2 Petrus 2:3 - Porjanjian Boharu Torjomahan Baso Dilakng Soari-ari

³ Obai boko guru palsu nantai tama', jadi sia' paca'an bousaha moncari' untukng doi' kaitn agatn boko kisah inyo dipulah-pulah sia'. Apo, Allah udah manaham siap mohukupm sia'. Kinyo manah agi' sia' tajahan bonaso.

2 Petrus 2:3 ပူးပေါင်းရင်းမြစ်များ

Matius 23:14

Allah paca'an mohukupm kaitn boko guru agama Yahudi huatan boko urakng Farisi. Kaitn pompadah boi' ja'. Kaitn monipu boko botina'-balu pakai' mondapat'an kodampuan sia'. Sampai rumah sia' pan kaitn kuti'. Kaitn moucap'an doa inyo panjakng-panjakng, apo nantai bayo pompadah ja'am. Obai nantaiam, Allah pasti paca'an mohukupm kaitn lobih borat doi' urakng bukai.]

Lukas 18:8

Aku bopandir ko kaitn: Allah pasti janjakng molabuhan la'apo inyo adil pakai' sia'. Apo watu Ana' Monsio datakng bobali' ko dunia ni'in, bolupm pasti apobai Io monomu'i banya' urakng inyo totap pocayo ko Io.”

Lukas 20:20

Jadi, boko guru agama Yahudi huatan boko imam kopala' bogoyap caro oca' sia' ulih mombaba' Yesus ko gubernur Romawi pakai' dihukupm. Lalu sia' hala borotian Yesus. Malahan sia' moncubo bulah gogadatn pakai' Sio. Sia' moutus boboropo urakng ko Yesus pakai' botakutn ubonyo tujuannyo boi', apo sobondarnyo sia' honda' oca' Yesus mongatoan sosuatu inyo salah.

Lukas 22:47

Tongahan Yesus ija' bopandir, sorombokan urakng datakng. Sia' dipimpitn Yudas, salah siku' urakng doi' koduo bolas murid Yesus. Yudas mohampiki Yesus pakai' monyalapi Sio kapikng monciupm.

Yohanes 2:16

Sio pan bopandir ko boko urakng inyo monjual burukng daro nantai. Kato-Nyo, “Koluarancam somuo burukng ni'in. Rumah Bopai-Ku Jangan dipulah monjadi rumah tompat bodagakng!”

Roma 16:18

Obai, boko urakng inyo molabuhan ubo nantai sobondarnyo co bokorojo molayati Kristus, Tuhatn kito. Sia' bayo honda' mongosihan kohonda' sia' siku'. Sia' momuji-muji agatn pomandiran inyo manis pakai' monipu urakng inyo co tohu tujuan sia' inyo jahat.

2 Korintus 2:17

Obai, banya' urakng momboritoan Pomandiran Allah pakai' mondapat'an kountukan. Apo, koi co sama'an sia'. Koi momboritoan Pomandiran Allah agatn hati inyo tulus. Koi momboritoan sobagai urakng inyo diutus Allah, urakng inyo bopandir di hadapan Allah, urakng inyo hidup dalapm Kristus.

1 Tesalonika 2:5

Kaitn udah tohu koi co kalo bopandir bayo pakai' nyaman kaitn dinga'. Koi pan co kalo bototapu' pakai' bogoyap duit. Jadi Allah pan tohu mo nantai.

1 Tesalonika 5:3

Paca'an ado boko urakng inyo mongatoan, “Somuonyo boi'-boi' mo.” Apo malahan watu nantai socaro sopongirap sia' paca'an dibonasoan samo sama'an siku' urakng botina' buntikan inyo socaro sopongirap moalapi mohidap-porut honda' boana'an. Botina' nantai co dapat moloukan doi' oso podih porut nantai. Ubo nian jam, sia' inyo co pocayo kinyo paca'an ulih moloukandoi' hukupan nantai.

1 Timotius 3:3

Io co ulih jadi urakng pomabu'. Io co ulih jadi urakng inyo hala boporap apo gola' lomah-lombut. Io co ulih jadi urakng ponggodian. Io co ulih kaha' agatn duit.

1 Timotius 3:8

Samo sama'an ponotua', boko diakon gola' hidup agatn caro inyo boi'. Sia' gola' tohormat. Sia' gola' jadi urakng jujur. Sia' co ulih jadi urakng ongkah hala mabu'. Sia' co ulih kaha'-kolobu'.

1 Timotius 6:5

Sia' hala botikakng co nyiant kotuntukannyo. Pikiran sia' udah rusa' sampai sia' co ulih agi' monyongkayoan inyo salah huatan inyo bondar. Sia' bopikir, aman sia' molabuhan ajaran agama mondatakan kodampuan.

