2 Petrus 1:12 - Porjanjian Boharu Torjomahan Baso Dilakng Soari-ari

¹² Memang kaitn udah mongotohu'i somuo ni'inan. Kaitn udah kuat pocayo agatn ajaran bondar inyo udah disampaian ko kaitn. Apo, kohonda' ku pakai' hala moingant'an kaitn mongona'i somuonyo nantai.

2 Petrus 1:12 ပူးပေါင်းရင်းမြစ်များ

Kisah Boko Rasul 16:5

Agatn caro nantai, boko jomaat monjadi lobih kuat pocayo ko Yesus. Mongkitn manah mongkitn banya' urakng monjadi pocayo agatn Yesus.

Filipi 3:1

Ahirnyo, boko somadikanku, kaitn sonang-nyamancam di dalapm Tuhatn. Bilo apo mo aman aku monulis agi' mongona'i boko hal ni'in ko kaitn. Boko hal ni'in monjago oca' kaitn totap hidup sosuai agatn kohonda' Tuhatn.

Kolose 1:5

Kaitn pocayo huatan mongasihi obai kaitn yakitn moharap'an somuo inyo disodiaan pakai' kaitn di sorugo. Kaitn udah mondinga' mongona'i nantai dalapm Kabar Boi' inyo bondar

Kolose 2:7

Kohonda'nyo kaitn totap pocayo ko Sio huatan botumbuh dalapm Sio. Kohonda'nyo kaitn botambah kuat pocayo ko somuo ajaran inyo bondar inyo udah disampaian ko kaitn. Kohonda'nyo hati kaitn hala bosukur.

1 Timotius 4:6

Ajarancam boko hal nantai ko somuo urakng inyo pocayo. Aman ubo nian, kolai paca'an molayati Kristus Yesus agatn kotakng boi', kolai pan paca'an lobih kuat pocayo ko boko ajaran mongona'i kopocaya'an kito huatan dalapm ajaran inyo udah kolai jumpati somanah ni'in.

2 Timotius 1:6

Obai nantai, aku moingant'an kolai pakai' bulah komampuan husus kolai oca'nyo bonyalo lobih honggur. Komampuan husus nantai boasal doi' Allah timpu aku molota'an jariku ko pucu' kopala' kolai.

Ibrani 10:32

Apo, ingantcam watu solopas kaitn boharu pocayo ko Yesus ongko hidup dalapm torakng. Pado watu nantai, kaitn kotakng ajab sonsaro apo kaitn totap kuat botahatn.

Ibrani 13:9

Jangan tontuyutan boko bomacapm ajaran molikahan inyo mombulah kaitn sosat. Obai, inyo boi' ia'an hati kaitn monjadi kuat doi' kasih karunia Allah, bukainyo doi' boko poraturan mongona'i pomakatn. Boko poraturan nantai kinyo ado gunonyo pakai' boko urakng inyo moikutinyo.

1 Petrus 5:10

Apo, pondorita'an nantai sotogalmo. Allah siku' paca'an bulah hidup kaitn monjadi sompurna. Sio pasti mohibur kaitn huatan bulah kaitn botahatn. Sio pasti monulukng kaitn oca' kaitn ulih pocayo agatn kuat. Sio inyo hala monunju'an koboi'an-Nyo. Sio bokuaso pakai' somanah-manahnyo, huatan Sio udah moningkau kaitn oca' mondapat bagian doi' kuaso-Nyo nantai obai kaitn pocayo ko Kristus.

1 Petrus 5:12

Aku monulis surat singkat ni'in di tulukng Silas. Io nam somadikan, somadikan soiman inyo sotia. Aku monulis surat ni'in pakai' momadahi huatan moonji'i somangant ko kaitn. Aku pan honda' oca' kaitn yakitn obai isi suratku ni'in bondar-bondar mongona'i koboi'an Allah. Kaitn gola' totap hidup dalapm koboi'an-Nyo nantai.

2 Petrus 1:13

Aku mooso nantai tugasku pakai' moingant'an kaitn mongona'i boko hal nantai somanahan ku ija' hidup di dunia ni'in.

2 Petrus 1:15

Jadi, aku bousaha agatn koras watu ni'in oca' kaitn tajahan hala moingant somuonyo nantai biar pan aku udah mati.

2 Petrus 3:1

Boko somadikan inyo ku kasihi, ni'in udah surat inyo koduo, inyo ku tulis ko kaitn. Di dalapm koduo surat nantai, aku bousaha monyadaran kaitn pakai' bopikir agatn caro inyo bondar.

2 Petrus 3:17

Apo kaitn, boko somadikan inyo ku kasihi, kaitn udah mongotohu'i mongona'i hal nantai. Jadi, bojojagocam tohadap boko urakng nantai inyo kinyo honda' hidup sosuai agatn porintah Allah. Jangan sampai sia' mombulah kaitn pocayo ajaran inyo salah sampai kaitn kinyo agi' pocayo kuat ko Yesus Kristus.

1 Yohanes 2:21

Aku monulis ni'in ko kaitn, bukainyo obai kaitn co mongotohu'i kobondaran, apo obai kaitn mongotohu'inyo. Obai kaitn pan mongotohu'i obai conyiant kotumbukan di dalapm ajaran inyo bondar nantai.

2 Yohanes 1:2

Obai kito sosamo pocayo agatn ajaran inyo bondar ongko kito paca'an pocayo somanah-manahnyo.

Yudas 1:17

Apo, kaitn, boko somadikanku inyo ku kasihi, ingant cam pomandiran inyo komai udah dipadahan ko kaitn doi' boko rasul Yesus Kristus, Tuhatn inyo bokuaso.

Yudas 1:3

Boko somadikan inyo ku kasihi! Kito samo-samo disolamant'an huatan aku bondar-bondar honda' monulis ko kaitn mongona'i nantai. Apo, aku mooso gola' monulis ko kaitn pakai' monguat'an kopocaya'an kaitn. Agatn sama'an nian, aku honda' oca' kaitn totap bojuakng mompotahatan iman kito, ia'an boko ajaran bondar inyo udah disampaian ko boko urakng husus umputn Allah.

Yudas 1:5

Pasti Tuhatn mohukupm urakng inyo jahat. Kaitn udah mongotohu'i mongona'i somuo ni'in, apo aku honda' moingant'an kaitn aja'am. Timpu joman komai, Tuhatn monyolamant'an banso Israel doi' hulutn-pacal di nogori Mesir. Apo, lopas nian Sio mombonasoan sia' inyo kinyo pocayo.