Filipi 1:1 - Porjanjian Boharu Torjomahan Baso Dilakng Soari-ari

¹ Surat ni'in doi' ku, Paulus bosamo agatn Timotius. Koi urakng inyo bokorojo molayati Kristus Yesus. Surat ni'in pakai' somuo urakng husus umputn Allah di kota Filipi inyo bosatu dalapm Kristus Yesus, tomansu' agatn somuo ponotua' ongko diakon jomaat.

Filipi 1:1 ပူးပေါင်းရင်းမြစ်များ

Markus 13:34

Koadaannyo samo sama'an kisah ni'in: Ado siku' habakng inyo moninggalan rumahnyo lalu botula' ko doerah inyo jouh. Io moonji'i tugas ko siku'-monyiku' hulutnnyo pakai' monyiuh sia' mourus rumahnyo. Io moonju' porintah ko urakng inyo monjago lawakng, oca' bojago boboi'.

Yohanes 12:26

Aman ado urakng inyo honda' molayati-Ku, io gola' tuyut-Ku. Io paca'an ado di tompat inyo samo agatn Aku. Allah Bopai paca'an mohormati sotiap urakng inyo molayati-Ku.

Kisah Boko Rasul 20:28

Kaitn gola' monjago diri kaitn huatan urakng bukai inyo udah pocayo agatn Yesus oca' totap pocayo. Allah udah monobus monsio doi' hukupan dosa agatn darah-Nyo sikuꞌ. Jadi, sia' udah monjadi umant Allah siku'. Kaitn udah dipilih Roh Allah pakai' momimpitn sia' nantai. Obai nantai, kaitn gola' monjago sia' samo sama'an gombala monjago kabatn dombanyo.

Kisah Boko Rasul 9:13

Apo Ananias bopandir, “Tuhatn, aku udah mondinga' banya' kisah mongona'i Saulus nantai. Di Yerusalem, io banya' mondorako'i urakng inyo pocayo ko Duatn.

Roma 1:1

Surat ni'in doi' aku, Paulus, urakng inyo molayati Kristus Yesus. Aku ditingkau pakai' monjadi rasul, huatan dihususan pakai' momboritoan Kabar Boi' doi' Allah.

1 Korintus 16:10

Aman Timotius datakng ko kaitn, usahaancam oca' io kinyo mooso gola' agatn kaitn. Hormaticam io, obai io bokorojo pakai' Tuhatn, samo sama'an aku jam.

2 Korintus 1:1

Surat ni'in doi' ku, Paulus. Aku dipilih pakai' monjadi rasul Kristus Yesus obai nantai kohonda' Allah. Salapm jam doi' Timotius, somadikan kito. Surat ni'in pakai' jomaat Allah di kota Korintus ongko somuo urakng inyo husus umputn Allah di somuo propinsi Akhaya.

Galatia 1:10

Agatn pomandiran nantai, udah jolas aku kinyo bousaha monyonangan monsio. Aku bayo bousaha monyonangan hati Allah mo! Soandainyo aku bousaha monyonangan monsio, nantai paca'an bulah aku co agi' monjadi hulutn umputn Rajo Inyo Dijanjian Allah.

Galatia 3:26

Kaitn udah monjadi poana'an Allah obai kaitn pocayo ko Yesus Kristus.

Galatia 3:28

Kaitn somuo monjadi satu dalapm Kristus Yesus. Allah kinyo monyongkayoan antaro urakng Yahudi damo urakng bukainyo Yahudi; antaro hulutn damo urakng bebas; antaro lolaki damo botina'.

Efesus 1:1

Surat ni'in doi' aku, Paulus. Aku di tingkau pakai' monjadi rasul Kristus Yesus obai nantai kohonda' Allah. Surat ni'in ko somuo umant husus umputn Allah di kota Efesus, ia'an boko urakng inyo pocayo ko Kristus Yesus.

Efesus 1:15

Obai nantai, doi' mulo aku mondinga' obai kaitn pocayo ko Tuhatn Yesus ongko kaitn mongasihi somuo umant husus umputn Allah,

Efesus 6:24

Aku bodoa oca' Sio monunju'an kasih karunia ko kaitn somuo inyo mongasihi Tuhatn kito Yesus Kristus agatn kasih inyo kinyo tohu botongga'.

