Efesus 5:3 - Porjanjian Boharu Torjomahan Baso Dilakng Soari-ari

³ Jangan bulah dosa bomporajoan. Jangan bulah boko hal inyo kinyo sonunuh. Jangan kaha'-kolobu'. Boko hal nantai samo sokali kinyo cucu' pakai' umant husus umputn Allah.

Efesus 5:3 ပူးပေါင်းရင်းမြစ်များ

Matius 15:19

Obai boko pikiran jahat sama'an ni'in boasal doi' hati: pikiran pakai' mombunuh, bomporajoan bulah dosa, mongolit, bulah kotumbukan mongutu' uyakng.

Lukas 12:15

Ongko Yesus bopandir ko somuo urakng di santai, “Boboi'cam! Jagocam diri kaitn doi' somuo macapm kotama'an. Obai hidup inyo sobondarnyo samo sokali kinyo bogantukng agatn banyaꞌnyo kodampuan.”

Lukas 16:14

Nah, ado jam boboropo urakng Farisi mondingaꞌan somuo inyo Yesus pandiran nantai. Sia' kotakng gala' agatn duit. Jadi, sia' rindakan Yesus.

Kisah Boko Rasul 15:20

Apo, soharusnyo kito monulis surat ko sia'. Kito momadahan ko sia' oca' jangan momporajoan. Jangan momua'i pomakatn inyo diposombahan ko boko duato. Jangan momua'i isi lou' inyo mati dikoci'. Jangan momua'i darah.

Kisah Boko Rasul 20:33

Aku co kalo mongohonda'i dionji'i kodampuan ulih urakng bukai, boi' borupo pira', omas, damo pakai'an.

Roma 1:29

Sia' kinyo hidup bondar di hadapan Allah. Hati sia' jahat huatan tama'. Sia' mombonci' huatan mooso tungi agatn urakng bukai. Sia' hala honda' botikakng ongko mombunuh urakng bukai. Sia' monipu huatan mondondapm.

Roma 16:2

Honda' ku padahan ko kaitn nantai oca' kaitn monyambut io agatn caro inyo pantas pakai' urakng inyo pocayo. Sambutcam io dalapm Tuhatn ongko tulukngcam io agatn kopontikannyo. Obai, io udah monulukng urakng banya', tomansu' aku.

Roma 6:13

Jangan tundu' ko kuaso dosa huatan mombiaran dosa momakai boko anggota bukakng kaitn sama'an alat pakai' bulah kojahatan. Hidup kaitn inyo manah nantai udah mati. Watu ni'in, kaitn dionji'i hidup boharu. Jadi, tundu' ko kuaso Allah huatan mombiaran Sio momakai boko anggota bukakng kaitn sama'an alat pakai' bulah inyo bondar.

1 Korintus 10:8

Solaitn nantai, jangan kaitn bulah dosa bomporajoan sama'an boboropo urakng doi' sia'. Lopas jadi sia' bulah dosa nantai, Allah mohukupm sia' singgatn dalapm soari, ado duo puluh tigo ribu urakng inyo mati.

1 Korintus 5:1

Aku mondinga' borito obai ado urakng di antaro kaitn inyo bomporajoan. Io pan molabuhan dosa bomporajoan inyo kotakng kotor bondar, ia'an momporajoan agatn indai tirinyo! Boko urakng inyo bolupm mongonal Allah pan co sampai bomporajoan agatn indai tiri sia'.

1 Korintus 6:13

Pomakatn dipulah pakai' moisi'i porut kito. Porut kito dipulah pakai' mooso'i pomakatn: Apo Allah paca'an mohancuran kododuonyo. Allah co bulah bukakng-tubuh kito pakai' bomporajoan. Bukakng-tubuh kito dipulah pakai' molabuhan boko hal inyo monyonangan Tuhatn Yesus. Tuhatn inyo monguaso'i bukakng-tubuh kito.

1 Korintus 6:18

Jadi, jangan sokali-kali bomporajoan. Somuo dosa inyo bukai tojadi di luar bukakng-tubuh urakng nian. Apo urakng inyo bomporajoan, bodosa tohadap bukakng-tubuhnyo siku'.