Titus 1:11

Kolai gola' monongga'an sia'. Jangan molongahan sia' moajaran boko hal inyo sobondarnyo co ulih diajaran. Obai ajaran sia' udah bulah banya' koluarga disosatan. Sia' ngontumbuki urakng agatn ajaran sia', oca' sia' mondapat'an untukng.

Titus 1:7

Siku' urakng pongawas jomaat bokorojo moatur Rumah Allah. Obai niannam, io gola' hidup bujur bondar. Io culih buhau. Io culih copat godi damo urakng inyo pomabu'. Io culih gala' bokolohi damo gala' ngontumbuki urakng oca' mondapat'an untukng.

1 Petrus 2:8

“Nantai am ‘Batu bulah sia' topanjur.’ Batu inyo bulah sia' tokorahap.” Sia' topanjur ko batu nantai obai sia' kinyo monaati Pomandiran Allah. Nantaiam inyo udah ditontuan Allah pakai' sia'.

1 Petrus 5:2

Kobolo cam boko domba Allah inyo ado di kaitn. Kaitn gola' momimpitn sia' agatn sonang hati sosuai agatn kohonda' Allah. Jangan mooso toposo. Layati sia' obai kaitn bondar-bondar monulukng, bukainyo obai kaitn honda' bogoyap untukng.

2 Petrus 1:16

Koi udah momadahannyo ko kaitn mongona'i kuaso Yesus Kristus, Tuhatn kito ongko mongona'i kodatakan-Nyo ko dunia ni'in. Nantai bukainyo kisah inyo dipulah-pulah boko monsio. Koi moniant agatn mato koi siku' obai Sio mulia.

2 Petrus 2:1

Apo, pado joman komai ado boko nabi palsu jam di antaro boko urakng inyo pocayo ko Allah. Samo sama'an nantai, di antaro kaitn paca'an ado boko guru palsu. Sia' paca'an monipu urakng agatn boko ajaran salah inyo mombonasoan urakng. Malah sia' paca'an monyangkal Tuhatn Yesus inyo bokuaso atas sia', padohal Sio inyo udah monobus oca' sia' dapat dibebasan doi' hukupan dosa sia'. Obai porbuatan sia' siku' nantai, jadi sia' paca'an copat bonaso.

2 Petrus 2:9

Obai Tuhatn udah molabuhan somuonyo nantai, jadi udah jolas Sio tohu caronyo monyolamant'an boko urakng bondar doi' ajab sonsaro di antaro boko urakng jahat. Tuhatn jam tohu caronyo mohukupm boko urakng jahat sampai hukupan toahir timpu ari Ponghakipan nononyo,

Yudas 1:11

Tuhatn paca'an mohukupm sia'! Obai, caro hidup sia' jahat samo sama'an Kain doi' joman komai. Sia' gala' bulah kosalahan oca' sia' dapat duit samo sama'an Bileam. Sia' pan sama'an Korah jam obai sia' momborontak molawatn Allah huatan boko pomimpitn inyo dipilih Allah. Sia' paca'an dibonasoan samo sama'an io jam.

Yudas 1:15

Sio paca'an mohakipi somuo urakng. Sio paca'an mohukupm somuo urakng obai porbuatannyo inyo jahat. Sio paca'an mohukupm somuo urakng bodosa obai boko pomandiran jahat inyo dipandiran ko Tuhatn.”

Yudas 1:16

Boko urakng nantai ongkah botuta', gala' moncari-cari kosalahan urakng. Sia' dikuaso'i kohonda' bukakng inyo jahat. Sia' buhau momuji diri. Apo sia' pan momuji-muji urakng bukai oca' bodapat kountukan pakai' diri sia' siku'.

Yudas 1:4

Obai, ado boko urakng totontu inyo molawatn Allah. Nyatonyo, sia' udah mansu' dalapm kolompok kaitn inyo co urakng bukai sadar obai sia' kinyo bondar-bondar pocayo ko Yesus. Sia' mongatoan Allah kito kinyo paca'an mohukupm urakng obai Sio boi' hati. Sia' gunoan pomikiran inyo salah nantai oca' sia' ulih mongosihan boko kohonda' bukakng-tubuh sia' inyo jahat. Sia' jam monula' obai Yesus Kristus ia'an satu-satunyo Tuhatn inyo bokuaso dipucu' kito. Doi' komai, udah ditulis obai sia' paca'an dihukupm.

Yudas 1:7

Boko urakng di kota Sodom ongko Gomora huatan boko kota di sokitarnyo sama'an nantai jam. Sia' bulah pomporajoan. Sia' momuasan boko kohonda' bukakng-tubuh inyo kinyo wajar. Jadi, sia' dihukupm, ija' disiksa agatn api inyo kinyo tohu puja' somanah-manahnyo. Kojadian nantai monjadi poringant'an pakai' somuo urakng.