2 Korintus 5:17 - Porjanjian Boharu Torjomahan Baso Dilakng Soari-ari

¹⁷ Boko urakng inyo ado di dalapm Kristus, sia' monjadi monsio boharu. Sia' udah botongga' hidup agatn caro inyo manah. Sobondarnyo, sia' hidup agatn caro inyo boharu.

2 Korintus 5:17 ပူးပေါင်းရင်းမြစ်များ

Yohanes 3:3

Timbas Yesus, “Porotiancam! Bobondar inyo Ku pandiran ni'in: Conyiant ado urakng inyo ulih moniant Koraja'an Allah aman io co dilahiran agi'.”

Galatia 6:15

Disunant kata'an co bosunant nantai co nyiant bedanyo. Inyo pontikng ia'an kito hidup agatn caro inyo boharu.

Roma 8:1

Obai nianam, watu ni'in Allah kinyo mohukupm urakng inyo ado di dalapm Kristus Yesus.

Efesus 2:10

Obai kito ni'in pulahan Allah huatan molalu'i Kristus, Allah mombulah kito oca' kito molabuhan boko hal inyo boi', ia'an boko pokoroja'an inyo udah Sio siap'an sobolupmnyo pakai' kito.

1 Korintus 1:30

Jadi, kaitn ado hubukan dokat agatn Kristus Yesus obai porbuatan Allah, bukainyo obai porbuatan kaitn. Yesus monjadi kopintar-corodi'an Allah bagi kito. Molalu'i Yesus, kito monjadi bondar di hadapan Allah. Kito pan monjadi umant husus pakai' umputn Sio. Sio monanggukng hukupan dosa kito pakai' monobus kito.

Yohanes 15:5

Aku ninam kondukng anggur. Kaitn nam samo sama'an dahatnnyo. Urakng gola' totap bosatu agatn Aku, lalu Aku paca'an bosatu agatn io. Aman ubo nian, io paca'an bobuah lobat. Obai, aman kaitn co bosatu agatn Aku, jadi kaitn culih bulah la'apo pan inyo boi'.

2 Korintus 5:21

Kristus kinyo bodosa, apo Allah bulah Sio monanggukng hukupan dosa kito. Allah molabuhan nantai oca' di dalapm Kristus, kito ulih monjadi bondar di hadapan Allah.

Roma 7:6

Apo watu ni'in, kito dibebasan. Kito kinyo tokobat agi' ko Hukupm Torat obai caro hidup kito inyo manah nantai udah mati. Watu ni'in, kito hidup agatn caro inyo boharu. Kito molayati Allah bukainyo agatn caro hidup inyo monuruti Hukupm Torat inyo totulis apo agatn caro hidup inyo monuruti Roh Allah.

2 Korintus 5:16

Obai, nantai koi co agi' monilai urakng monurut ukuran kito. Koi kalo monilai Kristus monurut ukuran monsio. Apo ni'in co ija' sama'an nantaiam.

Yohanes 3:5

Timbas Yesus, “Porotiancam! Bobondar inyo Ku pandiran ni'in: Conyiant ado urakng inyo ulih monjadi anggota Koraja'an Allah aman io co dilahiran doi' ara'i agatn Roh Allah.

Efesus 2:15

Komainyo urakng Yahudi monaati somuo porintah huatan poraturan di Hukupm Torat oca' dosa sia' diamputi ongko sia' ulih bodamai agi' agatn Allah. Apo watu Kristus monjadi monsio huatan mati di kayu salib, Sio mombulah agatn caro nantai kinyo ulih di pakai' agi', obai Sio inyo monanggukng hukupan dosa somuo urakng. Agatn sama'an nantai, Sio mombulah oca' somuo urakng inyo pocayo doi' duo pihak nantai, urakng Yahudi ongko urakng bukainyo Yahudi, sia' ulih bodamai agi' agatn Allah. Kristus molabuhan somuo nantai oca' sia' monjadi satu umant inyo boharu di dalapm Sio. Boko urakng inyo pocayo doi' duo pihak nantai bodamai agatn inyo bukainyo. Sia' kinyo bokonjahatan agi' obai porbuatan Kristus di kayu salib.

Galatia 3:28

Kaitn somuo monjadi satu dalapm Kristus Yesus. Allah kinyo monyongkayoan antaro urakng Yahudi damo urakng bukainyo Yahudi; antaro hulutn damo urakng bebas; antaro lolaki damo botina'.

