2 Timotius 2:24 - Porjanjian Boharu Torjomahan Baso Dilakng Soari-ari

²⁴ Urakng inyo molayati Tuhatn co ulih bokolohi. Io gola' ramah ko somuo urakng. Io gola' corodi' mongajar. Io pan gola' hala sabar.

2 Timotius 2:24 ပူးပေါင်းရင်းမြစ်များ

Titus 3:2

Ingant'ancam ko sia' oca' jangan monjahai'an damo urakng bukai huatan jangan botikakng. Apo sia' gola' bondar-bondar coraca'an ongko lomah-lombut agatn somuo urakng, tomansu' agatn boko urakng inyo bolupm pocayo ko Yesus.

Titus 1:7

Siku' urakng pongawas jomaat bokorojo moatur Rumah Allah. Obai niannam, io gola' hidup bujur bondar. Io culih buhau. Io culih copat godi damo urakng inyo pomabu'. Io culih gala' bokolohi damo gala' ngontumbuki urakng oca' mondapat'an untukng.

1 Tesalonika 2:7

Apo koi kinyo molabuhan nantai. Koi bosipat lomah-lombut di antaro kaitn. Samo sama'an siku' urakng indai morawat boko poana'annyo.

1 Timotius 6:11

Apo kolai, Timotius, jangan molabuhan boko porbuatan inyo jahat sama'an nantai. Kolai polayatn Allah. Kolai gola' bousaha hidup bondar di hadapan Allah, hidup sosuai agatn kohonda' Allah, pagutn sotia ko Allah, huatan mongasihi urakng bukai, botahatn mohadapi ajab sonsaro, bosikap lomah-lombut.

Kolose 3:13

Aman ado urakng inyo bulah kosalahan agatn urakng bukai, kaitn gola' samo-samo sabar tohadap inyo bukai huatan samo moamputi, ongko kaitn pan gola' moamputi urakng bukai.

Filipi 2:14

Watu kaitn molabuhan lapo ja', jangan botuta'-bomamai ongko jangan botikakng.

Filipi 2:3

Jangan buhau ongko bogoyap pujian sia-sia. Apo, rondahancam hati kaitn. Anggap ja' urakng bukai lobih pontikng doi' kolai siku'.

Efesus 4:2

Ia'an, kaitn gola' hala rondah hati, lomah-lombut huatan sabar. Tunju'an kasih kolai agatn caro hala tulukng-monulukng.

1 Petrus 3:8

Kosimpulannyo, kaitn somuo gola' bosatu dalapm hati huatan pikiran, hala mohibur inyo bukai, hala mongasihi agatn boi' hati ko boko somadikan kaitn inyo bukai, huatan jangan buhau.

Yakobus 3:17

Apo boko urakng inyo ado hikmat doi' Allah, caro hidup sia' sama'an ni'in: Inyo palikng pontikng sia' hidup agatn caro inyo borosih. Sia' gala' agatn podamaian. Sia' lomah-lombut huatan hatinyo tobuka' pakai' monuruti kohonda' urakng bukai. Sia' monunju'an kasih sayangnyo ko urakng bukai huatan hala bulah koboi'an. Sia' co momihak ko boko urakng totontu, apo hala botorus torakng.

Titus 1:9

Io pan gola' bobondar pocayo Kabar Boi' inyo kito ajaran ko io, ia'an ajaran inyo bondar huatan ulih dipocayo. Io gola' bobondar pocayo tohadap ajaran nantai oca' io mampu momadahi ongko moonji'i somangant ko urakng bukai pakai' monaati ajaran inyo bondar nantai. Io gola' bobondar pocayo oca' io pan ulih monunju'an ko urakng inyo molawatn ajaran nantai, obai sia' salah.

2 Korintus 10:1

Aku ninam, Paulus, udah tohu obai ado boboropo urakng di antaro kaitn inyo bopandir bunyi ni'in: “Timpu Paulus ado bosamo agatn kito, io sabar. Io borani monogur kito bayo agatn surat timpu io jouh doi' kito.” Jadi, ni'in, aku muhun ko kaitn agatn sabar samo sama'an Kristus jam sabar ongko boi' hati.

Kisah Boko Rasul 7:26

Kohobu'annyo, Musa botomu agatn duo urakng Israel bukai. Sia' tongahan boporap. Musa moncubo morara'i sia'. Katonyo, ‘Uai kaitn, jangan kaitn boporap! Kaitn ni'in somadikan.’

