2 Korintus 7:5 - Porjanjian Boharu Torjomahan Baso Dilakng Soari-ari

⁵ Pas watu koi datakng di propinsi Makedonia, koi co sampat torahat. Koi mohadapi pondorita'an di mono-mono. Di luar ado urakng inyo molawatn koi. Di dalapm hati koi ado jam kokuatiran.

2 Korintus 7:5 ပူးပေါင်းရင်းမြစ်များ

2 Korintus 2:13

Apo, aku co botomu agatn somadikanku Titus di su'utan. Jadi, hatiku kinyo nyamanam. Obai nantai, aku bokotohuan lalu botula' ko propinsi Makedonia.

Kisah Boko Rasul 20:1

Lopas boko urakng di kota Efesus langunt am, Paulus mongumpulan boko urakng pocayo. Io monulukng oca' sia' pocayo ko Yesus agatn lobih yakitn, ongko bopadah pulakng. Lopas nantai, io botula' ko propinsi Makedonia.

1 Tesalonika 3:5

Obai nantaiam aku gola' uti' Rajo Sitatn bohasil moncubo'i kaitn oca' co pocayo agi' ko Yesus. Soumpamonyo hal nantai tojadi, rotinyo somuo polayatan koi di antaro kaitn co nyiant pasalnyo. Aku co ulih monahan oso togonanganku agi', jadi aku moutus Timotius ko kaitn. Aku honda' mondinga' borito mongona'i kopocaya'an kaitn ko Yesus.

Galatia 4:11

Jadi, aku kuatir aman uyuh jorihku pakai' kaitn monjadi co nyiant rotinyo.

2 Korintus 2:9

(Dalapm surat ku komai, aku monulis ko kaitn boboropo potunju' pakai' mourus pokaro nantai. Tujuan ku pakai' mouji kaitn apobai kaitn taat dalapm la'apo pan.)

2 Korintus 2:3

Nantai sobabnyo, daripado aku datakng, lobih boi' aku monulis surat holu ko kaitn. Aku co honda' datakng lalu kaitn mombulah ku salu'. Obai soharusnyo kaitn nam inyo bulah aku sonang-nyamanam! Jadi aku monulis surat holu, obai aku yakitn aman aku rindakng, jadi kaitn tajahan rindakng jam.

1 Korintus 16:5

Aku ija' honda' datakng ko kaitn apo aku ado hajat paca'an molalu'i doerah Makedonia doholu.

1 Korintus 15:31

Bondar, boko somadikan! Sotiap ari aku ajab sonsaro mohadapi komatian. Aku bosumpah obai nantai bondar, samo sama'an oso bompangkakanku ko kaitn pan bondar. Aku bopangkakng agatn kaitn di dalapm Kristus Yesus. Kristus Yesus nantai Tuhatn inyo bokuaso di pucu' kito.

Roma 15:26

Obai, boko jomaat di doerah Makedonia ongko Akhaya udah mombulah koputusan pakai' moonji'i sumbakan nantai pakai' monulukng urakng pocayo inyo jaro di Yerusalem.