2 Timotius 1:12 - Porjanjian Boharu Torjomahan Baso Dilakng Soari-ari

¹² Niannam obainyo aku moalapi somuo ajab sonsaro ni'in. Apo aku co malu obai aku udah tohu sopo Yesus sobondarnyo. Aku pocayo ko Sio. Aku udah monyorahan polayatan ni'in ko Sio. Aku yakitn Sio paca'an monjago oca' polayatanku kinyo balakng. Sio paca'an monjago polayatanku sampai ari Sio bobali' agi' ko dunia ni'in.

2 Timotius 1:12 ပူးပေါင်းရင်းမြစ်များ

Matius 12:21

Boko urakng doi' somuo banso paca'an pocayo obai Sio paca'an monulukng sia'.”

Matius 24:36

Apo co nyiant urakng inyo mongotohu'i ari damo japmAku datakng agi'. Boko molekat di sorugo kinyo tohu huatan Ana' Allah, pan kinyo tohu jam. Ongkah Allah Bopai mo inyo tohu.”

Matius 7:22

Timpu ari toahir, banya' urakng paca'an mondorah ko Aku, ‘Tuhatn, Tuhatn, koi udah monyampaian posatn Allah. Koi udah monundukng boko roh jahat. Koi udah molabuhan banya' mujisat. Koi molabuhan somuonyo nantai momakai kuaso Duatn jam.’

Lukas 10:12

Komai Allah mombonasoan kota Sodom agatn api doi' sorugo. Apo, watu Ari Kiamant, hukupan ko boko urakng inyo monula' kaitn paca'an jouh lobih borat doi' hukupan ko boko urakng jahat di Sodom nantai.”

Lukas 23:46

Lalu Yesus mondorah agatn saro kotakng borakng, “Bopai! Ko dalapm kuaso Duatn Ku sorahan kosih-Ku!” Lopas jadi bopandir ubo nantai, Io pan matiam.

Yohanes 17:15

Aku co minto oca' Duatn monguti' sia' doi' dunia ni'in, apo oca' Duatn molinduki sia' doi' inyo jahat, ia'an Rajo Sitatn.

Yohanes 6:44

Conyiant ado siku' urakng pan ulih datakng ko aku kocuali Allah Bopai mombaba'nyo ko Aku inyo diutus Allah. Aku paca'an mombulah io hidup agi' watu ahir joman.

Kisah Boko Rasul 13:46

Apo Paulus ongko Barnabas kinyo gola'. Sia' bopandir, “Yesus moutus koi pakai' monyampaian Kabar Boi' mongona'i Sio. Koi gola' monyampaian lobih doholu ko kaitn, boko urakng Yahudi. Apo kaitn co honda' monorima' nantai. Rotinyo, kaitn kinyo moanggap diri cucu' monorima' hidup somanah-manahnyo. Obai nantai, ni'inan koi moninggalan kaitn ongko botula' molayati boko banso inyo bukainyo urakng Yahudi.

Kisah Boko Rasul 13:50

Apo boko urakng Yahudi mohadu boko urakng pontikng di kota nantai, tomansu' boko botina' inyo bopongaruh udah mansu' agama Yahudi. Boko urakng pontikng nantai bulah urakng bukai mondorako'i Paulus ongko Barnabas. Koponsuahannyo, Paulus ongko Barnabas ditundukng doi' doerah nantai.

Kisah Boko Rasul 21:13

Apo Paulus monimbas, “Jangan kaitn monangis, obai nantai bulah hatiku salu'! Aku udah siap ditangkap di Yerusalem. Malahan, aku udah siap mati sobagai murid Tuhatn Yesus.”

Kisah Boko Rasul 7:59

Timpu boko urakng monikapi Stefanus agatn batu, io bodoa, “Tuhatn Yesus, torima'cam rohku.”

Kisah Boko Rasul 9:16

Obai io momboritoan mongona'i Aku, io paca'an moalapi banya' ajab sonsaro. Aku siku' paca'an monunju'an ko io mongona'i ajab sonsaro nantai.”

