2 Petrus 2:13 - Porjanjian Boharu Torjomahan Baso Dilakng Soari-ari

¹³ Obai sia' mombulah urakng bukai mondorita', jadi sia' paca'an mondorita' jam. Nantaiam upah inyo sia' dapat. Watu siakng ari pan, sia' sonang bopesta pora. Timpu sia' dudu' makatn borindakan agatn kaitn, sia' tama' momuasan hawa napsu sia'. Agatn sama'an nian, sia' morusa' damo kaitn.

2 Petrus 2:13 ပူးပေါင်းရင်းမြစ်များ

Roma 13:13

Kito gola' hidup agatn caro inyo sopatn sama'an urakng inyo hidup dalapm torakng. Jangannam kito ruah-runsakan ongko hala komabu'an. Jangannam kito bulah dosa kojahatan ongko tuyut kohonda' bukakng inyo jahat. Janganam kito tungi ongko hala bokolohi.

Efesus 5:27

Agatn sama'an nantai, Kristus mombulah oca' sia' ulih bodiritn di hadapan-Nyo sobagai jomaat inyo mulia, kinyo bodosa, kinyo ado kosalahan la'apo pan. Sia' bondar-bondar monjadi borosih huatan kinyo ulih disalahan.

Filipi 3:19

Ponjadi'nyo, boko urakng nantai tajahan bonaso. Sia' hidup monuruti kohonda' tubuh sia' siku' daripado hidup monuruti kohonda' Allah. Sia' bangga mongona'i boko porbuatan sia' inyo jahat inyo soharusnyo mombulah sia' malu. Sia' bayo bopikir mongona'i boko hal di dunia ni'in mo.

2 Timotius 4:14

Ado tukakng tompo inyo bodamo Aleksander. Io udah molabuhan banya' hal inyo jahat pakai' molawatn polayatanku. Obai nantai, Tuhatn paca'an mohukupm io.

Yakobus 5:5

Kaitn hidup socaro bokolobihan di dunia ni'in. Kaitn hidup ongkah pakai' monyonangan diri siku'. Apo co manah kaitn paca'an dihukupm. Jadi, kaitn samo sama'an bonatakng inyo monjadi gomu' co manah bonatakng nantai disombolih.

1 Petrus 4:4

Apo ni'in kaitn co hidup ubo nantai agi'. Boko urakng hiratn mapo kaitn co moikuti caro hidup sia' inyo bodosa. Obai nantaiam, sia' monjahai'-jahai'an kaitn.

2 Petrus 2:15

Sia' udah moninggalan caro hidup inyo bondar. Sia' tuyut caro hidup inyo salah. Sia' tuyut caro hidup Bileam, ana' Beor. Timpu joman komai, nabi Bileam nantai opat monorima' upah doi' porbuatan inyo jahat.

Wahyu 18:6

Pulahcam ko io samo sama'an io pulah ko urakng bukai. Balascam io duo kali lipat pakai' somuo porbuatannyo inyo jahat. Isicam cangkirnyo agatn minuman inyo duo kali lipat lobih koras.