2 Korintus 12:21

Aku bogonang watu ku datakng agi', Allahku paca'an bulah ku malu di hadapan kaitn. Aku paca'an monangis salu' obai banya' urakng di antaro kaitn ija' hidup dalapm dosa. Sia' bolupm moninggalan boko hal inyo kotor, boko hal kinyo sonunuh, bokohonda' kinyo patut.

Efesus 5:12

Boko porbuatan inyo diombakan sia' nantai kotakng jahat. Aman kito kisahan pan mongona'i nantai, kito monjadi malu.

Efesus 5:5

Kotohu'i cam ni'in: urakng inyo bulah dosa bomporajoan, urakng inyo bulah boko hal inyo kinyo sonunuh, urakng inyo kaha'-kolobu' (kaha'-kolobu' nantai rotinyo monjadian boko kohonda'-Nyo samo sama'an tuhatn sia'), somuo sia' kinyo ulih monjadi anggota Koraja'an Kristus huatan Allah.

Filipi 1:27

Lapo ja' inyo tojadi ko aku, inyo pontikng ia'an kaitn hidup sosuai agatn Kabar Boi' mongona'i Kristus. Agatn ubo nian, aman aku ulih datakng botomu agatn kaitn damo cuku datakng ongko bayo mondinga' mongona'i kaitn, jadi aku tajahan tohu obai kaitn totap kuat pocayo. Aku tajahan tohu kaitn bosatu hati ongko bojuakng bosamo pakai' kopocaya'an inyo sosuai agatn Kabar Boi' nantai.

Kolose 3:5

Obai nantai, kaitn gola' momastian caro hidup kaitn inyo manah nantai bondar-bondar udah mati. Jangan dikuaso'i boko kohonda' duniawi, sama'an: bomporajoan, boko kolaku'an inyo kinyo sonunuh, hawa napsu, kohonda' jahat, kaha' agatn duit. Kohonda' pakai' duit nantai samo ja'am agatn monyombah boko duato.

1 Tesalonika 4:3

Ninam kohonda' Allah oca' hidup kito mongkitn suci. Rotinyo, co ulih molaki-mbini bolupm dipojadi.

1 Tesalonika 4:7

Allah kinyo moningkau kito pakai' hidup dalapm dosa molaki-mbini bolupm dipojadi. Sio moningkau kito oca' kito hidup mongkitn suci.

1 Timotius 2:10

Apo caro inyo bondar bopakaian agatn bulah koboi'an. Caro nianam inyo soharusnyo dilabuhan somuo botina' inyo mongaku'i obai sia' monyombah Allah.

1 Timotius 3:3

Io co ulih jadi urakng pomabu'. Io co ulih jadi urakng inyo hala boporap apo gola' lomah-lombut. Io co ulih jadi urakng ponggodian. Io co ulih kaha' agatn duit.

1 Timotius 6:10

Jadi, kaha'-kolobu' agatn duit bulah urakng molabuhan somuo macapm kojahatan. Ado boko urakng inyo udah kaha'-kolobu' agatn duit. Obai nantai, sia' udah co pocayo agi' ko Yesus. Sia' bulah diri sia' siku' ajab sonsaro. Samo sama'an sia' monuhu' diri sia' siku' agatn sundakng.

2 Timotius 3:2

Boko urakng paca'an mondoholuan kohonda' diri sia' siku'. Sia' paca'an kaha'-kolobu' agatn duit. Sia' paca'an buhau, hala moninggian diri, hala mohayam urakng bukai, hala co monaati urakng tuho sia'. Sia' co tohu botorima' kasih, co honda' hidup mohormati Allah.

Titus 1:11

Kolai gola' monongga'an sia'. Jangan molongahan sia' moajaran boko hal inyo sobondarnyo co ulih diajaran. Obai ajaran sia' udah bulah banya' koluarga disosatan. Sia' ngontumbuki urakng agatn ajaran sia', oca' sia' mondapat'an untukng.