Yohanes 15:2

Sotiap dahatn inyo ado di Aku inyo kinyo bobuah, Bopai-Ku momancapnyo lalu mombuakan dahatn nantai. Apo, sotiap dahatn inyo bobuah, Bopai-Ku momborosihi dahatn nantai oca'nyo bobuah lobat.

Yohanes 17:23

Ia'an, Aku bosatu agatn sia' huatan Duatn bosatu agatn Aku. Nantai oca' sia' monyatu agatn sompurna. Agatn caro ubo nian, lalu boko urakng di dunia monjadi tohu obai Duatn nam inyo udah moutus Aku. Boko urakng di dunia pan monjadi tohu obai Duatn mongasihi boko urakng inyo pocayo agatn Aku, samo agatn Duatn mongasihi Aku.

Yohanes 14:20

Timpu nantai, kaitn paca'an tohu obai Aku bosatu agatn Bopai, kaitn bosatu agatn Aku, huatan Aku bosatu agatn kaitn.

Galatia 5:6

Obai, hal bosunant kata'an kinyo bosunant co nyiant bedanyo di kito inyo ado di dalapm Kristus Yesus. Inyo pontikng ia'an aman kito pocayo ko Yesus huatan kopocaya'an nantai monyurukan kito pakai' mongasihi urakng bukai.

Matius 12:33

Sotiap urakng dikonal doi' porbuatannyo samo sama'an sotiap tontanaman dikonal doi' buahnyo. Aman sokayu' tontanaman boi', ongko buahnyo boi' jam. Aman sokayu' tontanaman kinyo boi', ongko buahnyo kinyo boi' jam.

Matius 24:35

Pocayocam agatn pomandiran-Ku, obai biar pan langit huatan bumi paca'an boahir, pomandiran-Ku totap kinyo tohu boahir.

1 Korintus 13:11

Samo sama'an watu kito monjadi bujakng-bosar, boko hal inyo bosipat bobia' kinyo dipakai agi'. Watu kito ija' bobia', kito bopandir ubo bobia'. Kito bopikir sama'an bobia'. Kito bulah koputusan sama'an bobia'. Apo watu kito monjadi bujakng-bosar, kito botongga' bulah boko hal inyo bosipat sama'an bobia'.

2 Korintus 5:19

Koi momboritoan obai molalu'i Kristus, Allah udah mombuka' jalatn oca' urakng ulih bodamai agi' agatn diri-Nyo. Sio kinyo mompohitukan kosalahan sia'. Sio udah moutus koi pakai' monyampaian kabar mongona'i podamaian nantai.

2 Korintus 12:2

Aku konal agatn siku' urakng inyo pocayo agatn Kristus. Ompat bolas tohutn komainyo, kali labuh Allah moangkat urakng nantai ko tompat inyo kotakan tinggi di sorugo. (Aku co tohu aman bukakng-tubuhnyo diangkat ko sorugo damo bayo rohnyo. Ongkah Allaham inyo mongotohu'i nantai.)

Filipi 4:21

Padahan salapm tangga'i ku ko somuo urakng husus umputn Allah dalapm Kristus Yesus. Salapm ko kaitn tangga'i boko somadikanku inyo bosamo agatn aku di si'itn.

Roma 16:7

Salapm ko Andronikus ongko Yunias, boko somadikan doi' banso Yahudi samo sama'an aku. Sia' kalo ditamoan ko dalapm ponjara bosamo agatn aku. Sia' pocayo ko Kristus sobolupm aku, ongko sia' tokonal di antaro boko rasul.

Roma 16:11

Salapm ko Herodion, somadikan doi' banso Yahudi samo sama'an aku. Salapm ko koluarga Narkisus ongko somuo urakng inyo pocayo ko Tuhatn inyo diapm di rumahnyo.

Roma 16:3

Padahan salapm ko Priskila ongko Akwila. Sia' bokorojosamo agatn aku pakai' molayati Kristus Yesus.

Roma 16:9

Salapm ko Urbanus inyo bokorojosamo agatn koi pakai' molayati Kristus. Salapm ko Stakhis inyo ku kasihi.

Roma 16:10

Salapm ko Apeles. Io kalo diuji ongko monunju'an obai io totap sotia ko Kristus. Salapm ko koluarga Aristobulus ongko somuo urakng inyo diapm di rumahnyo.

Lukas 5:38

Anggur inyo boharu gola' disimpatn ko dalapm kantong inyo boharu jam.