Efesus 4:12 - Porjanjian Boharu Torjomahan Baso Dilakng Soari-ari

¹² Kristus moonji'i boko komampuan nantai oca' sia' ulih mombulah somuo urakng bukai inyo pocayo monjadi mampu pakai' molayati Sio. Agatn sama'an nantai, soluruh jomaat botumbuh huatan monjadi kuat dalapm Kristus.

Efesus 4:12 ပူးပေါင်းရင်းမြစ်များ

Efesus 4:16

doi' somuo anggota bukakng-tubuh inyo tosusutn rapi huatan bohubukan kuat agatn boko anggotanyo. Aman sotiap anggota bokorojo sosuai agatn komampuan husus inyo dionju'nyo, jadi Kristus mombulah soluruh bukakng-tubuh botumbuh dalapm kasih.

1 Korintus 12:27

Kaitn kolompok urakng inyo pocayo samo sama'an sobukakng-sotubuh, ia'an bukakng-tubuh Kristus. Kaitn siku'-monyiku' nantai bagian doi' bukakng-tubuh-Nyo nantai.

Roma 15:14

Boko somadikanku, aku kotakng yakitn obai kaitn kotakan boi' ongko mongotohu'i somuo inyo dipontikan. Jadi, kaitn ulih momadahi siku'-monyiku'.

1 Korintus 14:26

Jadi ubo ni'in boko somadikan: Watu kaitn bokumpul pakai' sombayakng, ado inyo monyanyi lagu pujian, ado inyo moajaran sosuatu, ado inyo monyampaian sosuatu inyo Allah poniant'an ko io, ado inyo bopandir pakai baso roh, ado inyo monjolasan roti doi' pomandiran dalapm boko baso nantai. Somuo nantai gola' dilabuhan pakai' monguat'an urakng bukai.

Roma 14:19

Obai nantai, kito gola' bousaha oca' porbuatan kito mombulah somuo kito hidup agatn damai. Kito gola' bousaha monulukng urakng bukai pakai' lobih kuat pocayo ko Yesus.

1 Timotius 1:12

Aku bosukur ko Kristus Yesus, Tuhatn inyo bokuaso. Sio hala moonji'i kokuatan ko aku pakai' molayati Sio. Aku bosukur obai Sio moanggap aku sotia. Jadi Sio momilih aku pakai' momboritoan Kabar Boi' mongona'i Sio.

1 Korintus 14:12

Ubo nian jam agatn kaitn. Memang kaitn kotakng honda' dionji'i boko komampuan husus doi' Roh Allah. Apo, soharusnyo kaitn mongohonda'i boko komampuan husus nantai oca' kaitn sobondarannyo ulih monguat'an urakng bukai inyo pocayo.

Ibrani 13:17

Kaitn gola' monaati boko pomimpitn kaitn. Tundu'cam ko sia'. Obai, sia' inyo bojago-jago agatn jiwa kaitn. Sia' gola' botanggukng jawab ko Allah pakai' polayatan sia' nantai. Taat'icam sia' oca' sia' ulih molayati agatn sonang hati. Aman kaitn kinyo monaati sia', sia' paca'an salu' ongko nantai kinyo boguno pakai' kaitn.

Ibrani 6:1

Obai nantai, mara am kito maju agatn boko ajaran mongona'i Sio inyo mombulah kito lobih botumbuh monjadi dewasa dalapm Kristus. Jangannam kito moulaki agi' boko ajaran dasar, ia'an ajaran obai urakng gola' botongga' molabuhan boko hal inyo pocumo huatan pocayo cam ko Allah,

2 Korintus 6:3

Koi kinyo honda' polayatan koi disalahan. Obai nian, koi bousaha kinyo moonji'i alasan ko sosopo pan pakai' molabuhan hal nantai.

2 Korintus 5:18

Somuonyo nantai dilabuhan Allah. Molalu'i Kristus, Allah udah bulah kito bodamai agi' agatn diri-Nyo. Allah jam moutus koi pakai' monulukng urakng bukai oca' sia' ulih bodamai agi' agatn Sio.

Lukas 22:32

Apo Aku udah bodoa pakai' kolai, Simon, oca' kolai totap pocayo ko Aku. Watu kolai bobali' sotia agatn Aku, kolai gola' monguat'an iman boko somadikan kolai, ia'an boko murid-Ku.”

2 Timotius 4:5

Apo kolai gola' hala bopikir agatn jolas dalapm somuo hal. Botahatncam mohadapi ajab sonsaro. Boritoancam Kabar Boi' ko boko urakng inyo bolupm kalo mondinga'nyo. Labuhancam somuo tugas dalapm polayatan kolai.

Kolose 4:17

Lopas nantai sampaian posatn ni'in ko somadikan kito Arkhipus, “Pontiat'ancam boboi' oca' kolai monyolosaian tugas polayatan inyo Tuhatn onju' ko kolai.”

Kolose 1:28

Kristus nantaiam inyo koi boritoan watu koi momakai somuo kopintar-corodi'an pakai' monosihat'i huatan mongajar sotiap urakng. Tujuannyo oca' koi ulih mombaba' sotiap urakng ko Allah dalapm koadaan suci obai bosatu agatn Kristus.

Kolose 1:24

Ni'in, aku rindakng-rigah obai aku ulih ajab sonsaro pakai' monulukng kaitn. Aku mooso'i ajab sonsaro Kristus inyo ija' gola' dioso'i. Aku ajab sonsaro dibukakng-tubuhku pakai' monulukng bukakng-tubuh Kristus, ia'an somuo urakng inyo pocayo ko Sio.

Efesus 1:23

ongko kito inyo pocayo sama'an bukakng-tubuh-Nyo. Sio momonuhi kito, ia'an Sio inyo momonuhi somuo hal.