Matius 12:19

Io kinyo paca'an botikakng. Io kinyo paca'an bosaro borakng. Jadi boko urakng kinyo paca'an mondinga' saro-Nyo di boko jalatn.

Yakobus 4:2

Kaitn kotakan honda' sosuatu, apo co mondapat'annyo. Kaitn monjadi tungi. Jadi, kaitn bokolohi, botikakng sampai mombunuhpakai' mondapat'annyo. Apo sobondarnyo kaitn co mondapatnyo obai kaitn co momintonyo ko Allah.

Yakobus 1:1

Pakai' somuo boko urakng inyo pocayo doi' koduo bolas suku umant Allah inyo tosebar di soluruh dunia. Salapm doi' ku, Yakobus, inyo molayati Allah ongko polayatn Yesus Kristus.

Yudas 1:3

Boko somadikan inyo ku kasihi! Kito samo-samo disolamant'an huatan aku bondar-bondar honda' monulis ko kaitn mongona'i nantai. Apo, aku mooso gola' monulis ko kaitn pakai' monguat'an kopocaya'an kaitn. Agatn sama'an nian, aku honda' oca' kaitn totap bojuakng mompotahatan iman kito, ia'an boko ajaran bondar inyo udah disampaian ko boko urakng husus umputn Allah.

Kisah Boko Rasul 23:9

Sia' monjadi kotakan camuh. Ongko, boboropo guru agama doi' kolompok Farisi bodiritn. Sia' molawatn boko urakng Saduki agatn koras. Sia' bopandir, “Monurut koi, urakng ni'in samo sokali kinyo bosalah! Mungkitn ado molekat damo roh inyo bopandir ko io.”

Titus 1:1

Ko Titus: inyo bondar-bondar sama'an ana'ku dalapm Yesus obai kito sosamo pocayo ko Yesus. Salapm doi' aku, Paulus. Allah moutus aku monjadi polayatn-Nyo. Yesus Kristus moutus aku monjadi rasul-Nyo. Aku udah diutus pakai' monulukng boko urakng inyo dipilih Allah oca' mongkitn pocayo ko Yesus. Aku pan diutus pakai' mongajar ajaran inyo bondar oca' boko urakng inyo dipilih Allah nantai hidup sosuai agatn kohonda'-Nyo. Pondasi ajaran nantai ia'an pongharapan paca'an hidup somanah-manahnyo, inyo udah Sio janjian sobolupm dunia dipulah. Allah Ponyolamant kito, co mungkitn tumbukan. Pas watu inyo ditontuan-Nyo, Allah udah moonji'i pomandiran-Nyo molalu'i Kabar Boi' inyo udah dipocayoan ko aku pakai' kuboritoan. Aku bodoa oca' Allah Bopai kito ongko Kristus Yesus, Ponyolamant kito monunju'an kasih karunia-Nyo huatan moonji'i sonang-asau ko kolai.

Galatia 5:22

Apo aman kaitn hidup sosuai agatn kohonda' Roh Allah, ia'an: hala mongasihi, rindakng-rigah, hidup sonang dalapm hati, sabar, gala' monulukng, gala' bulah koboi'an, sotia,

2 Korintus 10:4

Boko sonjato inyo koi pakai dalapm pojuakan koi bukainyo sonjato dunia ni'in. Sonjato koi ado kuaso doi' Allah inyo ulih mohancuran boko bentekng musuh koi.

Kisah Boko Rasul 15:2

Apo Paulus ongko Barnabas kotakan kinyo sotuju agatn ajaran boko urakng nantai. Nontu sia' botikakng mongona'i mosalah nantai. Obai nantai, Paulus ongko Barnabas huatan boko urakng bukai diutus ko kota Yerusalem. Sia' diutus pakai' mombahas mosalah sunant nantai agatn boko rasul Yesus huatan boko ponotua' di Yerusalem.

Yohanes 6:52

Mondinga' nantai, boko urakng Yahudi nantai botikakng agatn siku' monyiku'. Kato sia', “Ubo apo Sio ulih monyorahan isi-Nyo ko kito pakai' dipua'i?”

2 Korintus 6:4

Apo, dalapm somuo la'apo pan inyo koi pulah, koi monunju'an obai koi ninam boko urakng inyo molayati Allah. Ia'an nantai, koi hala sabar mohadapi bomacapm pondorita'an.