2 Korintus 3:1 - Porjanjian Boharu Torjomahan Baso Dilakng Soari-ari

¹ Jangan bopikir koi mula'i momuji diri koi siku'. Boko urakng bukai nantai pontikng surat inyo momuji koboi'an sia' oca' kaitn pocayo ko sia'. Damo sia' pontikng surat doi' kaitn oca' urakng bukai pocayo sia'. Apo koi samo sokali co pontikng surat nantai.

2 Korintus 3:1 ပူးပေါင်းရင်းမြစ်များ

Kisah Boko Rasul 18:27

Boboropo watu lopas nantai, Apolos honda' botula' ko propinsi Akhaya. Jadi boko urakng pocayo di Efesus honda' monulukng io. Sia' monulis surat ko boko urakng pocayo di su'utn oca' io ditorima' agatn boi'. Di Akhaya, ado boko urakng inyo pocayo Yesus obai Allah monunju'an koboi'an-Nyo ko sia'. Watu Apolos sampai di su'utn, io sangant monulukng sia'.

Roma 16:1

Aku honda' mongonalan somadikanku Febe ko kaitn. Io molayati jomaat di Kengkrea.

1 Korintus 10:33

Pulahcam samo sama'an inyo ku pulah. Aku hala bousaha oca' somuo porbuatanku kinyo bulah sopo pan tosinggukng. Aku hala moutamoan inyo toboi' pakai' urakng banya', daripado inyo toboi' pakai' diriku siku'. Aku molabuhan somuo nantai oca' sia' ulih disolamant'an.

1 Korintus 16:3

Aman aku datakng, kaitn gola' momilih boboropo urakng inyo kaitn anggap ulih dipocayo'i. Aku paca'an moutus sia' pakai' moonju'an sumbakan kaitn nantai ko Yerusalem. Sia' paca'an mombaba' surat poonju' jam.

1 Korintus 3:10

Obai koboi'an Allah ko aku, Sio mombulah aku monjadi samo sama'an sikuꞌ tukakng bangunan inyo pandai. Aku inyo molota'an pondasi bangunan nantai, sodakan watu ni'in ado urakng bukai inyo mombangun di pucu' pondasi nantai. Apo sotiap urakng nantai gola' gogamant agatn caro io mombangun.

1 Korintus 4:15

Biar pan kaitn ado boribuan urakng inyo mombimbikng kaitn pakai' jumpat Kristus, apo co nyiant urakng inyo samo sama'an Bopai kaitn. Ongkah aku inyo monjadi Bopai kaitn obai aku ninam urakng potamo inyo momboritoan ko kaitn Kabar Boi' mongona'i Kristus Yesus.

2 Korintus 10:12

Ado boko urakng totontu inyo momuji diri sia' siku'. Soandainyo sia' memang hebat, koi co borani mongatoan diri koi samo hebat sama'an sia'. Apo sobondarnyo sia' budu. Obai, sia' ongkah mombandikan dirinyo agatn diri sia' siku'. Sia' momakai ponilaian sia' siku' monganggap dirinyo hebat.

2 Korintus 10:18

Obai, urakng inyo bondar-bondar cucu' dipuji ia'an urakng inyo dipuji Tuhatn, bukainyo urakng inyo momuji dirinyo siku'.

2 Korintus 10:8

Aku co malu aman aku tolalu bangga agatn kuaso inyo Tuhatn onju' ko koi. Obai, Tuhatn moonju' kuaso ko koi pakai' monulukng kaitn lobih kuat pocayo, bukainyo pakai' moruntuhan kopocaya'an kaitn.

2 Korintus 12:11

Aku torus momuji diri samo sama'an urakng budu. Apo kaitn momoso ku molabuhan nantai. Obai gola' kaitn am inyo momuji botulukan ku. Biar pan aku ni'in urakng inyo conyiant ado rotinyo, aku co kalah agatn boko urakng totontu nantai inyo kaitn anggap sobagai boko rasul inyo luar biaso.

2 Korintus 12:19

Somanahan ni'in, kaitn bopikir obai koi bousaha mombela diri tohadap kaitn. Apo, boko somadikan inyo ku kasihi, sobondarnyo ninam tujuan koi: (Koi mongatoan ni'in di hadapan Allah ongko sobagai urakng inyo hidup di dalapm Kristus.) Somuo inyo koi labuhan ia'an pakai' monulukng kaitn somongkitn kuat pocayo agatn Tuhatn.

2 Korintus 2:17

Obai, banya' urakng momboritoan Pomandiran Allah pakai' mondapat'an kountukan. Apo, koi co sama'an sia'. Koi momboritoan Pomandiran Allah agatn hati inyo tulus. Koi momboritoan sobagai urakng inyo diutus Allah, urakng inyo bopandir di hadapan Allah, urakng inyo hidup dalapm Kristus.

2 Korintus 5:12

Koi co bogoyap pujian doi' kaitn. Apo, koi honda' moonji'i alasan inyo boi' ko kaitn pakai' momuji koi di hadapan boko urakng inyo biaso momuji diri mongona'i boko hal inyo kotiat'an, bukainyo mongona'i hati.