2 Korintus 4:5 - Porjanjian Boharu Torjomahan Baso Dilakng Soari-ari

⁵ Obai bukainyo diri koi siku' inyo koi boritoan. Apo, koi momboritoan mongona'i Yesus Kristus sobagai Tuhatn. Sio inyo moutus koi pakai' monjadi polayatn kaitn.

2 Korintus 4:5 ပူးပေါင်းရင်းမြစ်များ

2 Korintus 1:24

Aku co bomasud obai koi honda' momoso lapo inyo gola' kaitn pocayo. Obai, koi tohu kaitn pocayo agatn kuat ko Kristus. Apo, inyo ku masud ia'an koi honda' bokorojo samo oca' bulah kaitn bondar-bondar sonang-nyaman.

1 Korintus 1:23

Apo koi momboritoan obai Kristus, Rajo Inyo Dijanjian Allah mati di kayu salib. Hal nantai bulah boko urakng Yahudi tosinggukng, huatan boko urakng inyo kinyo Yahudi moanggap hal nantai kinyo ado rotinyo.

Galatia 5:13

Boko somadikan, kaitn udah dipilih Allah pakai' monjadi urakng inyo bebas. Apo nantai kinyo boroti kaitn bebas pakai' hidup sosuai agatn kohonda' diri kaitn inyo jahat. Sobali'nyo, hala molayati siku'-monyiku' agatn ponuh kasih.

Filipi 2:11

Somuonyo tajahan moaku'i obai Yesus Kristus ia'an Tuhatn di pucu' la'apo pan. Agatn ubo nantai, Allah Bopai tajahan dipuji.

Filipi 1:15

Memang ado urakng inyo momboritoan mongona'i Kristus obai sia' tungi ia'an sia' honda' oca' boko urakng tuyut sia' daripado aku. Apo ado jam urakng inyo momboritoan mongona'i Kristus doi' hati inyo borosih.

2 Petrus 2:3

Obai boko guru palsu nantai tama', jadi sia' paca'an bousaha moncari' untukng doi' kaitn agatn boko kisah inyo dipulah-pulah sia'. Apo, Allah udah manaham siap mohukupm sia'. Kinyo manah agi' sia' tajahan bonaso.

Titus 1:11

Kolai gola' monongga'an sia'. Jangan molongahan sia' moajaran boko hal inyo sobondarnyo co ulih diajaran. Obai ajaran sia' udah bulah banya' koluarga disosatan. Sia' ngontumbuki urakng agatn ajaran sia', oca' sia' mondapat'an untukng.

2 Timotius 2:10

Jadi, aku botahatn mohadapi somuo macapm ajab sonsaro oca' boko urakng inyo dipilih Allah dapat kosolamant'an molalu'i Kristus Yesus huatan hidup tohormat somanah-manahnyo.

1 Korintus 12:3

Obai nantai, aku gola' mongajar kaitn mongona'i ubo apo caro Roh Allah bokorojo dalapm hidup urakng inyo pocayo. Aman ado urakng inyo bondar-bondar dikuaso'i Roh Allah, pasti urakng nantai kinyo paca'an bopandir, “Yesus cucu'mo dihukupm!” Sobali'nyo, aman ado urakng inyo bopandir, “Yesus nantai Tuhatn inyo bokuaso!” pasti urakng nantai bondar-bondar dikuaso'i Roh Allah.

1 Korintus 8:6

Apo pakai' kito, bayo ado siku' mo Allah, ia'an Allah Bopai kito. Sio inyo monjadian somuo hal. Kito hidup pakai' monyombah Sio. Pakai' kito, bayo ado siku' Tuhatn, ia'an Yesus Kristus. Somuo hal dipulah molalu'i Yesus Kristus. Kito bodapat hidup inyo sobondarannyo obai Yesus Kristus.

1 Korintus 2:2

Obai, aku jadi bulah koputusan bayo pakai' momboritoan mongona'i Yesus. Ia'an pan aku momboritoan obai Yesus ia'an Rajo Inyo Dijanjian Allah inyo disobut Kristus, huatan Sio mati di kayu salib. Aku co honda' momboritoan ko kaitn mongona'i boko hal inyo bukai.

