Filemon 1:24 - Porjanjian Boharu Torjomahan Baso Dilakng Soari-ari

²⁴ Salapm jam doi' Markus, Aristarkhus, Demas huatan Lukas, ia'an boko kawal inyo bokorojosamo agatn ku pakai' momboritoan Kabar Boi'.

Filemon 1:24 ပူးပေါင်းရင်းမြစ်များ

Kisah Boko Rasul 12:12

Jadi, Petrus udah sadar aman Allah bondar-bondar mombebasan io doi' ponjara. Lopas nantai, io botula' ko rumah Maria, indai Yohanes (inyo jam disobut Markus). Di rumah nantai banya' urakng tongahan bokumpul. Sia' ija' bodoa oca' Allah monulukng Petrus di ponjara.

Kisah Boko Rasul 12:25

Barnabas ongko Saulus udah moonju'an sumbakan ko boko pomimpitn kumpulan urakng pocayo di kota Yerusalem. Lopas jadi sia' duo monyolosaian polayatan nantai, sia' bobali' doi' Yerusalem ko kota Antiokhia. Sia' mombaba' Yohanes (inyo jam disobut Markus).

Kisah Boko Rasul 13:13

Doi' kota Pafos nantai, Paulus huatan boko pokawalannyo bolayar ko polabuhan Perga, ibu kota doerah Pamfilia. Di santai, Yohanes Markus moninggalan sia'. Io bobali' agi' ko Yerusalem.

Kisah Boko Rasul 19:29

Banya' urakng bukai monjadi tolibat. Soluruh kota nantai monjadi kacau. Urakng banya' borindakng-ramai bonggidi'an momansu'i lapakan umum inyo bosar. Duo kawal Paulus ditangkap ongko dibaba' ko su'utn jam. Damo sia' Gayus ongko Aristarkhus. Sia' duo doi' Makedonia apo tuyut Paulus dalapm polayatannyo.

Kisah Boko Rasul 27:2

Timpu koi ado di polabuhan di kota Kaisarea, ado kapal inyo datakng doi' kota Adramitium. Kapal nantai paca'an bobali' ko Adramitium agi' kapikng singgahi diboboropo polabuhan di sopanjakng pantai propinsi Asia. Ongko, koi jumpat kapal nantai ongko botula'. Aristarkhus pan tuyut samoan koi. Io nantai somadikan koi inyo boasal doi' kota Tesalonika di propinsi Makedonia.

2 Korintus 8:23

Titus, io nam kawal ku inyo bokorojo samo agatn aku pakai' molayati kaitn. Ongko koduo somadikan inyo bukai nantai, sia' nam boko urakng inyo diutus boko jomaat. Sia' monunju'an obai Kristus mulia.

Filipi 2:25

Apo, timpu ni'in, aku mooso pontikng mongiripm Epafroditus agi' ko kaitn. Komai, kaitn moutus io pakai' monulukng ku dalapm ponjara di si'itan. Io udah monjadi somadikanku inyo bokorojo ongko bojuakng pakai' Kristus bosamo ku.

Filipi 4:3

Ko Sunsugos, kawalku inyo sotia, aku minto oca' kolai monulukng duo urakng botina' nantai. Obai, sia' udah bogota' humpas-pulas bosamo agatn aku pakai' momboritoan Kabar Boi', samo sama'an Klemens ongko boko urakng bukai inyo bokorojo bosamo agatn aku. Somuo damo sia' ado dalapm Buku Kohidupan.

Kolose 4:10

Salapm doi' Aristarkhus, inyo ado dalapm ponjara bosamo agatn aku. Salapm jam doi' Markus, io sana'-tuho Barnabas. Kaitn udah monorima' posatn mongona'i Markus; aman io datakng, torima' io agatn boi'.

Kolose 4:14

Salapm doi' somadikan inyo kito kasihi, Lukas, dokter nantai. Salapm jam doi' Demas.

1 Petrus 5:13

Salapm ko kaitn doi' jomaat kota Babel, inyo pan dipilih Allah jam. Salapm jam doi' Markus, inyo ku anggap sama'an ana'ku siku'.

3 Yohanes 1:8

Jadi, kito gola' monulukng sia'. Agatn ubo nantaiam, kito ulih monjadi boko urakng inyo bokorojo samo agatn sia' pakai' monyebaran ajaran inyo bondar.