1 Yohanes 3:8 - Porjanjian Boharu Torjomahan Baso Dilakng Soari-ari

⁸ Apo urakng inyo totap bulah dosa, rotinyo io ia'an ana' Rajo Sitatn. Nantai udah jolas obai Rajo Sitatn hala bulah dosa doi' sobolupm dunia dipulah. Nantaiam alasan Ana' Allah udah datakng ko dunia, ia'an oca' Sio monongga'an pokoroja'an Rajo Sitatn.

1 Yohanes 3:8 ပူးပေါင်းရင်းမြစ်များ

Ibrani 2:14

Yesus monyobut'an boko urakng inyo pocayo ko Sio sobagai poana'an. Sia' ado bukakng-tubuh monsio inyo ulih mati, jadi Yesus monjadi monsio huatan moalapi koadaan samo sama'an sia'. Sio molabuhan nantai oca' watu Sio mati, Sio ulih mohancuran Rajo Sitatn. Rajo Sitatn bokuaso mombulah monsio mati.

Yohanes 8:44

Kaitn ninam boko poana'an Rajo Sitatn! Io nam bopai kaitn nan. Kaitn honda' monuruti kohonda' bopai kaitn nantai. Doi' mulonyo io nam pombunuh. Io co kalo ado hubukan agatn boko hal inyo bondar obai conyiant ado inyo bondar di dalapm dirinyo. Pas io bulah kotumbukan, nantai wajar, obai sipatnyo ongkah bulah kotumbukan nam. Sio nianam bopai boko tumbukan.

Kolose 2:15

Watu nantai, Sio mongalahan somuo kuaso di dunia huatan somuo roh inyo ado kuaso. Agatn caro nantai, Sio bulah sia' monjadi malu di muka' umum.

Roma 16:20

Allah inyo moonji'i sonang-nyamanam tajahan copat molonyapan kuaso Rajo Sitatn inyo molawatn kaitn. Aku bodoa oca' Yesus, Tuhatn kito, hala monunju'an kasih-Nyo ko kaitn.

Yohanes 16:11

Sio paca'an bulah sia' sadar mongona'i hukupan doi' Allah obai Rajo Sitatn inyo monguaso'i dunia ni'in udah dihukupam.

Yohanes 12:31

Watu ni'in udah gonapam watunyo dunia ni'in dihakipi. Watu ni'in jam, io inyo monguaso'i dunia ni'in, ia'an Rajo Sitatn, paca'an dikalahan.

2 Petrus 2:4

Ingantcam! Pas watu ado boko molekat inyo mombulah dosa, Allah kinyo mombebasan sia' doi' hukupan. Sio monikapan sia' ko dalapm noraka. Sia' dirantai di santai dalapm potakng sampai ari Ponghakipan nononyo.

Markus 1:24

“Ih! Yesus, urakng doi' laman Nazaret, Duatn honda' bulah lapo agatn koi? Aku tohu Duatn Inyo Suci doi' Allah! Kata'an Duatn datakng pakai' mombonasoan koi ni'in bai?”

Efesus 2:2

Watu nantai, caro hidup kaitn samo sama'an boko urakng di dunia ni'in inyo kinyo mongonal Allah. Kaitn tuyut Rajo Sitatn inyo bokuaso di langit di pucu' somuo kuaso jahat. Io ia'an roh inyo bokorojo dalapm hati boko urakng inyo kinyo monaati Allah.

Lukas 10:18

Lalu kato Yesus ko sia', “Aku udah moniant Rajo Sitatn jatu' doi' langit sama'an kilat.

1 Yohanes 3:10

Doi' tando ni'in kito mongotohu'i sopo poana'an Allah huatan sopo poana'an Rajo Sitatn: Urakng inyo co hidup bondar di hadapan Allah, urakng nianan bukainyo ana' Allah. Ubo nian jam, urakng inyo co mongasihi somadikannyo. Urakng nantai bukainyo ana' Allah.

Matius 13:38

Lakau nantai monggambaran dunia ni'in. Bonih gandupm inyo boi' nantai monggambaran boko urakng anggota Koraja'an Sorugo. Apo solalakng nantai monggambaran boko urakng inyo pongikut rajo Sitatn.

Wahyu 20:10

Rajo Sitatn inyo monipu sia' nantai, paca'an ditikapan ko dalapm loutan api ongko bolerang, tompat bonatakng ongko nabi palsu nantai. Sia' somuo paca'an disiksa siakng-malapm pakai' somanah-manahnyo.

1 Yohanes 5:19

Kito tohu obai kito boasal doi' Allah. Apo somuo urakng di dunia sia' ado di babah kuaso Rajo Sitatn inyo jahat.

1 Yohanes 3:5

Kaitn tohu obai Kristus datakng pakai' moamputi dosa monsio. Sio samo sokali co bodosa.

Yudas 1:6

Ado boko molekat jam inyo kalo dihukupm Tuhatn. Boko molekat nantai molewati batasan kuaso inyo udah ditontuan pakai' sia'. Sia' botula' doi' tompat sia' bodiapm. Ongko, sia' dirantai pakai' somanah-manahnyo. Tuhatn monawatn sia' di tompat inyo kotakan potakng-hiru' sampai ari Ponghakipan nononyo.

Matius 4:3

Ongko Rajo Sitatn, tukakng tumbukan nantai, datakng ko Yesus. Rajo Sitatn bopandir ko Sio, “Aman Duatn bondar-bondar Ana' Allah, pulahbo batu ni'in monjadi roti.”

Matius 12:28

Apo, inyo bondar ia'an Aku monundukng roh jahat agatn kuaso Allah. Ongko, nantai rotinyo Koraja'an Allah udah datakng ko kaitn.

1 Timotius 3:16

Sobondarnyo la'apo inyo tosimpatn dalapm kopocaya'an kito kotakan luar biaso! Boko hal nantai monunju'an caro hidup inyo monyonangan Allah. Boko hal nantai ia'an: “Yesus moniant'an diri-Nyo dalapm rupo monsio. Roh Allah monyatoan obai inyo dilabuhan Yesus bondar. Yesus monyatoan diri-Nyo ko boko molekat. Boko urakng momboritoan mongona'i Yesus ko somuo banso. Boko urakng di soluruh dunia monjadi pocayo ko Yesus. Allah bulah Yesus noi' ko sorugo dalapm komulia'an.”

Ibrani 9:26

Soandainyo sama'an nian, boroti Sio gola' opat ajab sonsaro doi' mulo dunia ni'in dipulah. Apo inyo nyata, watu ni'in diari-ari toahir ni'in, Sio datakng sokali mo pakai' mohapus dosa agatn caro momposombahan diri-Nyo.

1 Yohanes 1:2

Sio inyo moonji'i hidup somanah-manahnyo ado bosamo Allah Bopai. Apo timpu Sio datakng di dunia, koi ulih moniant-Nyo. Hidup somanah-manahnyo nantai ditunju'an-Nyo ko koi huatan watu ni'in, koi boritoan ko kaitn mongona'i hidup somanah-manahnyo nantai.