Roma 1:16

Aku co malu momboritoan Kabar Boi' nantai obai Kabar Boi' ia'an kuaso Allah pakai' monyolamant'an somuo urakng inyo pocayo, potamo-tamo urakng Yahudi, apo jam urakng bukainyo Yahudi.

Roma 9:33

Samo sama'an pomandiran Allah inyo ditulis di Buku Suci: “Porotiancam! Aku molota'an Batu di Sion. Batu nantai bulah urakng topanjur. Apo urakng inyo pocayo ko Sio, tajahannyo kinyo kalo monjadi malu obai io pocayo.”

1 Korintus 1:8

Sio jam paca'an monguat'an hati kaitn sampai pado ahir joman. Sio paca'an molabuhan nantai oca' kaitn kinyo dianggap salah timpu Yesus Kristus, Tuhatn inyo bokuaso atas kito datakng bobali'.

1 Korintus 3:13

Pokoroja'an somuo urakng nantai paca'an diuji agatn api pado ari ponghakipan. Pado watu nantai paca'an dikotohu'i agatn jolas apobai hasil pokoroja'an sotiap urakng nantai boi' damo cado.

Filipi 1:20

Aku kotakng honda' ongko moharap'an obai aku co bulah boko-lapo inyo bulah ku monjadi malu di hadapan Tuhatn. Apo aku boharap aku tajahan monjadi borani watu ni'in samo sama'an aku hala borani sobolupmnyo. Agatn ubo nantai, aman aku mati damo hidup, Kristus tajahan dimuliaan agatn lapo ja' inyo tojadi ko bukakng-tubuhku.

Filipi 3:10

Aku bondar-bondar honda' mongonal Kristus. Aku honda' moalapi kuaso inyo mombulah Sio bobali' hidup agi' doi' komatian. Aku honda' tuyut mondorita' samo sama'an Sio ongko rela mati samo sama'an Sio.

Filipi 3:21

Sio ado kuaso pakai' mombulah somuo la'apo pan tundu' agatn Sio. Agatn kuaso-Nyo nantai, bukakng-tubuh kito ni'in inyo lomah ongko ulih diloloan, Sio tajahan morubah monjadi samo sama'an bukakng-tubuh Sio inyo mulia.

Filipi 3:8

Malahan aku moanggap la'apo pan conyiant ado rotinyo dibandikan agatn mongonal Kristus Yesus, Tuhatnku. Nantai jouh lobih pontikng daripado somuo hal inyo bukai. Nantaiam sobabnyo aku co boharap agi' ko boko hal nantai. Aku moanggap somuo hal nantai samo sama'an sampah oca' aku ulih mongonal Kristus,

1 Tesalonika 2:16

obai sia' bousaha monongga'an koi oca' co momboritoan Kabar Boi' ko urakng inyo bukainyo urakng Yahudi. Sia' kinyo honda' kaitn inyo bukainyo urakng Yahudi disolamant'an! Agatn boko porbuatan nantai, sia' torus-monorus monambah dosa sia' udah langkukng-lalu ongko. Ni'in, koponsuahannyo Allah pan godi. Pasti sia' paca'an dihukupm kotakng borat.

1 Tesalonika 5:4

Boko urakng nantai kinyo bososiap samo sama'an boko urakng di dalapm potakng-hiru' inyo co tohu aman sia' paca'an didataki urakng pongolit. Apo, boko somadikan, kaitn kinyo samo sama'an sia'. Kaitn hidup di dalapm torakng watu ari siakng.

1 Timotius 6:20

Timotius, jagocam somuo inyo Allah onju' ko kolai. Jangan mondinga'an boko urakng inyo bopandir mongona'i boko hal inyo kinyo boonsu'an, boko hal inyo kinyo mohormati Allah. Jangan mondinga'an boko urakng inyo mongatoan obai sia' ado ‘pongotohuan’. Apo, sobondarnyo sia' molawatn ajaran inyo bondar.

2 Timotius 1:14

Kolai udah dipocayoan boko hal inyo borogo. Jagocam boko hal nantai agatn kokuatan doi' Roh Allah inyo ado di dalapm kito.

