2 Tesalonika 3:13 - Porjanjian Boharu Torjomahan Baso Dilakng Soari-ari

¹³ Boko somadikan somuo, koi bopandir: Jangan hora' molabuhan boko porbuatan inyo boi'.

2 Tesalonika 3:13 ပူးပေါင်းရင်းမြစ်များ

Ibrani 12:3

Timpu boko urakng bodosa kotakng molawatn-Nyo, Sio botahatn mohadapi pondorita'an nantai. Jadi, ingantcamtoladatn Sio nantai oca' kaitn kinyo monjadi lomah ongko putus asa.

2 Korintus 4:1

Allah monunju'an kasih sayang-Nyo dalapm polayatan ni'in ko koi. Obai nantai, koi co putus asa.

2 Korintus 4:16

Nantaiam sobabnyo koi co putus asa. Biar pan bukakng-tubuh koi cocat tuho goluam, apo hati koi doi' ari ko ari diboharu'i.

Wahyu 2:3

Kaitn sabar, botahatn mohadapi ajab sonsaro obai damo-Ku. Kaitn co putus asa.

Ibrani 12:5

Jangan kolupatn nosihat ni'in doi' Buku Suci inyo disampaian ko kaitn sobagai poana'an: “Ana'ku! Aman Tuhatn mondidik kolai, jangan disopelean nantai. Aman Sio monogur kolai, jangan putus asa.

1 Tesalonika 4:1

Solanjutnyo, boko somadikan, komai watu koi bosamo agatn kaitn, koi udah mongajar kaitn. Koi mongajar kaitn mongona'i caro hidup inyo monyonangan Allah. Memang kaitn udah mula'i hidup agatn caro nantai. Kaitn udah mongotohu'i obai Tuhatn Yesus moonji'i kuaso ko koi pakai' mongajar sama'an nantai. Obai nantai, ni'in koi kinyo bayo mombaba' apo koi monyosahan kaitn: Hidup pakai' monyonangan Allah lobih somombondarannyo.

Lukas 18:1

Yesus momakai poumpamoan ni'in pakai' mongajar boko murid-Nyo oca' hala bodoa huatan co putus asa, obai doanyo tajahan dikabulan.

Filipi 1:9

Ninam doaku pakai' kaitn: Mudahan kaitn mongkitn mongasihi Allah ongko urakng bukai ongko mongkitn mongotohu'i ongko mongoroti lapo inyo bondar

Roma 2:7

Allah paca'an moonju' kohidupan kokal ko urakng inyo kinyo monyorah pakai' bulah koboi'an, ia'an urakng inyo bulah koboi'an obai moncari' komulia'an huatan hormat doi' Allah, huatan honda' dionji'i hidup kokal doi' Sio.

1 Korintus 15:28

Malah sobali'nyo, lopas somuo hal ditundu'an dibabah kaki Kristus, jadi Sio siku' sobagai Ana' paca'an monundu'an diri-Nyo siku' di babah Allah. Agatn sama'an nian, Allah pan paca'an momorintah somuonyo.

2 Tesalonika 3:15

Apo jangan jam moanggap io sobagai musuh apo totap olikan ja'am io sobagai somadikan.