Kisah Boko Rasul 10:36

Kaitn tohu obai Allah udah monyampaian Kabar Boi' ko koi banso Yahudi. Joman komai, Allah bojanji Sio paca'an moutus siku' urakng Rajo. Rajo nantai paca'an mombuka' jalatn oca' urakng ulih bodamai agatn Allah. Yesus nantai Rajo Inyo Dijanjian Allah. Yesus nantai Tuhatn inyo puku' somuo urakng di dunia.

Kisah Boko Rasul 5:31

Yesus udah noi' ko sorugo ongko dudu' di tompat inyo kotakan tohormat di sopia' kanan Allah. Allah moonji'i kuaso ko Yesus pakai' momimpitn ongko monyolamant'an urakng. Allah molabuhan nantai oca' kito urakng Israel mondapat kosompatan pakai' diamputi, ia'an aman kito botongga' bulah dosa ongko monuruti Allah.

Kisah Boko Rasul 2:36

Ongko Petrus monyimpulan, Obai somuo buti nantai, ongko somuo urakng Israel gola' tohu ni'in agatn pasti: Allah monotap'an Yesus monjadi Tuhatn inyo bokuaso. Allah jam monotap'an Yesus monjadi Kristus, ia'an golar pakai' Rajo Inyo Udah Dijanjian Allah doi' joman komai. Apo kaitn bulah Sio dihukupm mati di kayu salib.”

Yohanes 7:18

Urakng inyo mongajar agatn pomandiran doi' dirinyo siku', io bayo goyap kohormatan pakai' dirinyo siku'. Apo urakng inyo goyap kohormatan pakai' Sio inyo moutusnyo, urakng nantai bujur bondar. Io kinyo monipu urakng bukai.

Matius 23:8

Apo jangan kaitn gala' disobut ‘Guru’. Obai, kaitn bayo ado siku' mo ‘Guru’, ia'an Aku. Huatan kaitn somuo somadikan.

Matius 3:11

Ado Urakng inyo paca'an datakng lopas aku. Sio lobih bokuaso daripadoku. Malahan monjadi hulutn-Nyo inyo palikng babah pan, aku kinyo cucu'. Aku mombaptis urakng agatn ara'i pakai' monunju'an obai sia' udah botongga' bulah dosa huatan monyonangan hati Allah. Apo Sio paca'an mombaptis urakng agatn Roh Allah ongko api.

2 Korintus 1:19

Obai, Ana' Allah, Yesus Kristus, pan kinyo gangga'-gua'an di antaro ‘Au’ ongko ‘Cado’. Aku, Silas ongko Timotius udah momboritoan ko kaitn mongona'i Kristus, ia'an Rajo Inyo Dijanjian Allah. Molalu'i Sio, somuo janji Allah monjadi nyata, samo sama'an ado jawaban ‘Au’ doi' Allah. Jadi, di dalapm Kristus bayo ado ‘Au’. Nianam sobabnyo, watu kito mongatoan ‘Amin’ pakai' momuji Allah, kito mongatoan ‘Amin’ dalapm damo Kristus.

1 Korintus 15:47

Monsio potamo, ia'an Adapm, dipulah doi' dobu tanah. Hidupnyo socaro jasmani. Apo Adapm koduo, ia'an Kristus, boasal doi' sorugo.

1 Korintus 10:33

Pulahcam samo sama'an inyo ku pulah. Aku hala bousaha oca' somuo porbuatanku kinyo bulah sopo pan tosinggukng. Aku hala moutamoan inyo toboi' pakai' urakng banya', daripado inyo toboi' pakai' diriku siku'. Aku molabuhan somuo nantai oca' sia' ulih disolamant'an.

1 Korintus 4:15

Biar pan kaitn ado boribuan urakng inyo mombimbikng kaitn pakai' jumpat Kristus, apo co nyiant urakng inyo samo sama'an Bopai kaitn. Ongkah aku inyo monjadi Bopai kaitn obai aku ninam urakng potamo inyo momboritoan ko kaitn Kabar Boi' mongona'i Kristus Yesus.