2 Timotius 4:1 - Porjanjian Boharu Torjomahan Baso Dilakng Soari-ari

¹ Dinga'anbo! Kristus Yesus momorintah dalapm Koraja'an Allah somanah-manahnyo. Sio paca'an datakng bobali' agi' ko dunia ni'in. Watu nantai, Sio paca'an mohakipi somuo urakng, boi' urakng inyo ija' hidup honda' pan urakng inyo udah mati. Obai nantai dihadapan Kristus Yesus huatan Allah moonji'i boko potunju' ni'in ko kolai:

2 Timotius 4:1 ပူးပေါင်းရင်းမြစ်များ

Matius 16:27

Obai Ana' Monsio paca'an datakng agi' agatn kuaso Allah Bopai-Nyo huatan diiriki boko molekat-Nyo. Timpu nantai, Sio paca'an mombalas sotiap urakng sosuai agatn porbuatannyo.

Lukas 19:12

Kato-Nyo, “Ado siku' urakng bangsawatn. Io paca'an botula' ko nogori inyo jouh pakai' diangkat monjadi rajo. Lopas nantai io paca'an bobali', lalu momorintah di doerahnyo siku'.

Lukas 19:15

Apo bangsawatn nantai totap diangkat monjadi rajo nogori nantai. Kali udah pulakng, io monyiuh oca' datakng ko io boko hulutn inyo dionji'i duit nantai. Io honda' tohu boropo kountukan inyo sia' dapat siku'-monyiku' pakai' io.

Lukas 23:42

Lalu io bopandir agatn Yesus, “Ingantcam aku, watu Duatn monguaso'i somuo la'apo pan sobagai Rajo!”

Kisah Boko Rasul 10:42

Jadi, Yesus monyiuh koi pakai' momboritoan ko boko urakng. Koi disiuh monyampaian obai Allah udah momilih Yesus monjadi hakipm pakai' somuo urakng inyo hidup agatn urakng inyo mati.

Kisah Boko Rasul 17:31

Kito gola' moninggalan dosa obai Allah paca'an mohakipi somuo urakng agatn adil. Sio udah monontuan sombilo ponghakipan nantai paca'an tojadi. Sio jam udah momilih siku' Urakng pakai' monjadi Hakipm. Allah mombutian somuo nantai agatn caro mombulah Urakng nantai bobali' hidup doi' komatian.”

Roma 2:16

Nononyo hal nantai monjadi kotiat'an. Ia'an, timpu Allah molalu'i Kristus Yesus pakai' mohakipi somuo hal inyo tosimpatn dalapm hati monsio. Nantai sosuai agatn Kabar Boi' inyo aku boritoan.

2 Tesalonika 2:8

Hoyu' pado watu nantai Rajo inyo kotakng jahat nantai paca'an datakng. Apo, nono somuo kuasonyo paca'an dikalahan Yesus, Tuhatn di pucu' somuo hal. Yesus paca'an datakng agatn kuaso-Nyo. Yesus paca'an mombunuhnyo agatn pomandiran-Nyo mo.

1 Timotius 5:21

Di hadapan Allah, Kristus Yesus, ongko boko molekat inyo dipilih Allah, aku momorintah kolai: turuticam boko porintah nantai ongko co momihak ko boko urakng totontu.

2 Timotius 1:10

Watu ni'in, Allah monunju'an koboi'an-Nyo ko kito agatn kodatakan Kristus Yesus, Ponyolamant kito. Molalu'i Kabar Boi' nantai, Sio udah mongalahan kuaso komatian huatan moonji'i kito hidup inyo somanah-manahnyo di sorugo.

2 Timotius 2:14

Kolai gola' torus moingant'an jomaat mongona'i boko hal nantai. Nosihat'icam sia' agatn togas, Allah moniant porbuatan kito. Jadi, padohan botikakng mongona'i boko sotilah. Co nyiant gunonyo. Malah, pomandiran sama'an nantai monyosat'an boko urakng inyo mondinga'an nantai.

2 Timotius 4:18

Tuhatn paca'an monyolamant'an aku doi' somuo usaha urakng jahat. Sio paca'an mombaba'ku agatn solamant ko dalapm Korajaan-Nyo di sorugo. Huncapm kito momuji Sio somanah-manahnyo. Amin!

2 Timotius 4:8

Tuhatn udah monyiap'an hadiah inyo bondar ko aku. Sio nantai Hakipm inyo paca'an mohakipi somuo urakng agatn adil. Watu nantai, Sio paca'an moonji'i hadiah nantai pakai' aku huatan somuo urakng inyo rindu Sio datakng bobali' agi' ko dunia ni'in.

Titus 2:13

kapikng kito monantian ari kodatakan Allah inyo Maho Kuaso ongko Ponyolamant kito, Yesus Kristus, ia'an ari inyo kito harapan agatn rindakng-rigah,

1 Petrus 1:7

Tujuan doi' somuo kosusahan nantai ia'an pakai' mombutian aman kaitn bondar-bondar pocayo ko Tuhatn kata'an cadoai. Kopocaya'an kaitn nantai lobih borogo daripado omas. Biar pan kinyo tahatn somanahnyo, omas pan diuji agatn api pakai' mombutian aman omas nian murni kata'an cado. Jadi, kopocaya'an kaitn pan diuji jam. Agatn ubo nantai, aman kaitn bobondar pocayo, nononyo kaitn tajahannyo dipuji, dimuliaan, ongko dihormati, nantai tajahannyo tojadi watu Yesus Kristus datakng agi' monyatoan diri-Nyo.

1 Petrus 4:5

Apo sia' tajahan dihakipi. Sia' gola' moaku'i somuo dosa sia' ko Sio inyo mohakipi urakng inyo hidup ongko urakng inyo mati.

1 Petrus 5:4

Lalu, watu Kristus datakng, ia'an Gombala inyo moirikan somuo gombala, jadi kaitn paca'an mondapat'an mahkota inyo mulia. Mahkota nantai kinyo hilakng komulia'annyo.

2 Petrus 1:11

Kaitn tajahan dionji'i hak ponuh pakai' mansu' ko dalapm Koraja'an Yesus Kristus, ia'an Ponyolamant ongko Tuhatn kito. Korajaan-Nyo tajahan botahatn somanah-manahnyo.

2 Petrus 1:17

Koi ado bosamo agatn Sio di pucu' bukit inyo suci. Watu Allah Bopai-Nyo mohormati ongko momuliaan Sio. Allah inyo kotakan Bokuaso mongatoan, “Ninam Ana'-Ku inyo Ku kasihi. Io monyonangan hati-Ku.” Koi siku' mondinga' saro Allah doi' sorugo nantai.

1 Yohanes 2:28

Jadi, poana'anku! Kaitn gola' hidup bosatu agatn Kristus, oca' Sio datakng nononyo agi', kito co gola' huatan co malu mohadap Sio.

Wahyu 1:7

Porotiancam! Sio datakng di antaro boko awatn! Somuo urakng paca'an moniant Sio, tomansu' sia' inyo udah monuhu' Sio. Somuo banso di bumi paca'an monangis obai Sio. Au, pasti ni'in tajahan tojadi! Amin!