2 Korintus 11:3 - Porjanjian Boharu Torjomahan Baso Dilakng Soari-ari

³ Apo aku gola' kaitn paca'an ditipu, samo sama'an joman komai Hawa ditipu ular inyo licik nantai, ia'an Rajo Sitatn. Aman ubo nian, kaitn paca'an monjadi sosat huatan kinyo bobondar sotia ko Kristus.

2 Korintus 11:3 ပူးပေါင်းရင်းမြစ်များ

Matius 24:24

Obai paca'an ado boko urakng datakng inyo mongaku' obai dirinyo nianam Rajo Inyo Dijanjian Allah. Apo sia' co bondar. Paca'an ado boko nabi palsu jam. Boko rajo palsu huatan boko nabi palsu nantai paca'an bulah bomacapm mujisat jam. Tujuan sia' oca' monyosat'an somuo urakng, huatan soandainyo mungkitn tomansu' boko urakng inyo dipilih Allah jam.

Yohanes 8:44

Kaitn ninam boko poana'an Rajo Sitatn! Io nam bopai kaitn nan. Kaitn honda' monuruti kohonda' bopai kaitn nantai. Doi' mulonyo io nam pombunuh. Io co kalo ado hubukan agatn boko hal inyo bondar obai conyiant ado inyo bondar di dalapm dirinyo. Pas io bulah kotumbukan, nantai wajar, obai sipatnyo ongkah bulah kotumbukan nam. Sio nianam bopai boko tumbukan.

Roma 12:8

Aman ado urakng inyo dionji'i komampuan husus pakai' moonji'i somangant ko urakng bukai, io gola' moonji'i somangant. Urakng inyo dionji'i komampuan husus pakai' mombagi umputnnyo ko urakng bukai, io gola' molabuhan nantai agatn boi' hati. Urakng inyo dionji'i komampuan husus pakai' momimpitn, io gola' molabuhan nantai agatn rajitn. Urakng inyo dionji'i komampuan husus pakai' monunju'an kasih ko urakng bukai, io gola' molabuhan nantai agatn sonang.

2 Korintus 1:12

Boko somadikan, koi bangga mongona'i ni'in: Dalapm hati koi siku', koi tohu obai caro hidup koi di dunia ni'in kinyo salah, hususnyo dalapm hubukan koi agatn kaitn. Koi molabuhan boko hal agatn hati inyo tulus ongko borosih. Hati ubo nantai doi' Allah. Koi molabuhan somuonyo agatn koboi'an-Nyo, bukainyo agatn Kobijaksana'an monsio.

2 Korintus 11:20

Kaitn siap monorima' boko urakng nantai inyo momacalan kaitn, inyo monguaso'i kaitn, inyo monipu goyap kountukan doi' kaitn, inyo ongkah bompopangkakng am, inyo mohanyam kaitn.

2 Korintus 11:29

Aman ado anggota jomaat inyo lomah aku pan jumpat lomah jam. Aman ado anggota jomaat inyo disosatan, pasti hatiku oso ropu'-lolo.

2 Korintus 2:17

Obai, banya' urakng momboritoan Pomandiran Allah pakai' mondapat'an kountukan. Apo, koi co sama'an sia'. Koi momboritoan Pomandiran Allah agatn hati inyo tulus. Koi momboritoan sobagai urakng inyo diutus Allah, urakng inyo bopandir di hadapan Allah, urakng inyo hidup dalapm Kristus.

2 Korintus 4:2

Apo koi co molabuhan boko porbuatan inyo momaluan inyo gola' sampai diombakan. Koi co monipu urakng timpu koi momboritoan Pomandiran Allah mongona'i Kristus. Koi pan co moncampuran ajaran inyo salah agatn pomandiran Allah nantai. Sobali'nyo, koi mongajar boko hal inyo bondar agatn torus torakng. Ubo nian polayatan koi di hadapan Allah, jadi somuo urakng ulih monilai koi dalapm hati sia' siku'.