Titus 1:7

Siku' urakng pongawas jomaat bokorojo moatur Rumah Allah. Obai niannam, io gola' hidup bujur bondar. Io culih buhau. Io culih copat godi damo urakng inyo pomabu'. Io culih gala' bokolohi damo gala' ngontumbuki urakng oca' mondapat'an untukng.

Titus 2:3

Ubo nian jam agatn boko botina' inyo udah tuho. Ajaricam sia' pakai' hidup agatn caro inyo mohormati Allah. Sia' culih bojaha'i urakng bukai. Sia' culih gala' minum sampai mabu'. Sia' gola' mongajar boko hal inyo boi'.

Ibrani 12:16

Bojojago jam oca' jangan ado urakng di antaro kaitn inyo bodosa bomporajoan. Jangan ado inyo kinyo morogo'i borokat rohani doi' Allah sama'an inyo dilabuhan Esau ija' joman komai. Obai io ana' kojula'an io bohak mondapat borokat husus doi' bopainyo. Apo io monjual hak nantai bayo pakai' sopirikng pomakatn mo.

1 Petrus 5:2

Kobolo cam boko domba Allah inyo ado di kaitn. Kaitn gola' momimpitn sia' agatn sonang hati sosuai agatn kohonda' Allah. Jangan mooso toposo. Layati sia' obai kaitn bondar-bondar monulukng, bukainyo obai kaitn honda' bogoyap untukng.

2 Petrus 2:10

hususnyo boko urakng inyo moikuti hawa napsu inyo mombulah diri sia' kotor, huatan boko urakng inyo co mohormati kuaso Allah atas sia'. Boko guru palsu nantai kotakng borani huatan buhau sampai sia' kinyo gola' mohanyam boko mahluk inyo bokuaso.

2 Petrus 2:14

Sia' kinyo kalo suah bulah dosa. Mato sia' hala moncari' boko botina' inyo gala' bomporajoan. Sia' mompongaruhi boko urakng inyo bolupm pocayo agatn kuat. Hati sia' udah tolatih monjadi tama'. Jadi, Allah pasti mohukupm sia'!

2 Petrus 2:3

Obai boko guru palsu nantai tama', jadi sia' paca'an bousaha moncari' untukng doi' kaitn agatn boko kisah inyo dipulah-pulah sia'. Apo, Allah udah manaham siap mohukupm sia'. Kinyo manah agi' sia' tajahan bonaso.

Wahyu 2:14

Apo, Aku moolikan kaitn obai boboropo hal ni'in: Ado boboropo urakng di antaro kaitn inyo tuyut ajaran salah samo sama'an ajaran Bileam joman komai. Bileam mongajar Balak pakai' bulah urakng Israel jatu' ko dalapm dosa, ia'an oca' sia' bopua' dagikng doi' bonatakng inyo diposombahan ko songiang-duato, ongko oca' sia' bulah dosa bomporajoan.

Wahyu 2:21

Aku udah moonju' botina' nantai watu pakai' moninggalan boko dosanyo. Apo, io co honda' botongga' bulah dosa bomporajoan.

Wahyu 21:8

Apo boko urakng ponggola'an, boko urakng inyo kinyo pocayo, boko urakng inyo jahat, boko urakng pombunuh, boko urakng inyo bodosa pombotina', boko tukakng sihir, boko urakng inyo monyombah lompatukng, boko urakng tumbukan, somuo sia' paca'an ditikapan ko dalapm loutan api inyo tongahan bonyalo agatn bolerang. Nantai damonyo komatian koduo, ia'an mati pakai' somanah-manahnyo.”

Wahyu 22:15

Apo somuo urakng bukai paca'an tinggal di luar. Ia'an somuo urakng inyo jahat samo sama'an kudu', boko tukakng sihir, boko urakng inyo bodosa bomporajoan, boko urakng inyo mombunuh, boko urakng inyo monyombah lompatukng, boko urakng inyo gala' bulah kotumbukan huatan molabuhannyo.

Wahyu 9:21

Sia' pan co honda' moninggalan boko dosa sia' inyo bukai, ia'an mombunuh, momakai ilmu sihir, bulah dosa bomporajoan, huatan mongolit.