2 Petrus 3:14 - Porjanjian Boharu Torjomahan Baso Dilakng Soari-ari

¹⁴ Obai nantai, boko somadikanku inyo ku kasihi, kapikng kaitn monanti pakai' somuo hal nantai tojadi, kaitn gola' bousaha oca' kaitn ado hubukan boi' agatn Allah. Kaitn gola' hidup agatn caro nantai oca' Sio moniant kaitn kinyo bodosa apo hidup suci di hadapan-Nyo.

2 Petrus 3:14 ပူးပေါင်းရင်းမြစ်များ

1 Tesalonika 5:23

Ni'inan koi bodoa ko Allah inyo moonji'i kito sonang-asau huatan bulah kaitn mongkitn lobih suci dalapm somuo hal. Koi bodoa mudahan kinyo ado boko hal inyo jahat dalapm soluruh roh kolai, jiwa kolai huatan bukakng-tubuh kolai, timpu Yesus, Tuhatn kito nononyo datakng agi' ko dunia ni'in.

1 Tesalonika 3:13

Koi bodoa oca' ni'inan Tuhatn monguat'an hati kaitn. Jadi, pas Yesus, Tuhatn kito agatn boko urakng suci umputn Sio, nononyo datakng, Allah Bopai kito moanggap kaitn kinyo bosalah huatan suci.

Filipi 1:10

agatn caro nantai kaitn ulih momilih lapo inyo kotakng boi'. Agatn ubo nian, hidup kaitn tajahan borosih doi' dosa. Kaitn co tajahan disalahan watu ari Kristus datakng agi'.

1 Korintus 15:58

Jadi, boko somadikan inyo aku kasihi, totap pocayo ko Yesus agatn yakitn. Jangan goyah. Bokorojocam agatn rajitn pakai' Tuhatn. Obai, kaitn tohu obai somuo inyo kaitn korojoan pakai' Tuhatn ado kountukannyo.

1 Yohanes 3:3

Somuo urakng inyo yakitn moharapan obai Sio paca'an mombulah nantai tojadi, sia' monjago diri oca' co bulah dosa samo sama'an Sio co bulah dosa.

1 Korintus 1:8

Sio jam paca'an monguat'an hati kaitn sampai pado ahir joman. Sio paca'an molabuhan nantai oca' kaitn kinyo dianggap salah timpu Yesus Kristus, Tuhatn inyo bokuaso atas kito datakng bobali'.

Filipi 2:15

Agatn ubo nantai, kaitn hidup agatn caro inyo bondar ongko borosih. Kaitn hidup ubo poana'an Allah inyo culih disalahan biar pan kaitn ado di tongah-tongah boko urakng inyo jahat ongko co mongonal caro hidup inyo bondar. Jadi, kaitn monjadi torakng bagi sia', samo sama'an boko bintakng inyo bocohayo di dunia ni'in.

Ibrani 9:28

Sama'an nian jam, Kristus momposombahan diri-Nyo sokali mo pakai' monanggukng hukupan dosa urakng banya'. Sio paca'an datakng agi' inyo koduo kalinyo, bukainyo pakai' monanggukng dosa agi', apo pakai' monyolamant'an boko urakng inyo monantian kodatakan Sio.

Lukas 12:43

Aman io molabuhan tugasnyo nantai agatn sotia, timpu habakngnyo pulakng, hulutn nantai tajahan sonang-nyaman.

Lukas 2:29

“Tuhatn, aku ni'in hulutn Duatn. Ni'inan aku siap mati agatn sonang-asau obai Duatn udah monopat'i janji Duatn ko aku.

Yakobus 1:27

Apo ninam sombayakng inyo monyonangan Allah Bopai kito. Ia'an io borotian pondorita'an boko bobia' kumang ongko boko urakng balu janda, lalu monulukng sia'. Io pan monjago diri oca' boko hal jahat di dunia ni'in kinyo mompongaruhi io.

Filipi 3:20

Apo, kito ninam pondudu' di sorugo. Doi' su'utan jam kito monantian Ponyolamant kito, Tuhatn Yesus Kristus, datakng agi'.

Matius 24:26

Jadi, aman urakng bopandir ko kaitn, ‘Tiat, Rajo Inyo Dijanjian Allah ado di padakng pasir,’ jangan kaitn botula' ko su'utn. Damo aman sia' bopandir, ‘Tiat, Sio botapu' dalapm kamar di su'utn,’ jangan pocayo.

1 Timotius 6:14

Labuhancam porintah nantai agatn kotakng boi' sampai watu Yesus Kristus, Tuhatn kito bobali' datakng agi'.

1 Petrus 1:7

Tujuan doi' somuo kosusahan nantai ia'an pakai' mombutian aman kaitn bondar-bondar pocayo ko Tuhatn kata'an cadoai. Kopocaya'an kaitn nantai lobih borogo daripado omas. Biar pan kinyo tahatn somanahnyo, omas pan diuji agatn api pakai' mombutian aman omas nian murni kata'an cado. Jadi, kopocaya'an kaitn pan diuji jam. Agatn ubo nantai, aman kaitn bobondar pocayo, nononyo kaitn tajahannyo dipuji, dimuliaan, ongko dihormati, nantai tajahannyo tojadi watu Yesus Kristus datakng agi' monyatoan diri-Nyo.

2 Petrus 3:1

Boko somadikan inyo ku kasihi, ni'in udah surat inyo koduo, inyo ku tulis ko kaitn. Di dalapm koduo surat nantai, aku bousaha monyadaran kaitn pakai' bopikir agatn caro inyo bondar.

2 Petrus 3:16

Dalapm somuo suratnyo, Paulus monulis mongona'i hal nantai. Memang dalapm boko suratnyo nantai ado boko hal inyo uyuh dimongoroti sampai ado boko urakng momutarbali'an hal nantai sosuai agatn pikiran sia' siku'. Apo sia' ia'an urakng inyo kinyo mongoroti huatan kinyo kuat pocayo. Sia' molabuhan hal nantai agatn boko hal inyo ditulis hulutn Allah inyo bukainyo jam. Obai nantai, sia' sikuꞌ moakibat'an kobinasoan sia' mo.

Matius 25:7

Boko botina' daro nantai huas lalu monyiap'an pompolitoan sia' masikng-masikng.