2 Petrus 3:15 - Porjanjian Boharu Torjomahan Baso Dilakng Soari-ari

¹⁵ Kaitn gola' sadar obai alasan Tuhatn kito sabar ia'an obai Sio moonji'i urakng kosompatan pakai' disolamant'an. Somadikan kito inyo ku kasihi, Paulus, pan udah monulis surat ko kaitn mongona'i nantai. Io monulis nantai agatn hikmat inyo Allah onju' ko inyo.

2 Petrus 3:15 ပူးပေါင်းရင်းမြစ်များ

Lukas 21:15

Obai Aku siku' tajahan moonji'i ko kaitn komampuan pakai' mongatoan pomandiran inyo topat, sampai boko musuh kaitn kinyo paca'an ulih monontakng ongko monikaki kaitn.

Kisah Boko Rasul 15:25

Obai nantai, koi somuo agatn sohati bulah koputusan pakai' moutus boboropo urakng ko kaitn. Sia' nantai botula' bosamo koduo somadikan inyo kito kasihi, ia'an Barnabas ongko Paulus.

Kisah Boko Rasul 7:10

Allah monyolamant'an io doi' sotiap jorih-uyuh inyo io alapi. Allah bulah Yusuf kotakan pintar-corodi', sampai pan Rajo Mesir sonang agatn io. Ongko rajo nantai moangkat Yusuf monjadi urakng bokuaso di soluruh Mesir, tomansu' mourus somuo urusan istana rajo nantai.

Kisah Boko Rasul 9:17

Jadi, Ananias botula' ko rumah Yudas nantai. Sopondatakngnyo di rumah Yudas, io mansu' ongko monomu'i Saulus. Io molota'an jarinyo ko Saulus kapikng bopandir, “Saulus, Somadikanku, Tuhatn Yesus moutus aku ko kolai. Sio niannam inyo kolai tiat dalapm pojalatan kolai ko si'itn. Sio moutus aku oca' kolai ulih moniant agi' huatan oca' kolai diponuhi Roh Allah.”

Roma 2:4

Allah kotakan boi' huatan sabar ko kaitn. Sio kinyo lansukng mohukupm kaitn. Jangan moanggap koboi'an-Nyo nantai kinyo borogo? Kaitn gola' mongoroti obai Allah monunju'an koboi'an-Nyo ko kaitn obai Sio honda' oca' kaitn moninggalan boko dosa kaitn.

1 Korintus 12:8

Umpamonyo, ko urakng ni'in Roh Allah moonji'i komampuan bopandir agatn kopintar-corodi'an. Ko urakng nian Roh Allah moonji'i komampuan pakai' mongotohu'i sosuatu ongko monyampaian boko hal nantai agatn jolasko urakng bukai.

1 Korintus 2:13

Watu koi mongajar, koi mongajar mongona'i somuo koboi'an Allah nantai. Koi momakai pomandiran inyo diajari Roh Allah, bukai pomandiran inyo diajari kopintar-corodi'an monsio. Koi monjolasan boko hal mongona'i Allah nantai ko boko urakng inyo udah monorima' Roh Allah.

1 Korintus 3:10

Obai koboi'an Allah ko aku, Sio mombulah aku monjadi samo sama'an sikuꞌ tukakng bangunan inyo pandai. Aku inyo molota'an pondasi bangunan nantai, sodakan watu ni'in ado urakng bukai inyo mombangun di pucu' pondasi nantai. Apo sotiap urakng nantai gola' gogamant agatn caro io mombangun.

Efesus 3:3

Sio momboritoan ko aku roncana-Nyo inyo komai kinyo dikotohu'i monsio. Di pucu' Aku udah monulis socaro panda' ko kaitn mongona'i hal nantai.

1 Timotius 1:16

Apo malah nantaiam inyo monjadi alasan Yesus monunju'an kasih-Nyo ko aku, oca' Sio ulih monunju'an kosabaran-Nyo. Agatn ubo nian hal ni'in paca'an tojadi jam ko boko urakng bukai inyo nononyo pocayo ko Sio, huatan mondapat'an hidup somanah-manahnyo di sorugo.

Yakobus 1:5

Aman ado inyo kurakng pintar-corodi', io gola' minto doi' Allah. Lalu, Allah paca'an moonji'i pintar-corodi'. Obai, Allah gala' moonji'i ko somuo urakng. Sio co monyalahan urakng inyo minto.

Yakobus 3:17

Apo boko urakng inyo ado hikmat doi' Allah, caro hidup sia' sama'an ni'in: Inyo palikng pontikng sia' hidup agatn caro inyo borosih. Sia' gala' agatn podamaian. Sia' lomah-lombut huatan hatinyo tobuka' pakai' monuruti kohonda' urakng bukai. Sia' monunju'an kasih sayangnyo ko urakng bukai huatan hala bulah koboi'an. Sia' co momihak ko boko urakng totontu, apo hala botorus torakng.

1 Petrus 3:20

Ia'an nantai, boko roh doi' boko urakng watu joman Nuh inyo mati molalu'i pasakng obai sia' kinyo taat ko Allah. Allah sabar agatn sia' somanah Nuh mombulah kapal bosarnyo nantai. Apo bayo boboropo urakng mo disolamant'an, ia'an nantai dolapatn urakng. Sia' disolamant'an molalu'i ara'i nantai.

2 Petrus 3:2

Aku honda' oca' kaitn moingant pomandiran inyo komai udah dipandiran doi' boko nabi Allah, huatan jam oca' kaitn moingant apo inyo boko rasul udah sampaian ko kaitn, ia'an boko porintah doi' Yesus Kristus, Ponyolamant huatan Tuhatn pucu' kito.

2 Petrus 3:9

Ado boko urakng inyo bopikir Tuhatn moulur-ulur monopat'i janji-Nyo. Apo sobondarnyo Sio kinyo moulur-ulur. Sio sabar agatn kaitn. Obai, Sio kinyo honda' ado urakng inyo bonaso. Sio honda' oca' somuo urakng moninggalan dosa sia' ongko hidup monyonangan Sio.