2 Timotius 1:7 - Porjanjian Boharu Torjomahan Baso Dilakng Soari-ari

⁷ Obai Allah moonji'i Roh-Nyo ko kito bukainyo pakai' bulah kito monjadi urakng inyo ponggola'an. Apo Sio moonji'i Roh-Nyo ko kito pakai' bulah kito kuat, bulah kito ulih mongasihi huatan mongondalian diri kito.

2 Timotius 1:7 ပူးပေါင်းရင်းမြစ်များ

Roma 8:15

Komainyo, kaitn samo sama'an pacal inyo ponggola'an. Apo, Roh Allah inyo dionju' ko kaitn kinyo bulah kaitn monjadi samo sama'an nantai agi'. Roh Allah bulah kaitn monjadi poana'an Allah. Obai Roh-Nyo nantai, kito moningkau, “Oi Allah! Duatn Bopaiku!”

1 Yohanes 4:18

Di dalapm kasih conyiant inyo dikogola'i: kasih inyo sobondarnyo mohilakan ponggola' obai di dalapm ponggola' ado hukupan ongko sosopo pan inyo gola' boroti io kinyo sobondarnyo di dalapm kasih.

Galatia 5:22

Apo aman kaitn hidup sosuai agatn kohonda' Roh Allah, ia'an: hala mongasihi, rindakng-rigah, hidup sonang dalapm hati, sabar, gala' monulukng, gala' bulah koboi'an, sotia,

Yohanes 14:27

Timpu watu Aku botula', Aku moonji'i sonang-asau-Ku ko kaitn. Sonang-asau-Ku inyo Aku onju' ko kaitn, bukainyo sama'an ponyaman inyo dunia onju'. Jadi jangan golisah. Jangan gola'.

Lukas 10:19

Dinga'anbo! Aku udah moonji'i kuaso ko kaitn pakai' mongalahan kuaso jahat, kuaso musuh kito, ia'an pan co nyiant inyo ulih mombonasoan kaitn.

Kisah Boko Rasul 1:8

Apo Roh Allah paca'an tinggal di dalapm kaitn. Watu nantai, kaitn paca'an monorima' kuaso. Kaitn paca'an momboritoan mongona'i Aku ko boko urakng bukai di kota Yerusalem huatan di sotiap doerah Yudea. Kaitn paca'an momboritoan mongona'i Aku jam di sotiap doerah Samaria. Kaitn paca'an momboritoan mongona'i Aku sampai ko boko tompat inyo palikng jouh di soluruh dunia.”

Roma 5:5

Aman kito boharap ko Sio sama'an nantai, jadi kito kinyo paca'an kocewa. Obai, hati kito udah dibisi'i Allah agatn kasih-Nyo. Allah molabuhan nantai agatn porontaroan Roh-Nyo inyo udah dionju' ko kito.

Ibrani 2:15

Jadi, somanah sia' hidup, sia' monjadi sama'an pacal obai gola' agatn komatian nantai. Apo molalu'i porbuatan-Nyo, Yesus mombebasan sia'.

Kisah Boko Rasul 20:24

Apo aku co poduli. Biar pan aku dibunuh, aku totap co poduli. Tuhatn Yesus udah moonji'i tugas ko aku pakai' momboritoan Kabar Boi' obai Allah udah monyatoan koboi'an-Nyo ko monsio. Aku gola' monyolosaian tugasku nantai. Nianam inyo pontikng, bukainyo hidup aku.

1 Korintus 2:4

Watu aku momboritoan Kabar Boi', aku kinyo momakai kopintar-corodi'an monsio pakai' moyakit'an kaitn oca' monjadi urakng pocayo. Apo aku momboritoan agatn caro inyo monunju'an obai Roh Allah bokuaso.

Lukas 24:49

Apo diapmcam di kota Yerusalem ni'in holu'ai obai Aku paca'an moutus Roh Allah ko kaitn, samaꞌan inyo udah dijanjian Bopai-Ku. Diapmcam holu'ai sampai Roh Allah datakng pakai' molongkapi kaitn agatn kuaso doi' Allah.”

Kisah Boko Rasul 10:38

Yesus mula'i polayatan-Nyo. Yesus boasal doi' kota Nazaret. Sio mula'i polayatan-Nyo di doerah Galilea. Allah moonji'i Roh-Nyo ko Yesus. Allah jam moonji'i kuaso ko Sio. Jadi, Yesus botula' ko mono-mono, molabuhan boko hal inyo boi', Sio monundukng boko roh jahat doi' urakng banya'. Sio ulih molabuhan somuo macapm mujisat obai Allah ado bosamo agatn Sio.

1 Petrus 1:22

Obai kaitn monaati kobondaran, kaitn udah monjadi suci di hadapan Allah. Jadi, kaitn dapat mongasihi somadikan kaitn inyo sosamo pocayo, agatn hati tulus. Obai nantai, kaitn gola' bobondar hala mongasihi agatn soponuh hati.

Kisah Boko Rasul 21:13

Apo Paulus monimbas, “Jangan kaitn monangis, obai nantai bulah hatiku salu'! Aku udah siap ditangkap di Yerusalem. Malahan, aku udah siap mati sobagai murid Tuhatn Yesus.”

Kolose 1:8

Lalu, io momadahan ko koi obai ado kasih dalapm hati kaitn inyo dionji'i Roh Allah.

Kisah Boko Rasul 6:8

Nah, Stefanus, doi' kotujuh urakng inyo disiuh tontai, io dionji'i borokat agatn kuaso doi' Allah. Io ulih molabuhan boko mujisat dipohadapan boko urakng banya'.

Kisah Boko Rasul 9:22

Apo mongkitn manah Saulus mongkitn moyakit'an urakng banya'. Io mombutian agatn kotakan jolas obai Yesus nantai Rajo Inyo Dijanjian Allah. Allah bulah pomandiran Saulus kotakan bopongaruh. Ado boko urakng Yahudi di Damsyik inyo kinyo pocayo borito Saulus mongona'i Yesus. Apo sia' co ulih mongalahan Saulus.

Lukas 8:35

Datakam boko urakng pakai' bontiatannyo. Watu sia' datakng di santai, bontomu agatn urakng inyo udah dibebasan doi' boko roh jahat. Io dudu' totai kaki Yesus, udah bobanggi-bopakaian huatan udah warasam. Sia' jadi sadar Yesus kotakng bokuaso. Sia' pan topogola'.

Kisah Boko Rasul 26:25

Apo Paulus monimbas, “Gubernur Festus inyo tohormat. Aku cuku gogilo. Pomandiranku bondar huatan mansu' akal.

Lukas 15:17

Koponsuahannyo io sadar kolaku'annyo kotakng salah nantai. Io bopandir, ‘Boko urakng inyo bokorojo ko bopaiku botuyu' pomakatnnyo, apo aku di si'itn honda' mati longkapam!

Kisah Boko Rasul 26:11

Aku pan opat mondorako'i sia' inyo kotomuanku dalapm boko rumah sombayakng. Aku bousaha momoso sia' pakai' co pocayo agi' agatn Yesus. Aku kotakan godi agatn sia' sampai aku monyasah sia'. Aku monyasah sia' ko boko kota bukai jam oca' aku dapat mondorako'i sia'.