2 Korintus 11:13 - Porjanjian Boharu Torjomahan Baso Dilakng Soari-ari

¹³ Obai, boko urakng totontu nantai mongolakar dalapm polayatan sia'. Sia' bopadah sia' nam boko rasul Kristus, apo sobondarnyo sia' boko rasul palsu.

2 Korintus 11:13 ပူးပေါင်းရင်းမြစ်များ

Matius 25:24

Lopas nian, hulutn inyo monorima' soribu pingkai' duit nantai datakng. Katonyo, ‘Habakng, aku tohu duatn ni'in urakng inyo kojapm. Duatn dapat untukng doi' pokoroja'an urakng bukai samo sama'an potani inyo monguti' hasil hanyian doi' lakau inyo kinyo io tanam.

Kisah Boko Rasul 15:1

Timpu Paulus ongko Barnabas ija' ado di kota Antiokhia nantai, ado boboropo urakng doi' doerah Yudea datakng. Boboropo urakng nantai mula'i mongajar boko urakng inyo pocayo agatn Yesus. Kato sia', “Pado joman komai, Musa moajaran poraturan Allah. Sotiap urakng dalapm umant Allah gola' disunant. Jadi, kaitn urakng inyo bukainyo Yahudi gola' monuruti poraturan nantai, samo sama'an urakng Yahudi. Aman cado, kaitn co paca'an disolamant'an.”

Kisah Boko Rasul 15:24

udah mondinga' borito doi' Paulus, Barnabas huatan urakng bukai inyo kaitn utus ko koi. Koi mondinga' ado boko urakng doi' antaro koi inyo datakng ko kaitn. Apo, koi kinyo moutus sia' nantai. Sia' mongajar kaitn gola' disunant aman honda' disolamant'an. Ajaran sia' nantai mombingungan kaitn, bulah hati kaitn gangga'-gua'an.

Kisah Boko Rasul 20:30

Malahan doi' antaro kaitn siku' paca'an ado urakng inyo moajaran ajaran inyo salah. Sia' paca'an bousaha oca' urakng bukai kinyo pocayo ajaran Yesus inyo bondar apo monjadi pongikut sia'.

Roma 16:18

Obai, boko urakng inyo molabuhan ubo nantai sobondarnyo co bokorojo molayati Kristus, Tuhatn kito. Sia' bayo honda' mongosihan kohonda' sia' siku'. Sia' momuji-muji agatn pomandiran inyo manis pakai' monipu urakng inyo co tohu tujuan sia' inyo jahat.

2 Korintus 11:15

Jadi, kinyo hiratn aman boko urakng inyo molayati Rajo Sitatn bulah samo sama'an nantai jam. Sia' bulah urakng bopikir, sia' nantai boko rasul inyo mongajar mongona'i hidup inyo bondar di hadapan Allah. Ahirnyo, sia' paca'an monorima' hukupan sosuai agatn boko porbuatan sia' inyo jahat.

2 Korintus 2:17

Obai, banya' urakng momboritoan Pomandiran Allah pakai' mondapat'an kountukan. Apo, koi co sama'an sia'. Koi momboritoan Pomandiran Allah agatn hati inyo tulus. Koi momboritoan sobagai urakng inyo diutus Allah, urakng inyo bopandir di hadapan Allah, urakng inyo hidup dalapm Kristus.

2 Korintus 4:2

Apo koi co molabuhan boko porbuatan inyo momaluan inyo gola' sampai diombakan. Koi co monipu urakng timpu koi momboritoan Pomandiran Allah mongona'i Kristus. Koi pan co moncampuran ajaran inyo salah agatn pomandiran Allah nantai. Sobali'nyo, koi mongajar boko hal inyo bondar agatn torus torakng. Ubo nian polayatan koi di hadapan Allah, jadi somuo urakng ulih monilai koi dalapm hati sia' siku'.

Galatia 1:7

Apo nantai bukai Kabar Boi' inyo bondar! Boko urakng inyo moajaran nantai honda' morubah Kabar Boi' mongona'i Yesus Kristus, ia'an Rajo Inyo Dijanjian Allah. Sia' moncubo monggonti'i Kabar Boi' inyo bondar nantai agatn kabar inyo salah. Jadi, sia' bulah kaitn monjadi kacau.

Galatia 2:4

Memang ado boko urakng inyo monyosahan oca' urakng inyo pocayo agatn Yesus gola' disunant. Apo sia' inyo monyosahan nantai kinyo bondar-bondar pocayo agatn Yesus. Sia' mansu' dalapm kolompok kito socaro bokokolit. Sia' honda' mohalaki caro hidup kito inyo bebas doi' koharusan pakai' monaati Hukupm Torat. Kito bebas doi' nantai obai kito disolamant'an ulih mo Yesus Kristus. Apo sobondarnyo, sia' honda' oca' kito jam gola' monaati Hukupm Torat samo sama'an siku' urakng hulutn gola' monaati habakngnyo.

