Efesus 2:14 - Porjanjian Boharu Torjomahan Baso Dilakng Soari-ari

¹⁴ Sio nam inyo mombulah kito bodamai. Komainyo urakng Yahudi bokonjahatan agatn urakng bukainyo Yahudi. Apo Kristus mombulah somuo kito inyo pocayo doi' duo pihak nantai monjadi satu umant. Umpamonyo Sio morobahan tembok inyo momisahan kito.

Efesus 2:14 ပူးပေါင်းရင်းမြစ်များ

Galatia 3:28

Kaitn somuo monjadi satu dalapm Kristus Yesus. Allah kinyo monyongkayoan antaro urakng Yahudi damo urakng bukainyo Yahudi; antaro hulutn damo urakng bebas; antaro lolaki damo botina'.

Kolose 3:11

Dalapm hidup boharu ni'in, bukai-mombukai antaro urakng kinyo pontikng, contohnyo antaro urakng Yahudi agatn urakng inyo bukainyo urakng Yahudi, antaro urakng bosunant agatn urakng inyo kinyo bosunant, antaro urakng doi' banso Barbar inyo co dikonal agatn urakng doi' banso Skit inyo dorako, antaro hulutn agatn urakng bebas. Apo inyo palikng pontikng ia'an Kristus. Sio ado di dalapm boko urakng inyo pocayo.

Kolose 3:15

Kaitn samo sama'an sobukakng-sotubuh. Allah moningkau kaitn pakai' hidup dalapm sonang-asau agatn inyo bukai. Obai nantai, kohonda'nyo sonang-asau doi' Kristus monguaso'i hati kaitn. Bukai doi' nantai, bosukurcam ko Allah.

Efesus 2:15

Komainyo urakng Yahudi monaati somuo porintah huatan poraturan di Hukupm Torat oca' dosa sia' diamputi ongko sia' ulih bodamai agi' agatn Allah. Apo watu Kristus monjadi monsio huatan mati di kayu salib, Sio mombulah agatn caro nantai kinyo ulih di pakai' agi', obai Sio inyo monanggukng hukupan dosa somuo urakng. Agatn sama'an nantai, Sio mombulah oca' somuo urakng inyo pocayo doi' duo pihak nantai, urakng Yahudi ongko urakng bukainyo Yahudi, sia' ulih bodamai agi' agatn Allah. Kristus molabuhan somuo nantai oca' sia' monjadi satu umant inyo boharu di dalapm Sio. Boko urakng inyo pocayo doi' duo pihak nantai bodamai agatn inyo bukainyo. Sia' kinyo bokonjahatan agi' obai porbuatan Kristus di kayu salib.

Kolose 1:20

Allah pan bulah somuo hal ulih bokomboi'an agi' agatn Sio. Ia'an, somuo hal di bumi huatan di sorugo. Allah molabuhan nantai agatn darah Kristus inyo mati di kayu salib.

Kolose 2:20

Kaitn udah dibebasan doi' kuaso boko roh dunia ni'in. Kaitn moanggap kohidupan inyo manah nantai udah mati, ubonyo kaitn mati bosamo-samo agatn Kristus. Jadi, jangan kaitn hidup sama'an urakng inyo dikuaso'i ulih boko poraturan di dunia ni'in!

Roma 5:1

Watu ni'in, kito udah monjadi bondar obai kito pocayo ko Yesus. Jadi, kito ado damai agatn Allah. Nantai tojadi obai apo inyo Tuhatn Yesus Kristus labuhan pakai' kito.

Kisah Boko Rasul 10:36

Kaitn tohu obai Allah udah monyampaian Kabar Boi' ko koi banso Yahudi. Joman komai, Allah bojanji Sio paca'an moutus siku' urakng Rajo. Rajo nantai paca'an mombuka' jalatn oca' urakng ulih bodamai agatn Allah. Yesus nantai Rajo Inyo Dijanjian Allah. Yesus nantai Tuhatn inyo puku' somuo urakng di dunia.

Kisah Boko Rasul 10:28

Petrus bopandir ko sia', “Poraturan agama koi urakng Yahudi morarakng urakng Yahudi bokawal agatn urakng inyo bukai Yahudi sama'an kaitn. Koi pan culih usi'an ko tompat urakng inyo bukainyo urakng Yahudi. Kaitn somuo udah tohu nantai. Apo sokomai aku ado poniant'an. Allah monunju'an ko aku oca' jangan moanggap sopo pan purih sampai bopikir urakng nantai kinyo cucu' ditorima' Allah.

Ibrani 13:20

Aku bodoa ko Allah inyo moonji'i sonang-asau. Sio mombulah Tuhatn kito, Yesus, bobali' hidup doi' komatian. Agatn sama'an nantai, darah Yesus monsahan pojanjianinyo Allah pulah agatn monsio pakai' somanah-manahnyo. Yesus monjadi Gombala Agukng inyo mombimbikng kito, boko domba-Nyo.

Lukas 2:14

“Pujian pakai' Allah di sorugo, tompat Inyo Maho Tinggi. Sonang-asau di bumi pakai' monsio inyo monyonangan hati Allah.”

Yohanes 10:16

Apo ado jam boko domba bukai inyo bukainyo doi' kabatn domba ni'in inyo umputn-Ku. Aku gola' mombaba' sia' jam. Sia' paca'an mondinga'an saro-Ku. Somuo domba-Ku paca'an monjadi sokabatn agatn siku' pongombolo.

Ibrani 7:2

Lopas nantai, Abrahapm moonju' ko Melkisedek populuhan doi' somuo bando barakng inyo dirampas io watu boparakng nantai. Damo Melkisedek potamo-tamo boroti ‘rajo inyo bulah inyo bondar’. Ongko damo bukainyo ia'an ‘rajo inyo mombaba' sonang-asau’ obai io ia'an rajo Salem huatan Salem rotinyo ‘sonang-asau’.

Efesus 4:16

doi' somuo anggota bukakng-tubuh inyo tosusutn rapi huatan bohubukan kuat agatn boko anggotanyo. Aman sotiap anggota bokorojo sosuai agatn komampuan husus inyo dionju'nyo, jadi Kristus mombulah soluruh bukakng-tubuh botumbuh dalapm kasih.

Efesus 3:15

Sio ia'an Bopai sotiap koluarga di sorugo ongko di bumi. Obai, somuo kito ado ongkah obai Sio nam.

Yohanes 16:33

Aku momadahan somuonyo nantai ko kaitn oca' hati kaitn ado sonang-asau obai kaitn bosatu agatn Aku. Kaitn paca'an mondorita' di dunia ni'in. Apo, pontokuhancam hati kaitn! Aku udah mongalahan kuaso di dunia ni'in!”

Yohanes 11:52

Bukainyo pakai' banso nantai ja', apo Sio mati oca' somuo poana'an Allah inyo topisah-pisah somuonyo, ulih bokumpul monjadi satu.

Efesus 2:17

Kristus udah datakng momboritoan obai boko urakng ulih bodamai agi' agatn Allah. Sio momboritoan nantai ko kaitn boko urakng bukainyo Yahudi inyo jouh doi' Allah ongko ko sia'boko urakng Yahudi inyo dampikng.