2 Petrus 2:18 - Porjanjian Boharu Torjomahan Baso Dilakng Soari-ari

¹⁸ Obai, sia' mongajar agatn pomandiran solah-olah sia' kotakan pintar, apo sobondarnyo pomandiran sia' conyiant gunonyo. Agatn caro nantai, sia' mompongaruhi boko urakng pakai' moikuti hawa napsu inyo jahat, ia'an boko urakng inyo hoyu' pan koluar doi' kobiasa'an boko urakng inyo hidup agatn caro inyo salah.

2 Petrus 2:18 ပူးပေါင်းရင်းမြစ်များ

2 Petrus 2:20

Doi' komai, sia' hidup di babah kuaso dosa. Apo, lopas nantai sia' ulih mongonal Yesus Kristus, Ponyolamant huatan Tuhatn inyo bokuaso pucu' kito. Obai nantai, sia' ulih tolopas doi' kuaso dosa nantai. Apo, watu ni'in sia' udah bobali' tokobat hidup sama'an nantai. Jadi, koadaan sia' watu ni'in lobih buru' doi' sobolupmnyo.

2 Petrus 1:4

Agatn caro nantai, Sio udah moonji'i kito boko janji inyo kotakan borogo ongko kotakan pontikng. Sio moonju' boko janji nantai oca' kaitn dapat sipat inyo samo sama'an Allah ongko oca' kaitn dapat disolamant'an doi' boko kohonda' di dunia ni'in, boko kohonda' jahat inyo bulah urakng bonaso.

Roma 13:13

Kito gola' hidup agatn caro inyo sopatn sama'an urakng inyo hidup dalapm torakng. Jangannam kito ruah-runsakan ongko hala komabu'an. Jangannam kito bulah dosa kojahatan ongko tuyut kohonda' bukakng inyo jahat. Janganam kito tungi ongko hala bokolohi.

Yakobus 5:5

Kaitn hidup socaro bokolobihan di dunia ni'in. Kaitn hidup ongkah pakai' monyonangan diri siku'. Apo co manah kaitn paca'an dihukupm. Jadi, kaitn samo sama'an bonatakng inyo monjadi gomu' co manah bonatakng nantai disombolih.

2 Tesalonika 2:4

Apo sobolupm io dibonasoan, io paca'an molawatn somuo hal inyo monsio anggap sobagai allah huatan somuo hal inyo disombah monsio. Io paca'an momandiran obai io lobih bokuaso doi' somuo allah nantai. Malahan, io paca'an mansu' ko dalapm Rumah Allah. Io paca'an dudu' di santai ongko moaku'i obai io nantai Allah.

Wahyu 13:11

Lopas nian, aku moniant siku' bonatakng bukai koluar doi' dalapm tanah. Io botandu' duo sama'an tandu' siku' ana' domba. Io bopandir sama'an siku' nago.

Yudas 1:13

Sia' samo sama'an golumbakng bosar inyo mombaba' apukng inyo kotor, ia'an porbuatan jahat sia' inyo soharusnyo mombulah sia' malu. Sia' sama'an boko bintakng inyo bopindah-pindah. Jadi, boko urakng nantai paca'an dihukupm somanah-manahnyo di tompat inyo kotakan potakng-hiru' inyo udah disodiaan pakai' sia'.

Kisah Boko Rasul 8:9

Di kota nantai ado siku' urakng boponohu. Damonyo Simon. Io udah manah bulah boko urakng di doerah Samaria tohiratn-hiratn agatn ponohunyo. Io pan moaku'i dirinyo sobagai urakng inyo hebat.

Kisah Boko Rasul 2:40

Petrus bisi banya' pomandiran inyo bukai agi' pakai' monguat'an hati sia' huatan moingant'an sia'. Katonyo, “Allah tajahan monjatu'an hukupan ko boko urakng joman ni'in inyo jahat. Culih hala sonjumpat'an sia' oca' kaitn disolamant'an doi' hukupan nantai.”

Efesus 4:17

Obai nantai aku momandiran ni'in, malahan aku monyiuh kaitn dalapm Tuhatn: Jangan agi' hidup sama'an boko urakng inyo kinyo mongonal Allah. Pikiran sia' sia-sia.

2 Petrus 2:2

Banya' urakng paca'an monumpakng caro hidup sia' inyo dikuaso'i hawa napsu inyo jahat. Obai sia' molabuhan nantai, jadi urakng bukai paca'an mohayam Jalatn Kristus Inyo Bondar.

2 Petrus 2:7

Apo, pado watu nantai, Allah monyolamant'an Lot doi' hukupan nantai. Lot ia'an urakng inyo hidup bondar di hadapan Allah. Lot hala mondorita'dalapm hatinyo obai io moniant caro hidup boko urakng di boko kota nantai. Sia' kinyo honda' hidup sosuai agatn porintah Allah. Sia' ongkah moikuti hawa napsu inyo jahat.

2 Petrus 2:14

Sia' kinyo kalo suah bulah dosa. Mato sia' hala moncari' boko botina' inyo gala' bomporajoan. Sia' mompongaruhi boko urakng inyo bolupm pocayo agatn kuat. Hati sia' udah tolatih monjadi tama'. Jadi, Allah pasti mohukupm sia'!

2 Petrus 3:17

Apo kaitn, boko somadikan inyo ku kasihi, kaitn udah mongotohu'i mongona'i hal nantai. Jadi, bojojagocam tohadap boko urakng nantai inyo kinyo honda' hidup sosuai agatn porintah Allah. Jangan sampai sia' mombulah kaitn pocayo ajaran inyo salah sampai kaitn kinyo agi' pocayo kuat ko Yesus Kristus.