Apo Paulus monimbas, “Jangan kaitn monangis, obai nantai bulah hatiku salu'! Aku udah siap ditangkap di Yerusalem. Malahan, aku udah siap mati sobagai murid Tuhatn Yesus.”

Kisah Boko Rasul 4:31

Lopas jadi bodoa, tompat sia' bokumpul nantai boguyakng. Roh Allah monguaso'i sia' somuo, jadi sia' mongkitn borani momboritoan pomandiran Allah.

Roma 12:1

Obai somuonyo nantai, boko somadikan, ni'in aku kotakan muhun ko kaitn: Obai Allah monunju'an kasih-Nyo ko kaitn, jadi kaitn gola' monyorahan diri kaitn ko Sio samo sama'an kurbatn posombahan inyo hidup. Kaitn gola' hidup agatn caro inyo borosih doi' dosa ongko monyonangan Sio. Nianam caro inyo bondar pakai' monyombah Sio.

Roma 5:5

Aman kito boharap ko Sio sama'an nantai, jadi kito kinyo paca'an kocewa. Obai, hati kito udah dibisi'i Allah agatn kasih-Nyo. Allah molabuhan nantai agatn porontaroan Roh-Nyo inyo udah dionju' ko kito.

Roma 6:13

Jangan tundu' ko kuaso dosa huatan mombiaran dosa momakai boko anggota bukakng kaitn sama'an alat pakai' bulah kojahatan. Hidup kaitn inyo manah nantai udah mati. Watu ni'in, kaitn dionji'i hidup boharu. Jadi, tundu' ko kuaso Allah huatan mombiaran Sio momakai boko anggota bukakng kaitn sama'an alat pakai' bulah inyo bondar.

Roma 6:19

(Aku tohu kaitn ija' manah mongoroti boko hal rohani. Jadi, aku momakai contoh ni'in mongona'i hulutn oca' kaitn lobih mudah mongoroti.) Komai kaitn monyorahan diri kaitn monjadi hulutn dosa. Boko anggota bukakng kaitn digunoan pakai' bulah boko hal inyo kotor huatan jahat. Apo watu ni'in kaitn gola' monyorahan diri kaitn monjadi hulutn Allah oca' boko anggota bukakng-tubuh kaitn ulih digunoan pakai' bulah boko hal inyo bondar huatan borosih doi' dosa.

Roma 8:19

Sobondarnyo, la'apo pan inyo Allah pulah kotakan rindu watu Allah monunju'an boko poana'an-Nyo.

Roma 9:33

Samo sama'an pomandiran Allah inyo ditulis di Buku Suci: “Porotiancam! Aku molota'an Batu di Sion. Batu nantai bulah urakng topanjur. Apo urakng inyo pocayo ko Sio, tajahannyo kinyo kalo monjadi malu obai io pocayo.”

1 Korintus 15:31

Bondar, boko somadikan! Sotiap ari aku ajab sonsaro mohadapi komatian. Aku bosumpah obai nantai bondar, samo sama'an oso bompangkakanku ko kaitn pan bondar. Aku bopangkakng agatn kaitn di dalapm Kristus Yesus. Kristus Yesus nantai Tuhatn inyo bokuaso di pucu' kito.

1 Korintus 6:20

Allah udah momboli kaitn huatan mombayarnyo lunas. Obai nantai, gunoan cam bukakng-tubuh kaitn pakai' moninggian Allah.

1 Korintus 7:34

Ongko, pohatiannyo songkayo antaro koluarganyo agatn Tuhatn. Siku' urakng botina' inyo bolupm kalo kawitn damo co nyiant lakinyo agi', io ulih borotian boko hal mongona'i Tuhatn. Io honda' hidup husus pakai' Tuhatn, ia'an dalapm caro io monggunoan bukakng-tubuhnyo huatan dalapm pikirannyo. Apo siku' urakng botina' inyo kawitn gola' borotian mongona'i boko hal di dunia ni'in, ia'an ubo apo caronyo io ulih monyonangan lakinyo.

