2 Korintus 8:2 - Porjanjian Boharu Torjomahan Baso Dilakng Soari-ari

² Sia' diuji agatn bomacapm pondorita'an. Apo Allah mombulah hati sia' kotakan sonang. Sia' kotakan jaro, apo Allah mombulah hati sia' kotakan sonang moonji'i sumbakan pakai' monulukng urakng bukai.

2 Korintus 8:2 ပူးပေါင်းရင်းမြစ်များ

Matius 20:15

Pasti aku bebas momakai somuo umputnku monurut kohonda' hatiku. Kata'an kulo tungi obai aku boi' hati ko urakng bukai ai?’ ”

Roma 12:8

Aman ado urakng inyo dionji'i komampuan husus pakai' moonji'i somangant ko urakng bukai, io gola' moonji'i somangant. Urakng inyo dionji'i komampuan husus pakai' mombagi umputnnyo ko urakng bukai, io gola' molabuhan nantai agatn boi' hati. Urakng inyo dionji'i komampuan husus pakai' momimpitn, io gola' molabuhan nantai agatn rajitn. Urakng inyo dionji'i komampuan husus pakai' monunju'an kasih ko urakng bukai, io gola' molabuhan nantai agatn sonang.

Roma 2:4

Allah kotakan boi' huatan sabar ko kaitn. Sio kinyo lansukng mohukupm kaitn. Jangan moanggap koboi'an-Nyo nantai kinyo borogo? Kaitn gola' mongoroti obai Allah monunju'an koboi'an-Nyo ko kaitn obai Sio honda' oca' kaitn moninggalan boko dosa kaitn.

2 Korintus 1:12

Boko somadikan, koi bangga mongona'i ni'in: Dalapm hati koi siku', koi tohu obai caro hidup koi di dunia ni'in kinyo salah, hususnyo dalapm hubukan koi agatn kaitn. Koi molabuhan boko hal agatn hati inyo tulus ongko borosih. Hati ubo nantai doi' Allah. Koi molabuhan somuonyo agatn koboi'an-Nyo, bukainyo agatn Kobijaksana'an monsio.

2 Korintus 2:9

(Dalapm surat ku komai, aku monulis ko kaitn boboropo potunju' pakai' mourus pokaro nantai. Tujuan ku pakai' mouji kaitn apobai kaitn taat dalapm la'apo pan.)

2 Korintus 6:10

Opat jam koi salu', apo hala adomo mooso sonang-nyamannyo. Koi jaro, apo bulah urakng banya' monjadi dampu dalapm Tuhatn. Koi conyiant ado la'apo pan, apo sobondarnyo koi dampu dalapm Kristus.

2 Korintus 9:11

Masudnyo, Allah tajahan moonji'i kaitn lobih doi' cukup oca' kaitn ulih moonji'i urakng bukai agatn rokah. Lalu, timpu koi monyampaian sumbakan kaitn nononyo, banya' urakng paca'an bosukur ko Allah.

2 Korintus 9:13

Doi' polayatan inyo kaitn labuhan nantai. Sia' tajahan momuji Allah obai kotaatan kaitn tohadap kabar boi' mongona'i Kristus inyo udah kaitn jumpati. Sia' pan paca'an momuji Allah obai kaitn agatn sonang hati moonju' sumbakan ko sia' ongko ko somuo urakng.

1 Tesalonika 1:6

Ongko, kaitn hidup agatn caro inyo samo sama'an koi, huatan samo sama'an Tuhatn Yesus jam. Masud aku, watu kaitn monjadi pocayo ko Yesus, kaitn kotakng di dorako'i. Apo kaitn totap pocayo Kabar Boi' nantai agatn rindakng-rigah doi' Roh Allah.

1 Tesalonika 2:14

Butinyo ia'an kaitn sonjumpat'an caro hidup inyo samo sama'an boko urakng inyo pocayo ko Kristus Yesus di doerah Yudea. Lopas kaitn monjadi pocayo, kaitn didorako'i boko urakng doi' banso kaitn siku'. Sama'an nantai jam, lopas boko urakng Yahudi di doerah Yudea monjadi pocayo, sia' didorako'i boko urakng doi' banso sia' sikuꞌ.

Yakobus 2:5

Boko somadikan inyo ku kasihi! Dinga'anbo ni'in! Allah momilih boko urakng jaro di dunia pakai' monjadi urakng inyo bondar-bondar konal agatn Sio. Obai sia' pocayo ko Yesus, jadi sia' monjadi ahli waris Koraja'an Allah. Nantaiam kodampuan inyo Allah janjian ko somuo urakng inyo mongasihi Sio.

Wahyu 2:9

Aku tohu obai kaitn didorako'i obai pocayo ko Aku. Aku tohu obai kaitn jaro, apo ingant cam obai sobondarnyo kaitn dampu! Aku tohu obai kaitn dipojahat ulih boko urakng inyo monyobut dirinyo urakng Yahudi. Apo sobondarnyo sia' bukainyo anggota umant Allah. Sia' anggota umant Rajo Sitatn!