Efesus 4:17 - Porjanjian Boharu Torjomahan Baso Dilakng Soari-ari

¹⁷ Obai nantai aku momandiran ni'in, malahan aku monyiuh kaitn dalapm Tuhatn: Jangan agi' hidup sama'an boko urakng inyo kinyo mongonal Allah. Pikiran sia' sia-sia.

Efesus 4:17 ပူးပေါင်းရင်းမြစ်များ

Roma 1:21

Sia' mongotohu'i mongona'i Allah, apo sia' kinyo momuliaan Sio sobagai Allah. Sia' pan co moucap sukur ko Sio. Sobali'nyo, pomikiran sia' monjadi pocumo. Hati sia' inyo budu monjadi potakng sampai kinyo ulih mongoroti mongona'i Allah.

2 Petrus 2:18

Obai, sia' mongajar agatn pomandiran solah-olah sia' kotakan pintar, apo sobondarnyo pomandiran sia' conyiant gunonyo. Agatn caro nantai, sia' mompongaruhi boko urakng pakai' moikuti hawa napsu inyo jahat, ia'an boko urakng inyo hoyu' pan koluar doi' kobiasa'an boko urakng inyo hidup agatn caro inyo salah.

Kolose 2:4

Aku momandiran boko hal nantai oca' urakng bukai co ulih mongontumbuki kaitn agatn pomandiran inyo manis.

1 Petrus 1:18

Kaitn udah ditobus-Nyo oca' kaitn dibebasan doi' caro hidup inyo sia-sia, ia'an caro hidup inyo angki-bayatn kaitn ajaran ko kaitn. Tobusan nantai dibayar bukainyo agatn barakng inyo mudah rusa' sama'an pira' damo omas.

Kisah Boko Rasul 20:21

Aku hala mongajar agatn torus torakng, boi' ko boko urakng Yahudi huatan ko boko urakng Yunani oca' sia' botongga' bulah dosa huatan hidup monyonangan hati Allah. Sia' gola' pocayo ko Yesus, Tuhatn inyo bokuaso pucu' kito.

Kisah Boko Rasul 18:5

Lopas nian, Silas ongko Timotius datakng doi' propinsi Makedonia. Jadi, Paulus ulih momakai somuo watunyo pakai' momboritoan ko somuo urakng inyo boagama Yahudi. Paulus momboritoan agatn jolas obai Yesus nantai Rajo Inyo Dijanjian Allah.

Kisah Boko Rasul 14:15

“Boko pokawalan, jangan kaitn molabuhan nantai. Koi bayo urakng biaso, samo ubo kaitn. Koi datakng ko si'itn pakai' momboritoan Kabar Boi' mongona'i Yesus ko kaitn. Koi honda' oca' kaitn ongkah monyombah Allah inyo hidup ja'am, bukainyo boko duato inyo kinyo boguno. Allah inyo bulah langit, bumi, lout ongko agatn somuo isinyo.

2 Timotius 4:1

Dinga'anbo! Kristus Yesus momorintah dalapm Koraja'an Allah somanah-manahnyo. Sio paca'an datakng bobali' agi' ko dunia ni'in. Watu nantai, Sio paca'an mohakipi somuo urakng, boi' urakng inyo ija' hidup honda' pan urakng inyo udah mati. Obai nantai dihadapan Kristus Yesus huatan Allah moonji'i boko potunju' ni'in ko kolai:

1 Timotius 6:13

Allah moonji'i hidup ko somuo hal. Kristus Yesus momandiran la'apo inyo bondar mongona'i diri-Nyo siku' timpu Sio diadili di hadapan Pontius Pilatus. Jadi, di hadapan Allah huatan Kristus Yesus aku monyiuh ko kolai:

1 Timotius 5:21

Di hadapan Allah, Kristus Yesus, ongko boko molekat inyo dipilih Allah, aku momorintah kolai: turuticam boko porintah nantai ongko co momihak ko boko urakng totontu.

1 Tesalonika 4:6

Dalapm hal ni'in, jangan jam bulah dosa ko somadikan bukainyo inyo pocayo ko Yesus. Jangan monggogadati io. Obai Tuhatn paca'an mohukupm boko urakng inyo bulah dosa sama'an nantai. Sokomai, koi udah kalo moingant'an kaitn agatn togas mongona'i hal nantai.

Kolose 2:18

Ado urakng inyo pompadah rondah hati huatan monyombah boko molekat. Jangan biaran urakng sama'an nantai bulah kaitn pocayo ajaran inyo salah, sampai kaitn co dapat borokat doi' Allah. Urakng sama'an nantai buhau agatn mongatoan io ado boko poniant'an doi' Allah. Apo sobondarnyo pikirannyo duniawi inyo bulah io buhau.

Efesus 4:22

Kaitn diajar pakai' moninggalan caro hidup kaitn inyo manah nantai, ia'an kohidupan kaitn inyo monjadi rusa' obai kaitn monjumpati boko kohonda' inyo monipu kaitn.

Efesus 1:22

Allah udah mombulah somuo hal tundu' di babah kuaso Kristus. Sio udah moonju' Kristus ko somuo urakng pocayo sobagai Tuhatn inyo bokuaso doi' somuo hal. Sio sama'an Kopala'

Galatia 5:3

Sokali agi' aku mongatoan ko kaitn. Somuo urakng inyo moonju' dirinyo pakai' disunant, sia' gola' monaati somuo Hukupm Torat.

Galatia 3:17

Masud aku ubo ni'in: Allah udah tolobih doholu monsahan janji-Nyo. Hukupm Torat dionju' ko Musa ompat ratus tigo puluh tohutn lopas nantai. Jadi, Hukupm Torat nantai kinyo ulih mombalakan janji Allah doi' komai. Janji Allah nantai ija' bolaku.

2 Korintus 9:6

Ingantcam porbaso ni'in: Urakng inyo monugalan bonih sodikit, io pan paca'an bohanyi sodikit jam. Apo urakng inyo monugalan bonih banya', io pan paca'an bulih padi.

1 Korintus 15:50

Boko somadikan, ni'in inyo pontikng pakai' dikotohu'i: Bukakng-tubuh kito ni'in, ia'an dagikng huatan darah, kinyo ulih mansu' Koraja'an Allah nononyo. Bukakng-tubuh kito ni'in dapat mati. Jadi, bukakng-tubuh sama'an ni'in kinyo dapat hidup somanah-manahnyo.

1 Korintus 1:12

Masudku, ado di antaro kaitn inyo bopandir, “Aku urakng doi' kolompok Paulus.” Ado inyo bukai bopandir, “Aku urakng doi' kolompok Apolos.” Damo “Aku urakng doi' kolompok Petrus.” Ado inyo bukai agi' inyo bopandir, “Aku urakng doi' kolompok Kristus.”

Kisah Boko Rasul 2:40

Petrus bisi banya' pomandiran inyo bukai agi' pakai' monguat'an hati sia' huatan moingant'an sia'. Katonyo, “Allah tajahan monjatu'an hukupan ko boko urakng joman ni'in inyo jahat. Culih hala sonjumpat'an sia' oca' kaitn disolamant'an doi' hukupan nantai.”

Lukas 16:28

Aku bisi lima' urakng somadikan inyo ija' hidup di dunia. Siuh Lazarus momporingant'i sia' pakai' botongga' bulah dosa huatan hidup monyonangan hati Allah oca' nononyo lopas jadi mati, sia' co mansu' ko tompat ajab sonsaro ni'in jam.’