2 Korintus 10:8

Aku co malu aman aku tolalu bangga agatn kuaso inyo Tuhatn onju' ko koi. Obai, Tuhatn moonju' kuaso ko koi pakai' monulukng kaitn lobih kuat pocayo, bukainyo pakai' moruntuhan kopocaya'an kaitn.

2 Korintus 3:12

Obai koi yakitn moharap'an mongona'i hal nantai, jadi koi borani momboritoan mongona'i Pojanjian Boharu nantai.

2 Korintus 4:10

Somanah koi hidup, koi hala diancapm mati obai koi molayati Yesus. Samo sama'an koi hala mombaba' komatian Yesus di dalapm bukakng-tubuh koi. Apo koi molabuhan nantai oca' kohidupan Yesus ulih di tiat di dalapm diri koi. Ia'an di dalapm bukakng-tubuh koi inyo paca'an mati.

2 Korintus 5:15

Masudnyo ubo ni'in: Kristus udah mati pakai' somuo urakng. Sio molabuhan nantai oca' boko urakng, inyo hidup, sia' co hidup pakai' monyonangan diri sia' siku', apo sia' hidup pakai' monyonangan Sio, ia'an Sio inyo udah mati ongko bobali' hidup agi' pakai' sia'.

2 Korintus 7:14

Sobolupm Titus monjongu' kaitn, aku momadahannyo ko io obai kaitn nam urakng inyo boi'. Jadi, kaitn co bulah aku malu. Koi hala momadahan boko hal inyo bondar ko kaitn. Ubo nian jam, somuo koboi'an kaitn inyo koi padahan ko Titus, somuo nantai tonyato bondar jam.

2 Korintus 7:4

Aku borani bopandir ko kaitn agatn torus-torakng. Apo, aku pan bangga bondar agatn kaitn. Biar pan koi mohadapi banya' pondorita'an, kaitn kotakan monguat'an hati koi. Jadi, hati koi kotakan sonang-nyaman.

Filipi 1:14

Solaitn nantai, watu ku di ponjara, aku monjadi toladatn bagi boko somadikan kito inyo pocayo ko Tuhatn Yesus. Kobanya'an doi' sia' monjadi mongkitn borani momboritoan Kabar Boi'. Sia' co gola' momadahan Pomandiran Allah nantai.

Filipi 2:17

Apo, aku tajahan totap sonang-nyamanam aman aku dibunuh. Obai, kaitn pocayo ko Kristus ongko hidup molayati-Nyo. Kaitn monjadi samo sama'an kurbatn posombahan ko Allah. Aman aku dibunuh, rotinyo darahku ditumpahan di pucu' posombahan kaitn nantai. Jadi, aku sonang-nyamanam ongko aku tuyut sonang-nyamanam jam agatn kaitn.

Kolose 1:24

Ni'in, aku rindakng-rigah obai aku ulih ajab sonsaro pakai' monulukng kaitn. Aku mooso'i ajab sonsaro Kristus inyo ija' gola' dioso'i. Aku ajab sonsaro dibukakng-tubuhku pakai' monulukng bukakng-tubuh Kristus, ia'an somuo urakng inyo pocayo ko Sio.

1 Tesalonika 5:23

Ni'inan koi bodoa ko Allah inyo moonji'i kito sonang-asau huatan bulah kaitn mongkitn lobih suci dalapm somuo hal. Koi bodoa mudahan kinyo ado boko hal inyo jahat dalapm soluruh roh kolai, jiwa kolai huatan bukakng-tubuh kolai, timpu Yesus, Tuhatn kito nononyo datakng agi' ko dunia ni'in.

1 Petrus 4:16

Apo, aman kaitn mondorita' obai kaitn urakng Kristen, jangan kaitn malu mongona'i nantai apo momuliaan Allah ja'am.

1 Yohanes 2:28

Jadi, poana'anku! Kaitn gola' hidup bosatu agatn Kristus, oca' Sio datakng nononyo agi', kito co gola' huatan co malu mohadap Sio.