2 Korintus 1:10 - Porjanjian Boharu Torjomahan Baso Dilakng Soari-ari

¹⁰ Sio udah monyolamant'an koi doi' bohayo komatian nantai. Sio pan paca'an torus monyolamant'an koi. Koi yakitn ongko boharap ko Sio obai Sio paca'an monyolamant'an koi agi'.

2 Korintus 1:10 ပူးပေါင်းရင်းမြစ်များ

1 Timotius 4:10

Pakai' hal nantai am kito bokorojo koras huatan bouyuh-jorih. Obai kito boharap ko Allah inyo hidup. Sio nam inyo monyolamant'an somuo monsio, hususnyo sia' inyo pocayo.

2 Petrus 2:9

Obai Tuhatn udah molabuhan somuonyo nantai, jadi udah jolas Sio tohu caronyo monyolamant'an boko urakng bondar doi' ajab sonsaro di antaro boko urakng jahat. Tuhatn jam tohu caronyo mohukupm boko urakng jahat sampai hukupan toahir timpu ari Ponghakipan nononyo,

Roma 15:31

oca' Tuhatn molinduki aku doi' boko urakng inyo kinyo pocayo di doerah Yudea inyo honda' monyakitiku. Tulukng bodoa jam oca' polayatanku pakai' Yerusalem ditorima' agatn boi' boko urakng inyo pocayo di siatn.

2 Timotius 4:17

Apo, watu nantai, Tuhatn monyoroto'iku. Sio moonji'i kokuatan ko aku. Obai nantai, aku ulih momboritoan Kabar Boi' ko urakng inyo bukainyo urakng Yahudi. Watu nantai, aku co dihukupm mati samo sama'an lopas doi' tontorokapan bonatakng buas.

Kisah Boko Rasul 26:21

Obai aku momboritoan somuo nantai am, boko urakng Yahudi monangkap aku di tongahlamanan Rumah Allah ongko moncubo mombunuhku.

2 Korintus 1:9

Memang nantai porasa'an koi, samo agatn koi dihukupm mati. Apo pondorita'an nantai tojadi oca' koi jangan bompajakan kokuatan diri koi siku', apo bompajakan Allah inyo bulah urakng mati bobali' hidup agi'.

2 Korintus 6:9

Koi di anggap kinyo tokonal, apo koi dikonal urakng banya'. Koi opat komponyalan, apo koi totap hidup. Koi hala disiksa, apo koi co mati.