2 Korintus 13:9 - Porjanjian Boharu Torjomahan Baso Dilakng Soari-ari

⁹ Apo koi sonang bondar aman koi kotiat'annyo lomah sama'an nantai. Ni'inan koi doa'an, ia'an oca' kaitn bobondar hidup sobagai boko urakng inyo pocayo.

2 Korintus 13:9 ပူးပေါင်းရင်းမြစ်များ

1 Korintus 1:10

Boko somadikan, agatn kuaso Tuhatn kito, Yesus Kristus, aku monosihat'i oca' kaitn bosatu hati. Jangan kaitn bosongkayo monjadi bomacapm kolompok. Apo kohonda'nyo kaitn somombondarannyo bosatu dalapm porasa'an huatan pikiran kaitn.

1 Korintus 2:3

Somanahan aku bosamo agatn kaitn, aku lomah. Aku bogogora' obai gola'.

1 Korintus 4:10

Sama'annyo koi budu obai koi molayati Kristus. Apo kaitn bokopintar-corodi'an obai kaitn pocayo ko Kristus. Koi lomah. Apo, kaitn kuat. Koi kinyo cucu' dihormati. Apo kaitn tohormat.

2 Korintus 11:30

Aman aku toposo momuji diri, jadi aku paca'an momuji diri mongona'i hal inyo monunju'an kolomahanku.

2 Korintus 13:11

Ahirnyo boko somadikanku bosonang nyaman cam! Bousaha cam hidup bobondar sobagai urakng inyo pocayo. Taat'icam boko nosihatku. Hidupcam sohati sopikiran, ongko hidup cam sonang-asau agatn siku'-monyiku'. Aman kaitn molabuhan nantai, jadi Allah paca'an momborokati kaitn. Sionam inyo sumber kasih ongko sonang-asau.

2 Korintus 13:4

Memang Kristus ulih dihukupm mati di kayu salib obai Sio ado bukakng-tubuh inyo lomah samo sama'an monsio. Apo Sio hidup obai kuaso Allah. Ubo nian jam agatn koi. Koi lomah obai koi mondorita' samo sama'an Kristus. Apo, dalapm caro koi mohadapi kaitn, koi paca'an hidup bosamo Kristus dalapm kuaso Allah.

2 Korintus 4:12

Jadi, rotinyo, koi mohadapi komatian di dalapm polayatan koi oca' kaitn mondapat'an kohidupan inyo somanah-manahnyo.

2 Korintus 7:1

Boko somadikan inyo ku kasihi! Somuo janji Allah nantai pakai' kito. Obai nantai, marabo kito monjago bukakng-tubuh ongko roh kito oca' borosih doi' somuo hal inyo jahat. Agatn sama'an nantai, kito mongkitn hidup husus pakai' Allah kapikng kito gola' agatn Sio.

Kolose 1:28

Kristus nantaiam inyo koi boritoan watu koi momakai somuo kopintar-corodi'an pakai' monosihat'i huatan mongajar sotiap urakng. Tujuannyo oca' koi ulih mombaba' sotiap urakng ko Allah dalapm koadaan suci obai bosatu agatn Kristus.

Kolose 4:12

Salapm doi' Epafras, inyo boasal doi' tompat kaitn jam. Io molayati Kristus Yesus. Io hala bodoa agatn somombondarannyo pakai' kaitn oca' kaitn totap kuat pocayo ko Yesus. Io bodoa oca' kaitn monjadi kotakng yakitn mongona'i somuo inyo dikohonda'i Allah.

1 Tesalonika 3:10

Siakng-malapm koi somombondarnyo bodoa oca' koi ulih botomu agi' agatn kaitn huatan ulih moajaran boko hal inyo kaitn pontikan. Jadi, kaitn ulih pocayo ko Yesus agatn lobih kuat.

2 Timotius 3:17

Jadi, Buku Suci boguno pakai' bulah boko urakng inyo molayati Allah mampu molabuhan sotiap pokoroja'an inyo boi'.

Ibrani 12:23

Kaitn tuyut bokumpul agatn boko urakng inyo kotakng sonang-nyaman, ia'an poana'an Allah. Somuo sia' ia'an boko ana' kojula'an, inyo boko damo sia' udah tocatat dalapm daptar urakng inyo ulih mansu' sorugo. Kaitn datakng mohadapi Allah inyo mohakipi somuo urakng. Kaitn datakng ko tompat roh-roh boko urakng inyo bondar inyo udah mati. Sia' udah dijadian sompurna di hadapan Allah.

Ibrani 13:21

Aku bodoa oca' Allah moonju' ko kaitn somuo hal boi' inyo dipontikan kaitn pakai' molabuhan kohonda'-Nyo. Aku bodoa oca' Allah molalu'i Yesus Kristus, mongorojoan dalapm hati kito somuo hal inyo dikohonda'i-Nyo. Mara kito momuji Sio pakai' somanah-manahnyo. Amin!

Ibrani 6:1

Obai nantai, mara am kito maju agatn boko ajaran mongona'i Sio inyo mombulah kito lobih botumbuh monjadi dewasa dalapm Kristus. Jangannam kito moulaki agi' boko ajaran dasar, ia'an ajaran obai urakng gola' botongga' molabuhan boko hal inyo pocumo huatan pocayo cam ko Allah,

1 Petrus 5:10

Apo, pondorita'an nantai sotogalmo. Allah siku' paca'an bulah hidup kaitn monjadi sompurna. Sio pasti mohibur kaitn huatan bulah kaitn botahatn. Sio pasti monulukng kaitn oca' kaitn ulih pocayo agatn kuat. Sio inyo hala monunju'an koboi'an-Nyo. Sio bokuaso pakai' somanah-manahnyo, huatan Sio udah moningkau kaitn oca' mondapat bagian doi' kuaso-Nyo nantai obai kaitn pocayo ko Kristus.