2 Tesalonika 3:5 - Porjanjian Boharu Torjomahan Baso Dilakng Soari-ari

⁵ Koi bodoa oca' Tuhatn Yesus monulukng kaitn pakai' torus mongotohu'i obai Allah mongasihi kaitn. Koi pan bodoa oca' kaitn ulih kuat watu kaitn didorako'i samo sama'an Kristus kuat watu Sio didorako'i.

2 Tesalonika 3:5 ပူးပေါင်းရင်းမြစ်များ

1 Yohanes 4:19

Kito gola' mongasihi, obai Allah lobih doholu mongasihi kito.

1 Korintus 8:3

Apo urakng inyo mongasihi Allah, urakng nantai dikotohu'i Allah. Ongko urakng nantai bondar-bondar pintar-corodi'.

1 Tesalonika 3:11

Ni'inan koi bodoa ko Allah Bopai kito huatan ko Yesus, Tuhatn kito. Koi bodoa oca' Sio mombuka' jalatn ko koi pakai' monjongu' kaitn agi'.

Ibrani 9:28

Sama'an nian jam, Kristus momposombahan diri-Nyo sokali mo pakai' monanggukng hukupan dosa urakng banya'. Sio paca'an datakng agi' inyo koduo kalinyo, bukainyo pakai' monanggukng dosa agi', apo pakai' monyolamant'an boko urakng inyo monantian kodatakan Sio.

Roma 8:25

Apo kito totap yakitn moharap'an borokat inyo bolupm dionji'i. Jadi, kito ija' sabar monantiannyo.

1 Petrus 4:1

Obai Kristus udah mondorita' socaro jasmani, jadi kaitn pan gola' monguat'an diri kaitn agatn pikiran obai kaitn tajahan mondorita' samo sama'an Sio jam. Obai, urakng inyo mondorita' socaro jasmani, io udah botongga'am bulah dosa.

Yakobus 2:5

Boko somadikan inyo ku kasihi! Dinga'anbo ni'in! Allah momilih boko urakng jaro di dunia pakai' monjadi urakng inyo bondar-bondar konal agatn Sio. Obai sia' pocayo ko Yesus, jadi sia' monjadi ahli waris Koraja'an Allah. Nantaiam kodampuan inyo Allah janjian ko somuo urakng inyo mongasihi Sio.

Titus 2:13

kapikng kito monantian ari kodatakan Allah inyo Maho Kuaso ongko Ponyolamant kito, Yesus Kristus, ia'an ari inyo kito harapan agatn rindakng-rigah,

2 Timotius 4:8

Tuhatn udah monyiap'an hadiah inyo bondar ko aku. Sio nantai Hakipm inyo paca'an mohakipi somuo urakng agatn adil. Watu nantai, Sio paca'an moonji'i hadiah nantai pakai' aku huatan somuo urakng inyo rindu Sio datakng bobali' agi' ko dunia ni'in.

1 Tesalonika 1:3

Koi bosukur ko Allah Bopai kito obai koi moingant caro hidup kaitn. Ia'an, obai kaitn pocayo ko Yesus huatan udah moniant'an dalapm porbuatan kaitn inyo nyata. Kaitn mongasihi urakng bukai agatn somombondarannyo monulukng sia'. Ongko kaitn totap kuat ongkah boharap ko Yesus Kristus, Tuhatn kito.

Galatia 5:22

Apo aman kaitn hidup sosuai agatn kohonda' Roh Allah, ia'an: hala mongasihi, rindakng-rigah, hidup sonang dalapm hati, sabar, gala' monulukng, gala' bulah koboi'an, sotia,

Roma 8:28

Kito tohu obai Allah moatur somuo la'apo pan inyo tojadi oca' ado hasil inyo boi' pakai' kito inyo mongasihi Sio, ia'an kito inyo Sio tingkau pakai' monjadi poana'an-Nyo obai nantai roncana-Nyo.

Roma 5:5

Aman kito boharap ko Sio sama'an nantai, jadi kito kinyo paca'an kocewa. Obai, hati kito udah dibisi'i Allah agatn kasih-Nyo. Allah molabuhan nantai agatn porontaroan Roh-Nyo inyo udah dionju' ko kito.

Wahyu 13:10

Sotiap urakng inyo ditontuan Allah pakai' monjadi tawatan, pasti paca'an monjadi tawatan. Sotiap urakng inyo ditontuan pakai' dibunuh agatn podakng, pasti paca'an dibunuh agatn podakng. Jadi, boko urakng inyo pocayo gola' botahatn mohadapi nantai. Sia' gola' pocayo ko Yesus agatn sotia.

1 Tesalonika 1:10

Sia' pan mongisahan obai kaitn monanti watu Ana' Allah paca'an datakng agi' ko dunia ni'in doi' sorugo. Ia'an, Yesus inyo udah Allah hidupan agi' doi' komatian. Yesus nantaiam inyo monyolamant'an kito doi' hukupan Allah inyo paca'an datakng.

2 Petrus 3:12

Kaitn gola' hidup sama'an nantai kapikng kaitn monanti arinyo Allah paca'an datakng. Agatn sama'an nian, kaitn mombulah ari nantai copat datakng. Pado ari nantai, langit paca'an lobur dicucul api. Somuo hal inyo ado di langit paca'an lobur obai hangantnyo api nantai.

Wahyu 1:9

Aku, Yohanes, somadikan kaitn inyo sonasib agatn kaitn, inyo bosamo ajab sonsaro agatn warga Koraja'an Allah, huatan bosamo botahatn mohadapi ajab sonsaro kapikng monantian Yesus. Aku udah momboritoan Pomandiran doi' Allah ongko boko hal inyo Yesus padahan ko aku. Obai nantaiam, aku dibuakan ko sobuah pulau inyo bodamoan Patmos.