Galatia 1:6

Yesus Kristus udah monunju'an koboi'an-Nyo ko kaitn. Agatn caro nantai Allah momilih kaitn pakai' hidup sosuai agatn ajaran nantai. Apo dalapm watu inyo kotakan copat kaitn udah moninggalan Allah. Ni'inan kaitn moikuti suatu ‘kabar boi'’ inyo bukai.

Galatia 2:4

Memang ado boko urakng inyo monyosahan oca' urakng inyo pocayo agatn Yesus gola' disunant. Apo sia' inyo monyosahan nantai kinyo bondar-bondar pocayo agatn Yesus. Sia' mansu' dalapm kolompok kito socaro bokokolit. Sia' honda' mohalaki caro hidup kito inyo bebas doi' koharusan pakai' monaati Hukupm Torat. Kito bebas doi' nantai obai kito disolamant'an ulih mo Yesus Kristus. Apo sobondarnyo, sia' honda' oca' kito jam gola' monaati Hukupm Torat samo sama'an siku' urakng hulutn gola' monaati habakngnyo.

Galatia 3:1

Boko somadikan di Galatia. Kaitn urakng budu! Kaitn udah dikotumbuki ulih ajaran urakng bukai! Sobondarnyo aku udah kalo monorakan agatn kotakan jolas mongona'i komatian Yesus Kristus di kayu salib.

Galatia 4:11

Jadi, aku kuatir aman uyuh jorihku pakai' kaitn monjadi co nyiant rotinyo.

Efesus 4:14

bukainyo sama'an boko bobia' agi' inyo mudah ditipu agatn somuo macapm ajaran inyo salah. Kito kinyo pocayo ko boko urakng licik nantai inyo honda' mombulah urakng monjadi sosat.

Efesus 4:22

Kaitn diajar pakai' moninggalan caro hidup kaitn inyo manah nantai, ia'an kohidupan kaitn inyo monjadi rusa' obai kaitn monjumpati boko kohonda' inyo monipu kaitn.

Efesus 6:24

Aku bodoa oca' Sio monunju'an kasih karunia ko kaitn somuo inyo mongasihi Tuhatn kito Yesus Kristus agatn kasih inyo kinyo tohu botongga'.

Kolose 2:18

Ado urakng inyo pompadah rondah hati huatan monyombah boko molekat. Jangan biaran urakng sama'an nantai bulah kaitn pocayo ajaran inyo salah, sampai kaitn co dapat borokat doi' Allah. Urakng sama'an nantai buhau agatn mongatoan io ado boko poniant'an doi' Allah. Apo sobondarnyo pikirannyo duniawi inyo bulah io buhau.

Kolose 2:4

Aku momandiran boko hal nantai oca' urakng bukai co ulih mongontumbuki kaitn agatn pomandiran inyo manis.

Kolose 2:8

Boboi'cam jangan ado urakng inyo mongontumbuki kaitn agatn ajaran inyo kinyo boguno, ajaran inyo salah. Boko ajaran nantai doi' pondapat monsio, doi' boko roh inyo bokuaso di dunia ni'in, kinyo doi' Kristus.

1 Tesalonika 3:5

Obai nantaiam aku gola' uti' Rajo Sitatn bohasil moncubo'i kaitn oca' co pocayo agi' ko Yesus. Soumpamonyo hal nantai tojadi, rotinyo somuo polayatan koi di antaro kaitn co nyiant pasalnyo. Aku co ulih monahan oso togonanganku agi', jadi aku moutus Timotius ko kaitn. Aku honda' mondinga' borito mongona'i kopocaya'an kaitn ko Yesus.

1 Timotius 1:3

Watu aku botula' ko propinsi Makedonia, aku totap minto oca' kolai totap bodiapm di kota Efesus. Aku mongohonda'i sama'an nantai pakai' kolai monosihat'i boko urakng totontu oca' sia' tongga' mongajaran boko ajaran inyo monyosat'an.

1 Timotius 2:14

Solaitn nantai, bukainyo Adapm inyo ditipu ular. Hawa mo inyo ditipu sampai io bulah dosa.

2 Timotius 3:13

Sodakan boko urakng jahat huatan boko urakng inyo hala tumbukan, sia' paca'an mongkitn jahat. Sia' monyosat'an urakng bukai. Urakng bukai pan monyosat'an sia'.