Filipi 2:19

Aku boharap Tuhatn Yesus tajahan mombulah oca' aku ulih hagar moutus Timotius ko kaitn. Agatn ubo nantai, hati ku tajahan tenang mondinga' borito mongona'i kaitn doi' io.

Filipi 2:5

Kohonda'nyo pomikiran kaitn gola' samo sama'an pomikiran Kristus Yesus.

Filipi 3:12

Aku co bomasud aku udah moncapai tujuan nantai! Memang aku bolupm sompurna. Apo aku hala bousaha pakai' moncapai tujuan nantai. Obai, nantaiam hajat Kristus Yesus bagiku timpu Sio moningkau ku monjadi umputn-Nyo.

Filipi 3:3

Sobondarnyo, umant Allah ia'an kito inyo dibimbikng Roh-Nyo pakai' monyombah Sio. Ni'inan tando ‘sunant’ inyo bondar. Kito bosukur obai Kristus Yesus monyolamant'an kito. Kito co boharap ko boko porbuatan monsio.

Filipi 3:8

Malahan aku moanggap la'apo pan conyiant ado rotinyo dibandikan agatn mongonal Kristus Yesus, Tuhatnku. Nantai jouh lobih pontikng daripado somuo hal inyo bukai. Nantaiam sobabnyo aku co boharap agi' ko boko hal nantai. Aku moanggap somuo hal nantai samo sama'an sampah oca' aku ulih mongonal Kristus,

1 Tesalonika 1:1

Ko inyo tohormat boko urakng pocayo di kota Tesalonika. Kaitn inyo monjadi umputn Allah Bopai ongko Yesus Kristus, Tuhatn inyo bokuaso di pucu' kito. Salapm doi' aku, Paulus ongko doi' Silas huatan Timotius. Kasih karunia ongko sonang-asau doi' Allah, Bopai kito, huatan Tuhatn Yesus Kristus monyoroto'i kolai.

2 Tesalonika 1:1

Ko inyo tohormat boko urakng inyo pocayo di kota Tesalonika. Kaitn inyo pocayo ko Allah Bopai kito huatan Yesus Kristus, Tuhatn kito. Salapm doi' aku, Paulus. Doi' Silas huatan Timotius jam.

2 Tesalonika 1:10

Hukupan nantai paca'an tojadi timpu Yesus datakng agi'. Watu Sio datakng agi' somuo urakng inyo pocayo ko Sio momuji huatan hiratn agatn Sio. Sio paca'an dipuji obai Sio bulah sia' monjadi borosih doi' dosa. Kaitn tomansu' kolompok urakng nantai obai kaitn udah pocayo somuo inyo koi sampaian ko kaitn.

1 Timotius 3:8

Samo sama'an ponotua', boko diakon gola' hidup agatn caro inyo boi'. Sia' gola' tohormat. Sia' gola' jadi urakng jujur. Sia' co ulih jadi urakng ongkah hala mabu'. Sia' co ulih kaha'-kolobu'.

Titus 1:1

Ko Titus: inyo bondar-bondar sama'an ana'ku dalapm Yesus obai kito sosamo pocayo ko Yesus. Salapm doi' aku, Paulus. Allah moutus aku monjadi polayatn-Nyo. Yesus Kristus moutus aku monjadi rasul-Nyo. Aku udah diutus pakai' monulukng boko urakng inyo dipilih Allah oca' mongkitn pocayo ko Yesus. Aku pan diutus pakai' mongajar ajaran inyo bondar oca' boko urakng inyo dipilih Allah nantai hidup sosuai agatn kohonda'-Nyo. Pondasi ajaran nantai ia'an pongharapan paca'an hidup somanah-manahnyo, inyo udah Sio janjian sobolupm dunia dipulah. Allah Ponyolamant kito, co mungkitn tumbukan. Pas watu inyo ditontuan-Nyo, Allah udah moonji'i pomandiran-Nyo molalu'i Kabar Boi' inyo udah dipocayoan ko aku pakai' kuboritoan. Aku bodoa oca' Allah Bopai kito ongko Kristus Yesus, Ponyolamant kito monunju'an kasih karunia-Nyo huatan moonji'i sonang-asau ko kolai.

