Efesus 2:18 - Porjanjian Boharu Torjomahan Baso Dilakng Soari-ari

¹⁸ Kito doi' koduo pihak nantai ulih datakng ko Allah Bopai agatn caro inyo samo, ia'an molalu'i Kristus. Somuo kito dionji'i Roh Allah inyo samo inyo mombulah nantai tojadi.

Efesus 2:18 ပူးပေါင်းရင်းမြစ်များ

Matius 28:19

Obai nantai, botula'cam ko somuo banso. Ajaricam boko urakng oca' sia' monjadi murid-Ku. Baptiscam sia' dalapm damo Bopai, Ana', huatan Roh Allah pakai' monunju'an obai sia' pocayo ko Allah Bopai, pocayo ko Yesus, huatan Roh Allah.

Yohanes 10:7

Obai nantai Yesus bopandir agi', “Pondinga'an bobondarcam inyo Ku pandiran ni'in: Aku ninam samo agatn lawakng kandakan pakai' domba nantai.

Yohanes 10:9

Aku ninam lawakngnyo. Sotiap urakng inyo mansu' molalu'i Aku, io paca'an solamant. Io paca'an koluar-mansu', monomuan padakng rumput.

Yohanes 14:6

Kato Yesus ko io, “Aku samo sama'an jalatn inyo bondar pakai' mongonal Allah, jalatn inyo monuju ko kohidupan inyo sobondarnyo. Aman ado urakng inyo honda' datakng ko Allah Bopai, ongkah molalu'i Aku am jalatnnyo.

Roma 5:2

Obai kito pocayo ko Yesus, jadi kito jam ulih moalapi koboi'an inyo Allah torus-monorus ditunju'an ko kito. Nantaiam koadaan hubukan kito agatn Allah watu ni'in. Apo kito jam sonang-nyamanam obai kito yakitn moharapan obai nono kito paca'an mondapat'an hidup inyo mulia bosamo Allah di sorugo.

Roma 8:15

Komainyo, kaitn samo sama'an pacal inyo ponggola'an. Apo, Roh Allah inyo dionju' ko kaitn kinyo bulah kaitn monjadi samo sama'an nantai agi'. Roh Allah bulah kaitn monjadi poana'an Allah. Obai Roh-Nyo nantai, kito moningkau, “Oi Allah! Duatn Bopaiku!”

1 Korintus 8:6

Apo pakai' kito, bayo ado siku' mo Allah, ia'an Allah Bopai kito. Sio inyo monjadian somuo hal. Kito hidup pakai' monyombah Sio. Pakai' kito, bayo ado siku' Tuhatn, ia'an Yesus Kristus. Somuo hal dipulah molalu'i Yesus Kristus. Kito bodapat hidup inyo sobondarannyo obai Yesus Kristus.

Galatia 4:6

Obai kito boko poana'an Allah, ongko Sio moutus Roh Ana'-Nyo ko kito. Roh-Nyo mansu' ko dalapm hati kito. Roh-Nyo bulah kito bodoa somombondarnyo agatn mongatoan, ‘Bopai, oi Bopaiku’.

Efesus 3:12

Obai kito pocayo ko Kristus, jadi di dalapm Sio, kito bebas datakng ko Allah. Kito kinyo paca'an gola'.

Efesus 3:14

Obai nantai aku tundu' monyungkapan di hadapan Allah Bopai.

Efesus 4:4

Obai, somuo kito inyo pocayo samo sama'an sobukakng-sotubuh. Ongkah ado siku' Roh Allah. Sama'an nian jam kaitn inyo ditingkau ado sobuah harapan inyo samo, ia'an kaitn yakitn moharap'an somuo inyo dijanjian Allah ko kito.

Efesus 6:18

Kaitn gola' hala waspada oca' sotiap watu kaitn ulih bodoa agatn dibimbikng Roh Allah. Pakaicam somuo macapm doa huatan pomuhunan ko Allah. Jangan botongga' bodoa pakai' somuo urakng inyo pocayo.

Kolose 1:12

inyo kaitn labuhan agatn rindakng-rigah huatan bosukur ko Allah Bopai. Sio inyo bulah kaitn cucu' mondapat'an sobagi'an doi' somuo inyo disodiaan Allah. Ia'an, somuo inyo Sio sodia'an pakai' umant-Nyo di Korajaan-Nyo inyo torakng.

Ibrani 7:19

Hukupm Torat nantai kinyo ulih mombulah siku' monsio pan monjadi sompurna di hadapan Allah. Apo watu ni'in, molalu'i Yesus, kito dionji'i harapan inyo lobih boi'. Agatn sama'an nantai, kito ulih datakng dampikng ko Allah.

Yakobus 3:9

Agatn lidah, kito momuji Allah, Tuhatn huatan Bopai kito. Apo agatn lidah, kito pan moncolakoan urakng bukai. Padohal Allah mombulah sia' sorupo agatn Sio.

1 Petrus 1:17

Allah mohakipi somuo urakng sosuai agatn porbuatan sia' siku'-monyiku'. Sio kinyo momihak boko urakng totontu. Jadi, aman kaitn monyobut Sionam Bopai kaitn, jadi kaitn gola' hidup mohormati Sio, somanah kaitn monumpakng sobagai urakng asikng di dunia ni'in.

1 Petrus 1:21

Ia'an, kaitn dapat monjadi pocayo ko Allah obai porbuatan Kristus nantai. Allah udah bulah Sio hidup agi' doi' antaro urakng mati lalu mombulah Sio monjadi mulia. Agatn ubo nantai, kaitn pocayo huatan boharap ko Allah.

1 Petrus 3:18

Obai, Kristus udah mati sokali pakai' somuo dosa kito. Sio kinyo bodosa, apo Sio mati pakai' boko urakng inyo bodosa oca' Sio mombimbikng kito ko Allah. Sio inyo udah dibunuh dalapm koadaan-Nyo sobagai monsio, apo Roh Allah mombulah Sio hidup agi'.

Yudas 1:20

Apo, kaitn, boko somadikan inyo ku kasihi, bousahacam oca' kaitn botambah kuat pocayo ko ajaran inyo bondar-bondar doi' Allah. Bodoa cam dalapm Roh Allah.