2 Korintus 12:19

Somanahan ni'in, kaitn bopikir obai koi bousaha mombela diri tohadap kaitn. Apo, boko somadikan inyo ku kasihi, sobondarnyo ninam tujuan koi: (Koi mongatoan ni'in di hadapan Allah ongko sobagai urakng inyo hidup di dalapm Kristus.) Somuo inyo koi labuhan ia'an pakai' monulukng kaitn somongkitn kuat pocayo agatn Tuhatn.

2 Korintus 7:1

Boko somadikan inyo ku kasihi! Somuo janji Allah nantai pakai' kito. Obai nantai, marabo kito monjago bukakng-tubuh ongko roh kito oca' borosih doi' somuo hal inyo jahat. Agatn sama'an nantai, kito mongkitn hidup husus pakai' Allah kapikng kito gola' agatn Sio.

2 Korintus 4:1

Allah monunju'an kasih sayang-Nyo dalapm polayatan ni'in ko koi. Obai nantai, koi co putus asa.

2 Korintus 3:8

tontu pojanjian inyo dionju' Roh Allah datakng agatn komulia'an inyo lobih bosar agi'.

1 Korintus 14:14

Aku momandiran nantai obai aman ado urakng inyo bopandir pakai baso roh, memang rohnyo inyo bodoa. Apo akal budinyo kinyo dipakai.

Roma 15:29

Aku tohu timpu aku datakng monjongu' kaitn, aku tajahan mombaba' banya' borokat doi' Kristus pakai' kaitn.

Roma 12:7

Aman ado urakng inyo dionji'i komampuan husus pakai' molayati urakng bukai, io gola' molayati. Aman ado urakng inyo dionji'i komampuan husus pakai' mongajar, io gola' mongajar.

Kisah Boko Rasul 20:28

Kaitn gola' monjago diri kaitn huatan urakng bukai inyo udah pocayo agatn Yesus oca' totap pocayo. Allah udah monobus monsio doi' hukupan dosa agatn darah-Nyo sikuꞌ. Jadi, sia' udah monjadi umant Allah siku'. Kaitn udah dipilih Roh Allah pakai' momimpitn sia' nantai. Obai nantai, kaitn gola' monjago sia' samo sama'an gombala monjago kabatn dombanyo.

Kisah Boko Rasul 20:24

Apo aku co poduli. Biar pan aku dibunuh, aku totap co poduli. Tuhatn Yesus udah moonji'i tugas ko aku pakai' momboritoan Kabar Boi' obai Allah udah monyatoan koboi'an-Nyo ko monsio. Aku gola' monyolosaian tugasku nantai. Nianam inyo pontikng, bukainyo hidup aku.

Kisah Boko Rasul 11:23

Pas Barnabas tuntukng ko su'utn, io moniant caro kohidupan sia' borubah obai Allah bulah koboi'an ko sia'. Obai nantai Barnabas mooso kotakan rindakng. Io monguat'an hati sia' oca' sia' somuo totap pocayo huatan monaati ko Tuhatn Yesus agatn soponuh hati.

Kisah Boko Rasul 9:31

Lopas nantai somanah boboropo watu, boko urakng inyo pocayo Yesus di soluruh doerah Yudea, doerah Galilea, huatan doerah Samaria ulih hidup agatn sonang-asau. Co nyiant inyo mondorako'i sia'. Roh Allah monulukng huatan monguat'an sia'. Obai nantai, mongkitn manah mongkitn banya' urakng inyo pocayo agatn Yesus. Sia' somuo hidup agatn ponuh oso hormat ko Tuhatn inyo bokuaso.

2 Timotius 4:11

Ni'in pan bayo Lukas inyo ija' bosamo agatn aku. Watu kolai datakng, pocaki Markus oca' io tuyut bosamo kolai. Aku honda' io datakng jam obai io monjadi urakng inyo monulukng dalapm polayatan.

Efesus 4:29

Aman kaitn bopandir, jangan momakai boko pandir inyo jahat. Apo pakaicam boko pandir inyo boi' pakai' monguat'an hati urakng bukai sosuai agatn kopontikan sia'. Agatn sama'an nantai boko urakng inyo mondinga' pandir nantai bodapat koboi'an.

Efesus 4:4

Obai, somuo kito inyo pocayo samo sama'an sobukakng-sotubuh. Ongkah ado siku' Roh Allah. Sama'an nian jam kaitn inyo ditingkau ado sobuah harapan inyo samo, ia'an kaitn yakitn moharap'an somuo inyo dijanjian Allah ko kito.

2 Korintus 13:9

Apo koi sonang bondar aman koi kotiat'annyo lomah sama'an nantai. Ni'inan koi doa'an, ia'an oca' kaitn bobondar hidup sobagai boko urakng inyo pocayo.

1 Korintus 12:7

Allah moonji'i komampuan husus ko masikng-masikng kito. Nantai mombutian obai Roh-Nyo bokorojo di dalapm masikng-masikng urakng inyo pocayo. Apo somuo komampuan husus nantai dionji'i pakai' kountukan bosamo.

Roma 12:5

Ubo nian jam agatn kito. Kito banya' urakng, apo kito samo sama'an sobukakng dalapm Kristus. Masikng-masikng kito ado hubukan agatn anggota inyo bukai.

2 Korintus 13:11

Ahirnyo boko somadikanku bosonang nyaman cam! Bousaha cam hidup bobondar sobagai urakng inyo pocayo. Taat'icam boko nosihatku. Hidupcam sohati sopikiran, ongko hidup cam sonang-asau agatn siku'-monyiku'. Aman kaitn molabuhan nantai, jadi Allah paca'an momborokati kaitn. Sionam inyo sumber kasih ongko sonang-asau.