Titus 1:7

Siku' urakng pongawas jomaat bokorojo moatur Rumah Allah. Obai niannam, io gola' hidup bujur bondar. Io culih buhau. Io culih copat godi damo urakng inyo pomabu'. Io culih gala' bokolohi damo gala' ngontumbuki urakng oca' mondapat'an untukng.

Filemon 1:1

Surat ni'in doi' aku, Paulus. Aku di ponjara obai aku molayati Kristus Yesus. Salapm jam doi' Timotius, somadikan kito. Surat ni'in ko Filemon inyo tokasih. Inyo bokorojosamo agatn koi molayati Tuhatn.

Ibrani 13:23

Aku honda' oca' kaitn mongotohu'i obai somadikan kito, Timotius, udah dilopasan doi' ponjara. Aman io hagar datakng ko si'itn, koi duo tajahan monjongu' kaitn.

Yakobus 1:1

Pakai' somuo boko urakng inyo pocayo doi' koduo bolas suku umant Allah inyo tosebar di soluruh dunia. Salapm doi' ku, Yakobus, inyo molayati Allah ongko polayatn Yesus Kristus.

1 Petrus 2:25

Komai, kaitn samo sama'an domba inyo sosat. Apo ni'in kaitn udah tuyut Kristus. Sio samo sama'an gombala inyo molinduki jiwa kaitn.

2 Petrus 1:1

Surat ni'in doi' ku, Simon Petrus, urakng inyo molayati Yesus Kristus. Aku pan diutus sobagai rasul-Nyo. Surat ni'in ko boko urakng inyo pocayo ko Yesus Kristus samo sama'an koi. Sio udah moonji'i kito kosompatan nantai obai Sio hala molabuhan inyo bondar. Sio nam Allah ongko Ponyolamant kito.

Yudas 1:1

Surat ni'in doi' aku, Yudas, hulutn Yesus Kristus. Aku pan somadikan Yakobus. Surat ni'in ko boko urakng inyo ditingkau, ia'an boko urakng inyo dikasihi Allah Bopai, boko urakng inyo Allah jago oca' ulih monjadi umputn Yesus Kristus.

Wahyu 1:1

Yesus Kristus monyatoan mongona'i boko kojadian inyo paca'an tojadi. Allah momboritoan ko Yesus pakai' monyatoannyo ko boko urakng inyo molayati Sio. Yesus Kristus moutus molekat-Nyo pakai' monyatoan ko Yohanes, hulutn-Nyo.

Wahyu 1:20

Dalapm poniant'an tontai kolai moniant tujuh tihakng tompat molota'an pompolitoan inyo dipulah doi' omas. Kolai pan moniant jam tujuh bintakng di longan kanan-Ku. Nianam rotinyo: Kotujuh tihakng tompat molota'an pompolitoan nantai monggambaran kotujuh jomaat. Kotujuh bintakng nantai monggambaran kotujuh molekat inyo monjago boko jomaat nantai.”

Wahyu 19:10

Aku lansukng tokorobah tokosungkapm di pohadapan kaki io pakai' monyombah io. Apo io bopandir ko aku, “Jangan monyombah aku! Aku bayo hulutn inyo molayati Allah, samo sama'an kolai huatan boko somadikan kolai, ia'an boko urakng inyo pocayo ko somuo inyo Yesus ajaran. Sombah Allah aja'am. Obai somuo inyo Yesus ajaran nianam pomandiran doi' Roh Allah.”

Wahyu 2:12

“Tuliscam pomandiran ni'in ko molekat inyo monjago jomaat di Pergamus: Pomandiran ni'in doi' Sio, inyo monjujut podakng tajapm inyo bomato duo.

Wahyu 2:8

“Tuliscam pomandiran ni'in ko molekat inyo monjago jomaat di Smirna: Pomandiran ni'in doi' Sio, inyo Potamo ongko inyo Toahir, Sio udah mati apo hidup agi'.

Wahyu 22:9

Apo io bopandir ko aku, “Jangan monyombah aku! Aku bayo hulutn inyo molayati Allah, samo sama'an kolai ongko boko somadikan kolai boko nabi ongko somuo urakng inyo monuruti somuo posatn dalapm buku ni'in. Sombah Allah aja'am.”