2 Korintus 7:15 - Porjanjian Boharu Torjomahan Baso Dilakng Soari-ari

¹⁵ Watu ni'in, io mongkitn mongasihi kaitn. Obai, io moingant kaitn monorima' io agatn hormat huatan kaitn somuo taat.

2 Korintus 7:15 ပူးပေါင်းရင်းမြစ်များ

Filipi 2:12

Boko somadikanku inyo ku kasihi, kaitn hala monaati Allah. Jadi, totap gola' ongko mohormati Sio kapikng kaitn bousaha hidup agatn caro inyo cucu' pakai' boko urakng inyo udah disolamant'an. Kaitn gola' molabuhan nantai bukai aja' sama'an komai timpu aku bosamo agatn kaitn apo lobih agi' watu ni'in watu aku co bosamo agatn kaitn.

2 Korintus 2:9

(Dalapm surat ku komai, aku monulis ko kaitn boboropo potunju' pakai' mourus pokaro nantai. Tujuan ku pakai' mouji kaitn apobai kaitn taat dalapm la'apo pan.)

1 Yohanes 3:17

Sopo pan inyo hidupnyo dampu, huatan io pan moniant somadikannyo jaro uyuh, apo io co honda' monulukng urakng nantai, ubo apo kasih Allah ado dalapm dirinyo!

2 Tesalonika 3:14

Aman ado urakng inyo kinyo mongikuti boko ajaran koi dalapm surat ni'in, pontiat'ancam sopo io. Jangan bokawal agatn io oca' io monjadi malu obai kosalahannyo nantai.

Kolose 3:12

Obai nantai, hidupcam agatn caro inyo boharu. Kaitn nantai boko urakng inyo dipilih Allah, pakai' umputn Sio inyo husus huatan dikasihi-Nyo. Jadi, jadicam urakng inyo mongasihi, boi' hati, rondah hati, lomah-lombut, huatan sabar.

Filipi 1:8

Jadi, Allah tohu obai aku togonangan kaitn somuo obai aku mongasihi kaitn samo sama'an Kristus Yesus mongasihi kaitn.

2 Korintus 6:12

Koi kotakan mongasihi kaitn kinyo tobatas. Apo kaitn monahan kasih kaitn tohadap koi.

Kisah Boko Rasul 16:29

Kopala' ponjara nantai monyiuh hulutnnyo monguti' obor. Ongko, sia' bonggidi'an mansu' ko dalapm. Kopala' ponjara topogola', io bogogora' ongko tokodudu' di hadapan Paulus ongko Silas.

Efesus 6:5

Ko boko hulutn aku momadahan: kaitn gola' monurut agatn habakng kaitn inyo ado di dunia ni'in. Tundu' ko sia' agatn hormat huatan hati inyo jujur, samo sama'an caro kaitn monaati Kristus.

Yohanes 16:21

Hal nantai samo sama'an siku' botina' tongahan mohidap-porut. Timpu io honda' boana', io jorih uyuh obai mondorita'. Apo lopas io jadi boana', io co ingant agi' pondorita'annyo nantai. Obai, io sonang udah boana'am.

1 Korintus 2:3

Somanahan aku bosamo agatn kaitn, aku lomah. Aku bogogora' obai gola'.