2 Korintus 13:4 - Porjanjian Boharu Torjomahan Baso Dilakng Soari-ari

⁴ Memang Kristus ulih dihukupm mati di kayu salib obai Sio ado bukakng-tubuh inyo lomah samo sama'an monsio. Apo Sio hidup obai kuaso Allah. Ubo nian jam agatn koi. Koi lomah obai koi mondorita' samo sama'an Kristus. Apo, dalapm caro koi mohadapi kaitn, koi paca'an hidup bosamo Kristus dalapm kuaso Allah.

2 Korintus 13:4 ပူးပေါင်းရင်းမြစ်များ

1 Petrus 3:18

Obai, Kristus udah mati sokali pakai' somuo dosa kito. Sio kinyo bodosa, apo Sio mati pakai' boko urakng inyo bodosa oca' Sio mombimbikng kito ko Allah. Sio inyo udah dibunuh dalapm koadaan-Nyo sobagai monsio, apo Roh Allah mombulah Sio hidup agi'.

Roma 6:4

Dalapm baptisan nantai, kito mati huatan dipasar bosamo Kristus oca' kito pan mondapat'an kohidupan boharu, samo sama'an Allah Bopai mombulah Kristus bobali' hidup doi' komatian ulih kuaso-Nyo inyo mulia.

Ibrani 5:7

Watu Yesus hidup di dunia ni'in sobagai monsio, Sio bodoa kapikng mondorah huatan monangis. Sio momuhun ko Allah inyo sanggup monyolamant'an-Nyo doi' komatian. Allah monimbasi doa-Nyo obai Sio hala monuruti kohonda' Allah.

1 Korintus 15:43

Watu bukakng-tubuh urakng dipasar, bukakng-tubuh nantai bukakng-tubuh kinyo bopasal. Apo watu bukakng-tubuh urakng dihidupan agi', bukakng-tubuh nantai monjadi bukakng-tubuh inyo kotakng tohormat. Watu bukakng-tubuh urakng dipasar, bukakng-tubuh nantai bukakng-tubuh inyo lomah. Apo watu bukakng-tubuh urakng dihidupan agi', bukakng-tubuh nantai inyo kuat.

1 Korintus 2:3

Somanahan aku bosamo agatn kaitn, aku lomah. Aku bogogora' obai gola'.

Filipi 3:10

Aku bondar-bondar honda' mongonal Kristus. Aku honda' moalapi kuaso inyo mombulah Sio bobali' hidup agi' doi' komatian. Aku honda' tuyut mondorita' samo sama'an Sio ongko rela mati samo sama'an Sio.

Roma 14:9

Nanam sobabnyo Kristus udah mati ongko hidup agi', ia'an oca' Sio monjadi Tuhatn inyo bokuaso doi' urakng inyo udah mati ongko urakng inyo ija' hidup.

Yohanes 10:18

Conyiant siku' urakng pan inyo ulih mombunuhKu. Apo Aku monyorahan hidup-Ku monurut kohonda'-Ku siku'. Aku ado kuaso pakai' moijitan urakng mombunuh-Ku. Aku pan ado kuaso pakai' hidup agi'. Nianam porintah inyo Aku torima' doi' Bopai-Ku.”

Kisah Boko Rasul 2:36

Ongko Petrus monyimpulan, Obai somuo buti nantai, ongko somuo urakng Israel gola' tohu ni'in agatn pasti: Allah monotap'an Yesus monjadi Tuhatn inyo bokuaso. Allah jam monotap'an Yesus monjadi Kristus, ia'an golar pakai' Rajo Inyo Udah Dijanjian Allah doi' joman komai. Apo kaitn bulah Sio dihukupm mati di kayu salib.”

1 Petrus 3:22

noi' ko sorugo, lalu dudu' di tompat tohormat di sopia' kanan Allah. Allah mombulah Kristus bokuaso di pucu' somuo molekat ongko somuo inyo ado kokuatan huatan kokuasa'an.

2 Korintus 10:10

Aku tohu ado urakng inyo bopandir, “Dalapm boko suratnyo, Paulus momakai pomandiran inyo togas huatan koras. Apo timpu io ada'an samo agatn kito, sikapnyo lomah, huatan io kinyo pandai bopandir.”

1 Korintus 1:25

Obai, hajat Allah inyo kotiat'annyo kinyo ado rotinyo, sobondarnyo lobih pintar-corodi' doi' kopintar-corodi'an monsio. Porbuatan Allah inyo kotiat'annyo lomah, sobondarnyo lobih kuat doi' kokuatan monsio.

1 Korintus 6:14

Allah udah mombulah Tuhatn Yesus bobali' hidup doi' komatian. Allah jam paca'an mombulah kito bobali' hidup agi' doi' komatian agatn kuaso-Nyo.

2 Korintus 12:10

Obai nantai am, aku sonang mohadapi bomacapm kosusahan pakai' molayati Kristus. Aku sonang aman aku lomah, aman aku dihanyam, aman aku mohadapi mosalah, aman aku disiksa, aman aku mondorita'. Obai, timpu aku lomah, watu nianam aku kuat.

2 Korintus 13:9

Apo koi sonang bondar aman koi kotiat'annyo lomah sama'an nantai. Ni'inan koi doa'an, ia'an oca' kaitn bobondar hidup sobagai boko urakng inyo pocayo.