2 Timotius 1:16

Apo Onesiforus kinyo malu obai aku ditahatn dalapm ponjara. Watu io ado di kota Roma ni'in, io bousaha koras pakai' monggoyapi aku. Lopas udah monomuan aku, io opat datakng mongkongkanti'i aku. Kolai udah tohu io opat jam molayati di kota Efesus. Obai nantai, aku bodoa oca' Tuhatn monunju'an kasih-Nyo ko io pado ari Tuhatn mohakipi somuo urakng huatan monunju'an kasih ko somuo urakng inyo monotap dalapm rumahnyo.

2 Timotius 1:8

Jadi, jangan malu momboritoan mongona'i Tuhatn kito. Jangan malu mongona'i aku inyo dimansu'an ko dalapm ponjara obai molayati Sio. Apo, agatn kokuatan doi' Allah, tuyutcam ajab sonsaro obai pomboritoan Kabar Boi' nantai.

2 Timotius 2:9

Obai aku momboritoan Kabar Boi' nantai, aku ajab sonsaro, malahan aku ditahatn agatn rantai dalapm ponjara ubonyo aku sama'an ponjahat. Apo pomboritoan pomandiran Allah kinyo totongga'an.

2 Timotius 4:8

Tuhatn udah monyiap'an hadiah inyo bondar ko aku. Sio nantai Hakipm inyo paca'an mohakipi somuo urakng agatn adil. Watu nantai, Sio paca'an moonji'i hadiah nantai pakai' aku huatan somuo urakng inyo rindu Sio datakng bobali' agi' ko dunia ni'in.

Titus 3:8

Somuo inyo udah ku pandiran nantai bondar ongko ulih dipocayo. Aku honda' oca' kolai moajaran somuo nantai agatn togas. Ajaricam somuo nantai ko boko urakng inyo pocayo ko Allah oca' sia' moutamoan pakai' bulah koboi'an. Somuo nantai boi' huatan boguno pakai' boko urakng banya'.

Ibrani 12:2

agatn mato totuju ko Yesus. Obai Sio ia'an sumber kopocaya'an kito. Doi' awal Sio momimpitn kito sampai ahirnyo kopocaya'an kito monjadi sompurna. Sio botahatn mondorita' di kayu salib ongko Sio kinyo tonturian caro komatian nantai momaluan obai Sio ongkah bopikir mongona'i sonang-nyaman inyo tajahan di torima' Sio nononyo. Watu ni'in Sio dudu' di tompat inyo tohormat di sopia' kanan tahta Allah.

Ibrani 2:18

Obai Yesus mondorita' pas Sio mohadapi poncoba'an, jadi Sio ulih monulukng boko urakng inyo mohadapi poncoba'an.

Ibrani 7:25

Obai nantai, Sio sanggup monyolamant'an somuo urakng agatn sompurna inyo datakng ko Allah molalu'i Sio. Sio hala hidup pakai' monjadi Porontaro inyo momuhun ko Allah pakai' sia'.

1 Petrus 1:5

Obai kaitn pocayo ko Yesus, jadi Allah molinduki kaitn agatn kuaso-Nyo oca' kaitn ulih disolamant'an. Kosolamant'an kaitn nantai udah siap ditunju'an Allah watu ahir joman nononyo.

1 Petrus 4:16

Apo, aman kaitn mondorita' obai kaitn urakng Kristen, jangan kaitn malu mongona'i nantai apo momuliaan Allah ja'am.

1 Petrus 4:19

Obai nantai, aman boko urakng mondorita' obai nantai kohonda' Allah, jangan am sia' botongga' bulah koboi'an. Apo sia' gola' monyorahan diri ko Sio inyo mombulah sia'. Sio hala sotia monopat'i somuo janji-Nyo.

Yudas 1:24

Allah inyo satu-satunyo, bokuaso monjago kaitn oca' kaitn kinyo jatu' ko dalapm dosa. Sio bokuaso mombaba' kaitn ko hadapan-Nyo inyo mulia dalapm koadaan kaitn borosih doi' dosa. Timpu nantai, kaitn pan paca'an kotakan sonang-nyaman.