2 Korintus 2:17 - Porjanjian Boharu Torjomahan Baso Dilakng Soari-ari

¹⁷ Obai, banya' urakng momboritoan Pomandiran Allah pakai' mondapat'an kountukan. Apo, koi co sama'an sia'. Koi momboritoan Pomandiran Allah agatn hati inyo tulus. Koi momboritoan sobagai urakng inyo diutus Allah, urakng inyo bopandir di hadapan Allah, urakng inyo hidup dalapm Kristus.

2 Korintus 2:17 ပူးပေါင်းရင်းမြစ်များ

2 Korintus 4:2

Apo koi co molabuhan boko porbuatan inyo momaluan inyo gola' sampai diombakan. Koi co monipu urakng timpu koi momboritoan Pomandiran Allah mongona'i Kristus. Koi pan co moncampuran ajaran inyo salah agatn pomandiran Allah nantai. Sobali'nyo, koi mongajar boko hal inyo bondar agatn torus torakng. Ubo nian polayatan koi di hadapan Allah, jadi somuo urakng ulih monilai koi dalapm hati sia' siku'.

2 Korintus 1:12

Boko somadikan, koi bangga mongona'i ni'in: Dalapm hati koi siku', koi tohu obai caro hidup koi di dunia ni'in kinyo salah, hususnyo dalapm hubukan koi agatn kaitn. Koi molabuhan boko hal agatn hati inyo tulus ongko borosih. Hati ubo nantai doi' Allah. Koi molabuhan somuonyo agatn koboi'an-Nyo, bukainyo agatn Kobijaksana'an monsio.

Wahyu 2:20

Apo, Aku moolikan kaitn mongona'i hal ni'in: Kaitn mombiaran botina' nantai, Izebel, monyosat'an umant-Ku. Io mongaku' dirinyo nabi, apo io udah monipu boko hulutn-Ku. Io mongajar oca' sia' bulah dosa bomporajoan, ongko oca' sia' makatn dagikng doi' bonatakng inyo diposombahan ko songiang-duato.

Yudas 1:4

Obai, ado boko urakng totontu inyo molawatn Allah. Nyatonyo, sia' udah mansu' dalapm kolompok kaitn inyo co urakng bukai sadar obai sia' kinyo bondar-bondar pocayo ko Yesus. Sia' mongatoan Allah kito kinyo paca'an mohukupm urakng obai Sio boi' hati. Sia' gunoan pomikiran inyo salah nantai oca' sia' ulih mongosihan boko kohonda' bukakng-tubuh sia' inyo jahat. Sia' jam monula' obai Yesus Kristus ia'an satu-satunyo Tuhatn inyo bokuaso dipucu' kito. Doi' komai, udah ditulis obai sia' paca'an dihukupm.

Titus 1:11

Kolai gola' monongga'an sia'. Jangan molongahan sia' moajaran boko hal inyo sobondarnyo co ulih diajaran. Obai ajaran sia' udah bulah banya' koluarga disosatan. Sia' ngontumbuki urakng agatn ajaran sia', oca' sia' mondapat'an untukng.

1 Korintus 5:8

Obai nantai, huncapm kito morayaan porbuatan Kristus nantai agatn caro ni'in: Jangan agi' hidup agatn hati inyo honda' bulah kojahatan ko urakng bukai. Huatan jangan bulah dosa. Apo hidup monjouhan diri doi' dosa. Huatan hidup sosuai agatn ajaran inyo bondar.

Matius 24:24

Obai paca'an ado boko urakng datakng inyo mongaku' obai dirinyo nianam Rajo Inyo Dijanjian Allah. Apo sia' co bondar. Paca'an ado boko nabi palsu jam. Boko rajo palsu huatan boko nabi palsu nantai paca'an bulah bomacapm mujisat jam. Tujuan sia' oca' monyosat'an somuo urakng, huatan soandainyo mungkitn tomansu' boko urakng inyo dipilih Allah jam.