Galatia 4:17

Ni'inan ado boko urakng inyo mongajar obai kaitn gola' monaati somuo Hukupm Torat. Sia' rajitn bousaha mondudus kaitn pakai' moikuti sia'. Apo, tujuan sia' kinyo boi'. Sia' honda' monyongkayoan kaitn doi' ajaran aku inyo bondar. Sia' honda' molabuhan nantai oca' kaitn rajitn bopihak ko sia' mo.

Galatia 6:12

Ado boko urakng inyo honda' mompangkakan kohebatan diri siku' dalapm boko hal inyo kotiat'an. Sia' nantaiam inyo bousaha momoso kaitn pakai' bosunant oca' kaitn ulih disolamant'an, bukainyo bayo obai Kristus mati di kayu salib. Sia' molabuhan nantai oca' sia' kinyo didorako'i boko urakng yahudi.

Efesus 4:14

bukainyo sama'an boko bobia' agi' inyo mudah ditipu agatn somuo macapm ajaran inyo salah. Kito kinyo pocayo ko boko urakng licik nantai inyo honda' mombulah urakng monjadi sosat.

Filipi 3:18

Obai, ado banya' urakng inyo hidupnyo morusa' roti komatian Kristus di kayu salib. Aku udah opat am momadahi kaitn mongona'i nantai. Watu ni'in aku kapikng monangis, momadahi kaitn mongona'i nantai agi'.

Filipi 3:2

Boboi'cam tohadap boko urakng inyo mongajaran obai urakng gola' disunant pakai' monjadi umant Allah. Sia' jahat ongko bobohayo sama'an kudu' liar.

Kolose 2:4

Aku momandiran boko hal nantai oca' urakng bukai co ulih mongontumbuki kaitn agatn pomandiran inyo manis.

Kolose 2:8

Boboi'cam jangan ado urakng inyo mongontumbuki kaitn agatn ajaran inyo kinyo boguno, ajaran inyo salah. Boko ajaran nantai doi' pondapat monsio, doi' boko roh inyo bokuaso di dunia ni'in, kinyo doi' Kristus.

1 Yohanes 2:18

Poana'anku! Joman ni'in am ari-ari toahir. Kaitn udah mondinga' obai Si Musuh Kristus paca'an datakng. Ongko watu ni'in banya' musuh Kristus udah ado. Ni'inam tandonyo, joman ninam ari-ari toahir.

1 Yohanes 4:1

Boko somadikanku inyo tokasih, udah ado banya' nabi palsu di dunia ni'in. Obai nantaiam, jangannam pocayo agatn somuo urakng inyo mongatoan obai Roh Allah ado di inyo. Apo poriso'icam lobih holu ajaran sia' nantai pakai' mongotohu'i aman roh inyo ado di inyo boasal doi' Allah kata'an cado.

Yudas 1:4

Obai, ado boko urakng totontu inyo molawatn Allah. Nyatonyo, sia' udah mansu' dalapm kolompok kaitn inyo co urakng bukai sadar obai sia' kinyo bondar-bondar pocayo ko Yesus. Sia' mongatoan Allah kito kinyo paca'an mohukupm urakng obai Sio boi' hati. Sia' gunoan pomikiran inyo salah nantai oca' sia' ulih mongosihan boko kohonda' bukakng-tubuh sia' inyo jahat. Sia' jam monula' obai Yesus Kristus ia'an satu-satunyo Tuhatn inyo bokuaso dipucu' kito. Doi' komai, udah ditulis obai sia' paca'an dihukupm.

Wahyu 19:20

Bonatakng nantai ditangkap bosamo-samo agatn nabi palsu nantai, ia'an io inyo bulah boko mujisat nantai di hadapan mato bonatakng nantai. Agatn boko mujisat nantai, io monipu boko urakng inyo ado tando bonatakng nantai, boko urakng inyo monyombah lompatukng bonatakng nantai. Jadi, bonatakng huatan nabi palsu nantai dibuakan hidup-hidup ko dalapm loutan api inyo tongahan bonyalo agatn bolerang.

Wahyu 2:2

Aku tohu somuo inyo kaitn labuhan, ia'an kaitn bojuakng, kaitn botahatn mohadapi ajab sonsaro. Aku tohu obai kaitn molawatn boko urakng jahat. Kaitn udah mouji boko urakng inyo mongaku' dirinyo rasul, padohal bukainyo. Kaitn udah sadar sia' tumbukan.

Wahyu 2:20

Apo, Aku moolikan kaitn mongona'i hal ni'in: Kaitn mombiaran botina' nantai, Izebel, monyosat'an umant-Ku. Io mongaku' dirinyo nabi, apo io udah monipu boko hulutn-Ku. Io mongajar oca' sia' bulah dosa bomporajoan, ongko oca' sia' makatn dagikng doi' bonatakng inyo diposombahan ko songiang-duato.

Wahyu 2:9

Aku tohu obai kaitn didorako'i obai pocayo ko Aku. Aku tohu obai kaitn jaro, apo ingant cam obai sobondarnyo kaitn dampu! Aku tohu obai kaitn dipojahat ulih boko urakng inyo monyobut dirinyo urakng Yahudi. Apo sobondarnyo sia' bukainyo anggota umant Allah. Sia' anggota umant Rajo Sitatn!