Titus 1:10

Aku momadahan nantai obai ado banya' urakng Kreta inyo kinyo honda' monaati boko ponotua', hususnyo sia' inyo tontainyo sobolupmnyo boagama Yahudi. Sia' bopandir mongona'i boko hal inyo kinyo boguno. Sia' moncubo monipu urakng bukai.

Ibrani 13:9

Jangan tontuyutan boko bomacapm ajaran molikahan inyo mombulah kaitn sosat. Obai, inyo boi' ia'an hati kaitn monjadi kuat doi' kasih karunia Allah, bukainyo doi' boko poraturan mongona'i pomakatn. Boko poraturan nantai kinyo ado gunonyo pakai' boko urakng inyo moikutinyo.

2 Petrus 3:17

Apo kaitn, boko somadikan inyo ku kasihi, kaitn udah mongotohu'i mongona'i hal nantai. Jadi, bojojagocam tohadap boko urakng nantai inyo kinyo honda' hidup sosuai agatn porintah Allah. Jangan sampai sia' mombulah kaitn pocayo ajaran inyo salah sampai kaitn kinyo agi' pocayo kuat ko Yesus Kristus.

2 Petrus 3:3

Inyo palikng utamo gola' kaitn kotohu'i ia'an: Pado ahir joman, paca'an ado boko urakng inyo gala' mohayam kaitn. Sia' nantai dikuaso'i hawa napsu inyo jahat.

1 Yohanes 2:18

Poana'anku! Joman ni'in am ari-ari toahir. Kaitn udah mondinga' obai Si Musuh Kristus paca'an datakng. Ongko watu ni'in banya' musuh Kristus udah ado. Ni'inam tandonyo, joman ninam ari-ari toahir.

1 Yohanes 4:1

Boko somadikanku inyo tokasih, udah ado banya' nabi palsu di dunia ni'in. Obai nantaiam, jangannam pocayo agatn somuo urakng inyo mongatoan obai Roh Allah ado di inyo. Apo poriso'icam lobih holu ajaran sia' nantai pakai' mongotohu'i aman roh inyo ado di inyo boasal doi' Allah kata'an cado.

Yudas 1:4

Obai, ado boko urakng totontu inyo molawatn Allah. Nyatonyo, sia' udah mansu' dalapm kolompok kaitn inyo co urakng bukai sadar obai sia' kinyo bondar-bondar pocayo ko Yesus. Sia' mongatoan Allah kito kinyo paca'an mohukupm urakng obai Sio boi' hati. Sia' gunoan pomikiran inyo salah nantai oca' sia' ulih mongosihan boko kohonda' bukakng-tubuh sia' inyo jahat. Sia' jam monula' obai Yesus Kristus ia'an satu-satunyo Tuhatn inyo bokuaso dipucu' kito. Doi' komai, udah ditulis obai sia' paca'an dihukupm.

Wahyu 12:15

Lalu, nago nantai monyomburan ara'i doi' nyaonyo ko arah botina' nantai. Ara'inyo bosar sama'an ara'i pasakng. Nago nantai honda' oca' sungai nantai mohanyutan botina' nantai.

Wahyu 12:9

(Nago bosar nantai ia'an ular inyo monipu doi' joman komai. Io jam disobut Si Iblis damo Rajo Sitatn. Io inyo monipu somuo urakng di dunia.) Io ditikapan ko bumi bososamo agatn somuo molekatnyo.

Wahyu 20:2

Io monangkap nago nantai, ia'an ular nantai doi' joman komai, Si ular tuho, ia'an Si Iblis, Rajo Sitatn. Molekat nantai mongobat Rajo Sitatn, ditikapannyo ko dalapm Jurakng Maut, lalu mongunci lawakngnyo pakai' soribu tohutn manahnyo. Rajo Sitatn ditahatn disiatntai oca' culihnyo monipu somuo urakng di dunia sampai masa soribu tohutn nantai udah habis. (Lopas nian, io paca'an dilopasan agi', apo ongkah pakai' watu inyo kinyo manah).