1 Yohanes 4:1

Boko somadikanku inyo tokasih, udah ado banya' nabi palsu di dunia ni'in. Obai nantaiam, jangannam pocayo agatn somuo urakng inyo mongatoan obai Roh Allah ado di inyo. Apo poriso'icam lobih holu ajaran sia' nantai pakai' mongotohu'i aman roh inyo ado di inyo boasal doi' Allah kata'an cado.

Kisah Boko Rasul 20:20

Biar pan ubo nian, aku totap momboritoan mongona'i Yesus. Aku co kalo monahan sobuti' ajaran pan inyo boguno pakai' kaitn. Aku mongajar di muka' umum honda' pan doi' rumah ko rumah.

Wahyu 19:20

Bonatakng nantai ditangkap bosamo-samo agatn nabi palsu nantai, ia'an io inyo bulah boko mujisat nantai di hadapan mato bonatakng nantai. Agatn boko mujisat nantai, io monipu boko urakng inyo ado tando bonatakng nantai, boko urakng inyo monyombah lompatukng bonatakng nantai. Jadi, bonatakng huatan nabi palsu nantai dibuakan hidup-hidup ko dalapm loutan api inyo tongahan bonyalo agatn bolerang.

Wahyu 12:9

(Nago bosar nantai ia'an ular inyo monipu doi' joman komai. Io jam disobut Si Iblis damo Rajo Sitatn. Io inyo monipu somuo urakng di dunia.) Io ditikapan ko bumi bososamo agatn somuo molekatnyo.

Ibrani 11:27

Obai Musa pocayo, jadi io borani moninggalan Mesir. Io kinyo gola' dikogodi'i Rajo Mesir. Io totap botahatn mohadapi pondorita'an soakatn-akatn io ulih moniantAllah inyo kinyo ulih di tiat pakai' mato.

2 Korintus 1:18

Demi Allah inyo sotia momonuhi janji-Nyo, pomandiran koi ko kaitn co gangga'-gua'an di antaro ‘Au’ ongko ‘Cado’.

2 Korintus 6:7

Koi hala momboritoan ajaran inyo bondar. Koi molabuhan boko la'apo pan agatn kuaso doi' Allah. Sio bulah koi hidup bondar dihadapan-Nyo. Caro hidup koi inyo bondar nantai samo sama'an sonjato inyo koi pakai mombela diri damo molawatn urakng bukai.

2 Korintus 11:11

Hibo aku co mominto la'apo pan doi' kaitn? Kata'an obai aku co mongasihi kaitn ai? Allah udah tohu obai aku mongasihi kaitn!

2 Korintus 12:19

Somanahan ni'in, kaitn bopikir obai koi bousaha mombela diri tohadap kaitn. Apo, boko somadikan inyo ku kasihi, sobondarnyo ninam tujuan koi: (Koi mongatoan ni'in di hadapan Allah ongko sobagai urakng inyo hidup di dalapm Kristus.) Somuo inyo koi labuhan ia'an pakai' monulukng kaitn somongkitn kuat pocayo agatn Tuhatn.

Galatia 1:6

Yesus Kristus udah monunju'an koboi'an-Nyo ko kaitn. Agatn caro nantai Allah momilih kaitn pakai' hidup sosuai agatn ajaran nantai. Apo dalapm watu inyo kotakan copat kaitn udah moninggalan Allah. Ni'inan kaitn moikuti suatu ‘kabar boi'’ inyo bukai.

1 Tesalonika 2:4

Apo sobali'nyo, koi momboritoan Kabar Boi' obai koi diutus Allah, obai Sio moanggap koi cucu' pakai' molabuhan polayatan nantai. Jadi, koi co bousaha monyonangan hati monsio. Koi bousaha monyonangan hati. Sio inyo mouji hati koi.

1 Petrus 4:11

Aman ado urakng inyo dionji'i komampuan pakai' bopandir, io gola' bopandir monyampaian Pomandiran Allah. Aman ado urakng inyo dionji'i komampuan pakai' molayati urakng bukai, io gola' molayati agatn kokuatan inyo Allah onju' ko io. Pakaicam somuo komampuan kaitn oca' urakng bukai momuliaan Allah obai Yesus Kristus inyo bulah somuo nantai dapat tojadi. Sionam inyo mulia ongko bokuaso somanah-manahnyo. Amin!