2 Timotius 3:10 - Porjanjian Boharu Torjomahan Baso Dilakng Soari-ari

¹⁰ Apo kolai udah mongotohu'i ajaranku. Kolai udah moniru caro hidupku. Kolai udah pocayo ko Yesus samo sama'an aku. Kolai udah moikuti tujuan hidupku. Kolai udah moniant aku sabar agatn urakng bukai huatan mongasihi sia'. Kolai udah mongotohu'i obai aku totap kuat

2 Timotius 3:10 ပူးပေါင်းရင်းမြစ်များ

Lukas 1:3

Doi' potamo borito mongona'i Yesus nantai, aku udah monyolidiki kotakan toliti somuonyo. Jadi, aku bopikir boi' aman buku ni'in aku tulis agatn toatur ko kolai.

Kisah Boko Rasul 11:23

Pas Barnabas tuntukng ko su'utn, io moniant caro kohidupan sia' borubah obai Allah bulah koboi'an ko sia'. Obai nantai Barnabas mooso kotakan rindakng. Io monguat'an hati sia' oca' sia' somuo totap pocayo huatan monaati ko Tuhatn Yesus agatn soponuh hati.

Kisah Boko Rasul 2:42

Sia' hala tuyut somuo ajaran boko rasul. Somuo sia' opat bokumpul bosamo boko urakng bukai inyo pocayo. Sia' opat makatn huatan bodoa bosamo.

Kisah Boko Rasul 20:18

Jadi, sia' datakng. Ongko, Paulus bopandir ko sia', “Kaitn tohu caro aku hidup somanah aku tinggal di antaro kaitn. Doi' ari potamo aku datakng di Asia sampai watu ni'in, kaitn udah tohu somuonyo.

Kisah Boko Rasul 26:4

Tangga'i aku ija' muda', aku tinggal di antaro bansoku urakng Yahudi di laman tompu'ku ni'in huatan di kota Yerusalem. Jadi, somuo sia' udah mongotohu'i caro hidupku komai.

Roma 16:17

Boko somadikan. Aku kotakng muhun ko kaitn oca' kaitn boboi'cam agatn boko urakng inyo honda' bulah popocahan di antaro kaitn. Sia' honda' oca' kaitn monjadi sosat. Ajaran sia' bolawatan agatn ajaran inyo udah ditorima' kaitn. Jangan tuyut sia'!

2 Korintus 1:17

Apo aku gola' morubah hajat nantai. Jadi, ado bai kaitn bopikir aku gala' borubah-ubah hajatku? Apo bai kaitn bopikir aku gala' bulah hajat monurut kohonda' ku siku', sobobontar ‘Au’ sobobontar ‘Cado’?

Efesus 4:14

bukainyo sama'an boko bobia' agi' inyo mudah ditipu agatn somuo macapm ajaran inyo salah. Kito kinyo pocayo ko boko urakng licik nantai inyo honda' mombulah urakng monjadi sosat.

Filipi 2:20

Conyiant urakng bukai samo sama'an Timotius inyo bosamo agatn aku. Io sohati agatn aku ongko bobondar momporhatian kopontikan kaitn.

Filipi 2:22

Kaitn siku' udah tohu obai Timotius kotakan boguno. Io udah bogota' humpas-pulas bosamo agatn aku pakai' momboritoan Kabar Boi'. Io monulukngku samo sama'an ana' monulukng bopainyo.

1 Tesalonika 1:5

Obai watu koi momboritoan Kabar Boi' ko kaitn, koi kinyo bayo momakai boko pomandiran koi modas. Apo kuaso Roh Allah monulukng koi monyampaiannyo huatan koi kotakng yakitn aman Kabar Boi' nantai bondar. Kaitn mongotohu'i somuo nantai obai kaitn udah moniant caro hidup koi. Watu koi ado di antaro kaitn, koi molayati kaitn.

1 Timotius 1:3

Watu aku botula' ko propinsi Makedonia, aku totap minto oca' kolai totap bodiapm di kota Efesus. Aku mongohonda'i sama'an nantai pakai' kolai monosihat'i boko urakng totontu oca' sia' tongga' mongajaran boko ajaran inyo monyosat'an.

1 Timotius 4:6

Ajarancam boko hal nantai ko somuo urakng inyo pocayo. Aman ubo nian, kolai paca'an molayati Kristus Yesus agatn kotakng boi', kolai pan paca'an lobih kuat pocayo ko boko ajaran mongona'i kopocaya'an kito huatan dalapm ajaran inyo udah kolai jumpati somanah ni'in.

1 Timotius 6:11

Apo kolai, Timotius, jangan molabuhan boko porbuatan inyo jahat sama'an nantai. Kolai polayatn Allah. Kolai gola' bousaha hidup bondar di hadapan Allah, hidup sosuai agatn kohonda' Allah, pagutn sotia ko Allah, huatan mongasihi urakng bukai, botahatn mohadapi ajab sonsaro, bosikap lomah-lombut.

2 Timotius 2:22

Timotius, padohan sonjumpat'an kolaku'an urakng muda' inyo jahat. Apo bousahacam oca' kolai bulah inyo bondar di hadapan Allah. Totap sotia ko Allah huatan kasihicam urakng bukai. Bousahacam oca' hidup damai agatn urakng bukai. Labuhancam somuo nantai bosamo agatn boko urakng inyo monyombah Tuhatn agatn hati inyo somombondarannyo.

2 Timotius 4:2

Boritoancam pomandiran Allah! Boritoancam agatn torus-monorus sotiap watu. Tulukngcam boko urakng oca' mongomboi'i caro hidupnyo. Olikancam urakng inyo bulah kosalahan. Padahicam huatan onji'i somangant ko boko urakng oca' hala bulah koboi'an. Labuhancam somuo nantai agatn sabar. Labuhancam somuonyo nantai kapikng mongajar Pomandiran Allah.

2 Timotius 4:3

Obai paca'an datakng watunyo, boko urakng kinyo honda' monorima' ajaran inyo bondar. Sia' bayo monuruti kohonda' sia' siku' mo. Jadi, sia' paca'an mongumpulan boko guru inyo moajaran boko hal inyo nyamanam sia' dinga'.

2 Timotius 4:7

Aku udah bouyuh-jorih agatn boi', aku udah moahiri potandikan huatan aku totap sotia sampai ahir.

Titus 2:7

Titus, kolai gola' bulah koboi'an oca' kolai monjadi contoh pakai' somuo sia'. Sotiap kali kolai mongajar, ajaricam agatn hati inyo bujur bondar. Ajaricam agatn caro inyo cucu' pakai' dihormati.

Ibrani 13:9

Jangan tontuyutan boko bomacapm ajaran molikahan inyo mombulah kaitn sosat. Obai, inyo boi' ia'an hati kaitn monjadi kuat doi' kasih karunia Allah, bukainyo doi' boko poraturan mongona'i pomakatn. Boko poraturan nantai kinyo ado gunonyo pakai' boko urakng inyo moikutinyo.

2 Petrus 3:11

Jadi, obai somuo hal tajahan hancur sama'an nantai, soharusnyo kaitn hidup agatn caro inyo mono? Kaitn gola' kinyo bodosa ongko hidup sama'an Allah kohonda'i.