3 Yohanes 1:5 - Porjanjian Boharu Torjomahan Baso Dilakng Soari-ari

⁵ Somadikanku inyo tokasih, kolai sotia ko Tuhatn agatn somuo potulukan inyo kolai onju' ko boko somadikan kito. Kolai monulukng sia' biar pan kolai co mongonal sia'.

3 Yohanes 1:5 ပူးပေါင်းရင်းမြစ်များ

Matius 24:45

“Sopo kironyo urakng inyo pintar-corodi' huatan sotia ko Aku? Sio samo sama'an siku' hulutn inyo sotia huatan pintar-corodi'. Habakngnyo moangkat io monjadi kopala' boko hulutn inyo bukai. Habakngnyo moonji'i tanggukng-jawab ko io pakai' bobagian pomakatn ko boko hulutn inyo bukai pado watunyo.

Matius 25:16

Hulutn inyo monorima' lima' ribu pingkai' duit nantai, lansukng botula' huatan monjadiannyo modal usaha. Io bodapat kountukan lima' ribu pingkai' duit agi'.

Lukas 12:42

Yesus monimbas, “Pongajaran-Ku nantai pakai' sotiap urakng inyo pintar corodi' ongko sotia agatn Aku. Io samo ubo hulutn inyo sotia ongko pintar-corodi'. Habakngnyo moangkatnyo monjadi kopala' boko hulutn bukainyo. Habakngnyo moonji'i tanggukng-jawab ko io pakai' moonji'i pomakatn ko boko hulutn bukainyo pas watunyo.

Kisah Boko Rasul 1:15

Lopas nantai boboropo ari, ado kiro-kiro soratus duo puluh urakng inyo pocayo ko Yesus bokumpul watu nantai. Petrus bodiritn di antaro sia' somuo. Katonyo,

Roma 12:13

Tulukngcam kopontikan boko urakng inyo pocayo ko Kristus. Kaitn gola' hala sonang hati monorima' urakng pocayo dalapm rumah kaitn.

Galatia 6:10

Obai nantai, huncapm kito bulah koboi'an sotiap kali ado kosompatan. Huncapm kito bulah koboi'an ko somuo urakng, hususnyo ko sosamo urakng inyo pocayo agatn Yesus.

Kolose 3:17

Nanam, somuo inyo kaitn labuhan, somuo inyo kaitn pandiran, kaitn gola' molabuhan somuonyo nantai agatn kuaso Yesus, Tuhatn kito. Labuhancam somuonyo kapikng bosukur ko Allah Bopai kito molalu'i Yesus sobagai porontaro.

Ibrani 13:2

Jangan hohatian moonji'i koluntukan ko urakng bukai. Obai, boboropo urakng udah molabuhan nantai, ongko sobondarnyo sia' moonji'i koluntukan ko boko molekat biar pan sia' kinyo tohu nantai.

3 Yohanes 1:10

Obai nantaiam, watu ku datakng nononyo, aku paca'an mombungkar somuo porbuatan inyo io pulah ia'an nantai io mongatoan inyo jahat ongko bulah kotumbukan mongona'i koi. Apo, porbuatan jahat nantai bolupm cukup pakai' io. Timpu boko somadikan datakng, io kinyo honda' monorima' sia'. Malahan, io morarakng boko urakng inyo honda' monulukng sia'. Aman ado boko urakng inyo honda' monulukng sia', io monundukng oca' boko urakng nantai koluar doi' jomaat.

3 Yohanes 1:3

Obai, boboropo somadikan datakng lalu momadahan mongona'i kolai, ia'an nantai obai kolai hidup sosuai agatn ajaran inyo bondar. (Memang ubo nianam caro hidup kolai.) Timpu sia' momadahannyo, nantai aku kotakan sonang.